އިންސާނުންގެ ކިބައިގައި ހުންނަ ޠަބީޢީ އެއް ސިފައަކީ ކަންތައްތަކާ މެދު ޝައުޤުވެރިވެ، އެކަންކަން ހުންނަ ގޮތާއި ވާގޮތް ހޯދައި ބަލައި ދެތުމަށް އެދޭ އެދުމެވެ. ނޭނގޭ ކަންކަން ވާގޮތް ތަހުލީލުކޮށް ދެނެގަތުމަށް ޝައުޤުވެރިވުމެވެ. ކަންކަން މަޢުރިފާކޮށް ދެނެގަތުމަށް ލޯބިކުރަނީ ހަމަ އެކަނި އިންސާނުންނެއް ނޫނެވެ. އަރުމަވެރިކަމަކީ ޖަނަވާރުތަކުގައި ވެސް ހުންނަ ސިފައެކެވެ.

ކޮންމެ މީހަކު ވެސް، އެންމެ ކުޑަ އިރުން ސުރެ މަތި ބަލައިފިނަމަ، އުޑު އޮންނަނީ ނޫކުލައިގައި ކަން އޭނާއަށް ފާހަގަ ކުރެވޭނެއެވެ. މި ނޫ ފަސްމަންޒަރުގެ ކުރިމަތީގައި ހުދުވިލާތައް ދަތުރުކުރެއެވެ. އިރު އޮއްސޭއިރު ބައެއް ދިމާ ރަތުގެ އެކި ވަންނި ތަކާއި ދުޅަތަކުގައިި ފެނެއެވެ. އުޑުގެ މިސިފައާ މެދު ކުޑއިރުންސުރެ އެކި މީހުން އަމިއްލައަށް ފިކުރުކޮށް ހަދައިފައިވާނެއެވެ. ހިތާހިތާ ސުވާލުކުރާނެއެވެ. އުޑު ފެހިކުލައިގައި، ނުވަތަ ރީނދޫ ކުލައިގައި ނުއޮންނަނީ ކީއްވެބާވައެވެ؟ އުޑުގެ ކިތަންމެ މައްޗަށް އެރިއަސް ފެންނާނީ ނޫ ކުލައިގައި ބާވައެވެ؟

މި މަޒުމޫނުގައި އަޅުގަނޑު ގެނެސްދޭނީ އުޑު ނޫކުލައިގައި ފެންނަ ޙަޤީޤީ ސަބަބެވެ. އުޑު ނޫކުލައިގައި އޮންނަ ސަބަބު ދެނެގަތުމަށް ދެތިން އެހެން ކަމެއް ދެނެގަންނަން ޖެހެއެވެ. އެންމެ ފުރަތަމަ އަޅުގަނޑު ދަންނަވާނީ އެކަންކަމެވެ.

އެންމެ ފުރަތަމަ ދަންނަވާލާނީ އުޑު ނޫކުލައިގައި އޮންނަކަމަށް ބައެއް މީހުން ހީކުރާ ކުށް ސަބަބެވެ. ބައެއް މީހުން އުޑުގައި ވެސްނޫ ފަދަ ނޫކުލައިގެ ކުނޑިތަކެއް ފަދަ އެއްޗެއް ހުންނަނީ ކަމަށް ހީކޮށްފާނެއެވެ. ނަމަވެސް، ވާރެއާ އެކު އެފަދަ ކުނޑިއެއް ނުފައިބާތީ އާއި މަތިންދާބޯޓުގައި ދަތުރުކުރާއިރު އެފަދަ ކުޑިއެއް ނުފެންނާތީ އަދި މިއަކީ ރަނގަޅު ސަބަބު ނޫންކަން ޔަޤީން ވެއެވެ. މީހުން ހީކޮށްފާނެ އަނެއް ގޮތަކީ އުޑު ނޫކުލައިގައި އޮންނަނީ ކަނޑުގެ ނޫކުލައިގެ ދަޅައިން ކަމަށެވެ. ނަމަވެސް، ކަނޑާ އެއް ހާސް މޭލު އެތެރޭގެ ބައްރު ތަކުގައި (މިސާލީ ހިޖާޒު ނުވަތަ އެފްރިކާގެ ޤައުމުތަކުގައި) ވެސް، އުޑު އޮންނަނީ ނޫކުލައިގައެވެ. މީގެ އިތުރަށް، އުޑުމަތީގައި ވިލާބޯވެ، އުޑު ނުފެންނަ ދުވަސްތަކުގައި ވެސް، ކަނޑު އޮންނަނީ ނޫކުލައިގައިކަން ފާހަގަ ކުރެވެއެވެ.

.

ކަނޑާ ވަރަށް ދުރުގައިވާ ބައްރުތަކުގެ މަތީގެ އުޑުވެސް އޮންނަނީ ނޫކުލައިގައެވެ. އެހެންކަމުން، އެއީ ކަނޑުންވާ ކަމެއް ނޫންކަން އެނގެއެވެ.

ވިއްސާރަވެ އުޑުމަތި ބަނަވެފައިވާ ދުވަސް ދުވަހުގެ ކަނޑު އޮންނަނީ ނޫ ކުލައިގައެވެ. އެހެންކަމުން، ކަނޑު ނޫކުލައިގައި އޮންނަނީކީ އުޑުނޫވީތީކީ ނޫންކަން އެނގެއެވެ.

މިކަންކަމުން، މިއީ ކަނޑުގެ ދަޅައިންވާ ކަމެއް ނޫންކަން ޔަޤީން ވެއެވެ. ފަހަކަށް އައިސް ރޮކެޓްތަކުގައި މީހުން އުޑުގެ ވަރަށް މައްޗަށް އަރައިފިއެވެ. އެމީހުންނަށް ފާހަގަކުރެވެނީ، އުޑުގައިވާ ނޫކުލަ، މާ މައްޗަށް އެރުމުން ގެއްލޭކަމެވެ. ނޫ ކުލަ ހުންނަ ކަމަށް ފެންނަނީ ދުނިޔޭގެ ވަށައިގެންވާ އެޓްމޯސްފިއަރ ކިޔާ ގޭސްތައް ހުންނަ ފަށަލައިގައި ކަމެވެ. މި ގޭސް ފަށަލައިން ބޭރުގައި އުޑު ފެންނަނީ ކަޅު ކުލައިގައެވެ. ބަޔަކު މަޖަލަކަށް އުފައްދައި ޖައްވަށް ފޮނުވި ރޮކެޓެއްގައި ކެމެރާ ހަރުކޮށްގެން ނެގި މި ދެ މިނެއްޓުގެ ވީޑިއޯ އިން މިކަން ސާފުކޮށް އޮޅުން ފިލައެވެ. ހަނދަށް މީހުން ގޮސް ނަގާފައިވާ ފޮޓޯތަކުން ދުނިޔޭގެ ވަށައިގެން އޮންނަ ނޫކުލައިގެ “އުޑެއް” ނުފެނެއެވެ. ދުނިޔޭގެ ބޮޑު ބަޔަކީ ކަނޑުކަމުން، ކަނޑުތައް ނޫކުލައިގައި ފެނެއެވެ. ވިލާތައް ހުދުކޮށް ފެނެއެވެ. ނަމަވެސް ނޫ އުޑެއް ނުފެނެއެވެ. އުޑުކަމަށް ހީވާފަދަ ގޮތަކަށް ފެންނަނީ ދުނިޔޭގެ ވަށައިގެންވާ ހިސާބެވެ.

އެމެރިކާގެ ޖައްވާބެހޭ މަރުކަޒުން، ނާސާއިން، ޝާއިޢުކޮށްފައިވާ މި ފޮޓޯގައި، ދުނިޔޭގެ ކަނޑުތައް ނޫކުލައިގައި ފެނެއެވެ. ބިން ފެންނަނީ އެތަނެއް ހުރި ކުލައިގައެވެ. މިފަދަ ފޮޓޯއަކުން ދުނިޔެވަށައިގެންވާ ނޫ “އުޑެއް” ނުފެނެއެވެ.

އެކި ވަގުތުތަކުގައި، އުޑުމަތީގެ ނޫކުލަ އެކި ދަޅައަށް (ޝޭޑްއަށް ނުވަތަ ވަންނިއަށް ނުވަތަ ވަރުނައަށް) ފެންނަކަން ފާހަގަ ކުރެވެއެވެ. އުޑުމަތި އެންމެ ސާފުކޮށް ފެންނަނީ، އޮސްޓްރޭލިއާ ފަދަ ވަރަށް ދެކުނުގައިވާ ގައުމުތަކަށެވެ. އެޤައުމުތަކުން އުޑުމަތި ފެންނަ ނޫކުލައިގައި ދިވެހިރާއްޖޭއިން އުޑު ނުފެންނަނީ ހޫނުގަދަކަމުން ޖައްވުގައި އާވި ގިނަވާތީ އާއި އިންޑިއާއިން އަންނަ ދުމުގެ ކުޑިތަކުން ޖައްވު ނުސާފުވާތީ އެވެ.

އުޑު ނޫކުލައިގައި އޮންނަ އަރަތުގެ ތަޅުދަނޑިއަކީ ހުދުއަލީގެ ޠަބީޢަތް އެނގުމެވެ. ހުދު އައްޔަކީ ކޮން އެއްޗެއް ތޯއެވެ؟

ހުދު އަލީގެ ޠަބީޢަތް

އެންމެ ހުދު އަލި ފެންނަނީ އިރުން މެންދުރު ވަގުތުއެވެ. ބައެއް ސައިންސްވެރިން މިއަލީގެ ޠަބީޢަތް ވަރަށް ކުރިން ހޯދާފައި ވެއެވެ. އެމީހުންނަށް ފާހަގަ ކުރެވުނީ ހުދު އައްޔަކީ މުރައްކަބު އެތައް ކުލައެއް އޭގައި ހިމެނި މަސްހުނިވެފައިވާ އެއްޗެއް ކަމެވެ. އެކަހެރި އެއް ކުލައެއް ނޫން ކަމެވެ. ވިއްސާރަދުނީގައި ތަފާތު ކުލަތައް ހުންނާތީ، މިއީ ހުދުއަލީގައި އަސްލުކަމަށް ބުއްދީގެ ހަމަތަކުން ވިސްނުންތެރިން ދެނެގަނެފައި ވެއެވެ. ހުދު އަލީގައި ހިމެނޭ އެކި ކުލަތައް ވަކިކޮށް ބަލާފައި ވެއެވެ. މިކަން އެންމެ ފަސޭހައިން ބަލަން ހަދާނެ ގޮތަކީ އަގަމަތި ބޮޑު ތަށްޓަކަށް ފެން އަޅައި، ލޯގަނޑުކޮޅެއްގެ ދެބައިކުޅަ އެއްބައި ފެނުގައި އޮންނަ ގޮތަށް ކަތިކޮށް އެއަށްލައި، ހެނދުގެ ނުވަތަ ހަވީރުގެ އިރުގެ އަވި ފެނުގެ އަޑީގައިވާ ލޯގަނޑު ކޮޅުން ރިވެލިކޮށް ފާރަކަށް އެރުވުމެވެ. ރޭގަނޑު ކުރާނަމަ، ޓޯޗަކުން ލޯގަނޑުކޮޅަށް އަލިކުރަނިކޮށް ވެސް ރަނގަޅުވާނެއެވެ. ތިރީގައިވާ ފޮޓޯއިން ފެންނަ ފަދައިންނެވެ.

މިގޮތަށް ލޯގަނޑު ކޮޅަކުން އަވި ރިވެލިކުރުމުން، އޭގައި އެކުލެވޭ ތަފާތުކުލަތަކަށް ހުދުއަލި ފުރޭނިގެން ވަކިވެގެން ދެއެވެ. މިކަންކަމުން ދޭހަވަނީ ހުދު އައްޔަކީ އެކި ކުލަތަކުން އެކުލެވިފައިވާ ކުލައެއްކަމެވެ. ފެނަށް ލޯގަނޑުކޮޅެއް ކަތިކޮށްލުމުން، ފެނާއި ލޯގަނޑު ކޮޅާ ދެމެދު އެކި ފުންމިނުގައި ފެން ހުންނަ ވަރުގެ ޖާގައެއް އުފެދެއެވެ. މިޖާގަ އުފެއްދިދާނެ އެހެން ގޮތަކީ، ބިއްލޫރި ކަފައި ސިލިކޯނުން ތަތްކޮށްގެން ތިރީގައިވާ ގޮތަށް އެއްޗެއް ހަދައި، ފެން އެޅުމެވެ. ފޮޓޯއިން ފެންނަ ފަދައިންނެވެ.

އަރިމަތިން ބަލައިލުމުން ފެން އަޅާފައިވާ ބައި ފެންނަނީ ތިނެސްކަނަށެވެ. މި ބައްޓަން ދިގުކޮށް ހުންނަ ހަރު އެއްޗިއްސަށް ކިޔާ ޢާއްމު ނަމަކީ ޕްރިޒަމް އެވެ. مَنْشُور އެވެ. ޕްލާސްޓިކުން ވެސް މި ހަދާފައި ހުރެއެވެ. މިފަދަ އެއްޗަކަށް ހުދު އަލި ފަތިކޮށް އަޅުވައިލުމުން، ހުދުއަލީގައިވާ ކުލަތައް ވަކިވެއެވެ.

މި ކުލަތައް ނުކުންނަނީ ޕްރިޒަމްގައިވާ ނުސާފުކަމަކުން ކަމަށް ބައެއް މީހުން ހީކޮށްފާނެއެވެ. ނަމެވެސް، އެހެން ޕްރިޒަމް އެއް ބޭނުންކޮށްގެން ކުލަތައް ހުރި ކުލަތައް ހުރި އަލިން ހުދު އަލި ނެރެވޭތީ، މިއީ ޕްރިޒަމްގެ ނުސާފުކަމުން ވާކަމެއް ނޫންކަން އޮޅުން ފިލައެވެ.

ވިއްސާރަދުންޏަކީ ޙަޤީޤަތުގައި، ވާރޭގެ ވަރަށް ހިމަތިކިތަކަށް ހުދު އަލި އެޅުމުން ނުވަތަ އަވި ދިނުމުން، އެ ތިކިތަކުން ހުދު އަލި އޭގެ ބައިތަކަށް ވަކިކޮށް ފުރާނާތީ އުފެދޭ އެއްޗެކެވެ. ޕްރިޒަމްއެއްގެ ގޮތަށް ވާރޭ ތިކި ވެސް މަސައްކަތް ކުރެއެވެ. ވިއްސާރަދުނި ޢާއްމުކޮށް އުފެދޭނީ، އެއަށް ތިމާ ބަލާއިރު ފުރަގަހުގައި އިރު ހުންނަ ނަމައެވެ.

ކުނޑިތައް ވަކި ގޮތަކަށް އެތުރޭތީ އަޅުގަނޑުމެންނަށް އެނގެނީ، ދަގަތްފާނުގެ ބާރު އެތަންތާނގައި ވާކަމެވެ. އަދި، މި ބާރު ޢަދަދުނުކުރެވޭހާ ގިނަ ރޮނގުތަކެއްގެ ގޮތަށް ހުންނަ ކަމެވެ. ސައިންސްވެރިން ފަސޭހައަކަށް ދަގަތްފާނު ރޮނގުތައް ނުކުންނަނީ އުތުރު ޕޯލް އިން ދެކުނު ޕޯލްއަށް ކަމަށް ބުނެ ވަކި މިސްރާބަކަށް ތީރު ޖަހައި ކުރަހައެވެ. ކުދިކުދި ސަމުގާ އެއް ބޭނުންކޮށްގެން މި ރޮނގުތައް ކުރެހިދާނެއެވެ. ދަގަތްފާނުގެ އުތުރު ޕޯލް ދަމާނީ ސަމުގާއެއްގެ ދެކުނު ޕޯލްއަށެވެ.

ސައިންސްވެރިން ދެކޭގޮތުގައި، ހުރިހާ ކުލައަކީވެސް އިލެކްޓްރިކާއި ދަގަތްފާނުގެ ރާޅުތަކެކެވެ. ހުދު އަލީގައި ހުރިހާ ކުލަތަކެއްގެ ރާޅު މަސްހުނިވެފައި ވެއެވެ. އެކި ކުލައިގެ ރާޅުތައް، ފެނުގައި އަދި ބިއްލޫރީގައި ދަތުރުކުރަނީ އެކި ދުވެލީގައެވެ. ކަތިކޮށް އައިސް ބިއްލޫރިފަދަ އެތެރެ ސާފު އެއްޗެއްގައި ޖެހުމުން، އެންމެ ކުޑަކޮށް ލެނބެނީ އެންމެ ދިގު ރާޅު ހުންނަ ކުލައެވެ. އެއީ ރަތްކުލައެވެ. އެންެމެ ބޮޑަށް ކަތިވަނީ އެންމެ ކުރު ރާޅު ހުންނަ ވައިލެޓް ކުލައެވެ.

ހުދު އަލި އުފެދެނީ ކުލައަލި އެކުވެގެންކަން އެނގުމުން، އެއީ ވާގޮތްކަން ދައްކައިދިނުމަށް ތަފާތު ތަކެތި ހަދައިފައި ހުރެއެވެ. އެންމެ ކުރިން ބޭނުންކުރި މިފަދަ އެކައްޗަކީ، ވަށް ޑިސްކެއްގައި ވިއްސާރަ ދުންޏެއްގައި ހުންނަ ކުލަތައް ޖައްސައި އަނބުރާ އެއްޗެކެވެ.  މި ޑިސްކު ބާރަށް އަނބުރާލުމުން، އެ ޑިސްކުގައިވާ ކުލަތައް ލޮލުގައި އެކުވެ ހުދާގާތްކުރާ ކުލައަކަށް ބަދަލުވެއެވެ.

ހުދު އައްޔާއި އެހެން ހުރިހާ ކުލައެއްގެ އަލި އުފެއްދުމަށް ބޭނުންވަނީ ޙަޤީޤަތުގައި އެންމެ ތިން ކުލައެވެ. އެއީ ރަތާއި ނުލާއި ފެހިކުލައެވެ. މިތިންކުލައިގެ އެކި ދަޅައިން ނުވަތަ ވަންނިން ބޭނުން ހުރިހާ ކުލައެއް އުފެއްދެއެވެ. މިކަން ދައްކައިދިނުމަށް މި ތިންކުލައިގެ އެލްއީޑީ ޓޯޗު ހަދާފައި ހުރެއެވެ. ތިރީގައިވާ ފޮޓޯއިން ފެންނަ ފަދައިންނެވެ. ރަތްކުލައާއި ފެހިކުލަ އެކުވުމުން ރީނދޫ އުފެދެއެވެ. ފެއްސާއި ނޫ އެކުވުމުން، ވިލުކުލަ އުފެދެއެވެ. ނުލާއި ރަތް އަލި އެކުވުމުން ވައިލެޓް ކުލަ ނިކުމެއެވެ. އަދި ފުރަތަަމަ ބުނެވުނު ތިން ކުލަ އެކުވުމުން ހުދުކުލަ ނުކުމެއެވެ. މި ތިންކުލަ އެކި މިންވަރަށް އެއްކޮށްގެން ބޭނުން ކޮންމެ ކުލައެއް ވެސް ނެރެވެއެވެ.

ހުދުއަލި ނެރުމަށްޓަކައި، ރަތާއި ފެއްސާއި ނޫ ހުންނަންވާނީ ވަކި މިންވަރަކަށެވެ. ހުދުއަލި އުފައްދާ އެއްޗަކުން ނޫކުަލަ މުޅިން ނެތިއްޖެނަމަ، އަލީގެ ކުލަ ރީނދޫ ދަޅައަކަށް ބަދަލުވާނެއެވެ. ހުދުއަލީގައި ރަތް ނެތިއްޖެނަމަ، ވިލުނޫކުލައގެ މަޑު ނޫ ދުޅައަކަށް އަލި ބަދަލުވާނެއެވެ.

އެލްއީޑީ ހުދުއަލީގެ ބޮކި ހަދައިފައި ހުންނަނީ ފެއްސާއި ނުލާއި ރަތް ކުދި އެލްއީޑީ ބޮކިންނެވެ. އެލްއީޑީ ޓީވީ އާއި މޮބައިލް ފޯނުގެ ސްކްރީން ވެސް ހަދާފައި ހުންނަނީ މިތިންކުލައިގެ އެލްއީޑީންނެވެ. މަގުމަތީ ބަހައްޓާފައި ހުންނަ ބޮޑެތި ޓީވީން ތިންކުލައިގެ އެލްއީޑީ ފެންނަން ހުރެއެވެ. ނަމަވެސް މޮބައިލް ފޯނުގެ ސްކްރީންގެ އެލްއީޑީ ތައް ކުދިކަމުން، އެ ފެންނަނީ ތިރީގައިވާ ފޮޓޯއިން ފެންނަ ފަދައިން މައިކްރޮސްކޯޕުން ބޮޑުކޮށްގެން ބެލީމައެވެ.

ލޮލަށް ފެނުން

 އިންސާނާއަށް އޭނާގެ ވަށައިގެންވާ މާހައުލުގައި ހިނގާ ކަންތައްތަކުގެ %80 އެނގެނީ އޭނާގެ ލޮލުގެ ސަބަބުންނެވެ.  އެހެންކަމަކު، ހައިވާނުންގެ ތެރޭގައި އެންމެ ލޮލުގެ ބާރު ގަދައީ އިންސާނުންގެ ލޮލުގައެއް  ނޫނެވެ. ލޮލުގެ ފެނުން އެންމެ ރަނގަޅު ކަމަށް ބުނަނީ ބާޒުގައެވެ. ލޮލަށް ފެންނަނީ، ލޮލުން ފޮނުވާ ނޫރަކުން ނުވަތަ އައްޔަކުން ނޫނެވެ. މާހައުލުގެ ތަކެތީން ފޮނުވާ އަލި ލޮލަށް އެޅުމުންނެވެ.  ލޮލުގެ އެތެރޭގައި ފެނުމާ ބެހޭ އެންމެ މުހިއްމު ދެބަޔަކީ ބޮޑުވާ ބިއްލޫރި ފަދަ ލެންސް އަކާއި އެކި އަލި ޖެހުމުން ސިކުނޑިއަށް އެކަން އަންގާ ސެލްތަކެކެވެ.  މި ސެލްތައް އައްޔަށް މަސައްކަތްކުރަނީ އެކި ކުލައަށް އެކި މިންވަރަށެވެ.

އެއް ގަދަ މިނެއްގެ އަލި، ލޮލަށް އެޅުމުން އިންސާނާއަށް އެ ފެންނަނީ އެއް ގަދަމިނެއްގެ އަލީގެ ގޮތުގައެއް ނޫނެވެ. ތިރީގައި އެވަނީ އަލި ފެންނަ ގަދަމިން އަންގައިދޭ ޗާޓެކެވެ.

އިންސާނާގެ ލޮލަށް އެންމެ އަސަރު ކުރަނީ ރީނދޫ/ފެހި އަލި ޖެހުމުންނެވެ. އެހެންކަމުން މި ކުލައިގެ ވަރަށް ފަނޑު އަލި ވެސް ފެންނާނެއެވެ. ނަމަވެސް، ރަތާއި ނޫ ކުލައިގެ އަލި ޖެހުމުން، ލޮލަށް އަސަރުކުރަނީ ކުޑަކޮށެވެ. ދަނބާއި ކަޅުރަތްކުލަ ސަފުން ފެންނަނީ ކުޑަކޮށެވެ. މިކުލަތަކުގެ އަލި، ފެއްސާއި ރީނދުލާ އެއް ގަދަަމިނެއްގައި ފެނުމަށް، އެެ ކުލަތަކުގެ އަލީގެ ބާރު ވަރަށް ގަދަވާން ޖެހޭނެއެވެ.

ބައެއް މީހުންނަށް މިކަން ތަޖުރިބާއިން ފާހަގަކުރެވިފައި ވާނެއެވެ. އެއީ ބޮކި ފައްޗެއްގައި އެއް ވޮޓެއްގެ ރަތާއި ނޫކުލައިގެ ބޮކި ހުރެއްޖެނަމަ ނޫ އަލި އެހެން ކުލައިގެ އަލިތަކަށް ވުރެ ފަނޑުކަމަށް ފާހަގަކުރެވޭނެއެވެ. ރީނދުލާއި ފެހި އަލި ގަދަކަމަށް ފެންނާނެއެވެ. އަލިގަދަކޮށް އުފައްދަން އެންމެ އުނދަގޫވާނީ މަތީގައިވާ ގްރާފުގެ ކަނާތްފަރާތުގައިވާ ދަނބުކުލައެވެ. މިކުލައިގެ ބޮތްކެއްގެ ބާރު ވަރަށް ގަދަ ނޫންނަމަ އެ އަލި ފެންނާނީ ވަރަށް ފަނޑުކޮށެވެ. އިންސާނާގެ ލޯ އުފެދިފައިވާ ގޮތުން، ފެހިރީނދޫ ކުލަ ލޮލަށް ފަސޭހަވާނެއެވެ. އަދި ދުންފިނީގައި މި ކުލައިގެ އަލި މާދުރުން ފެނެއެވެ. އެހެންކަމުން، ފިނި ޤައުމުތަކުގައި ދުންފުނީގައި ކާރު ދުއްވާނަމަ، މި ކުލައިގެ ބައްތި ދިއްލާ އުޅެއެވެ.

ކަނޑުގައި ރަތްކުލަ އާއި ކަޅުކުލައިގެ މަސް ގިނައީ ކީއްވެ؟

ފެނަކީ މައިގަނޑު ގޮތެއްގައި އެއްވެސް ކުލައެއް ނުހުންނަ ދިޔައެކެވެ. ނަމަވެސް ފެނުގެ އާދަޔާ ޚިލާފު އެއް ސިފައަކީ ހުދު އަލި އެޅުމުން، ކޮންމެވެސް މިންވަރަކަށް ރަތްކުލަ، އެހެން ކުލަތަކާ ޚިލާފަށް ފެނަށް އެބްޒޯބްވާކަމެވެ. ފެނަށް ރަތްކުލަ މަޑުމަޑުން ފޭދިގެން ވަދެގެން މެކުވެ، ގެއްލިގެން ދާކަމެވެ. ހުދުއަލިން ރަތްކުލަ ފެނުގެ ތެރެއަށް މިގޮތަށް ދީރުމުން ދެން ހުދު އަލީގައި ބާކީ ހުންނަނީ ގިނައިން ނޫކުލައެވެ. މި ސަބަބާ ހެދި، އުޑު ނުފެންނަ ހިޔާކުރި ތަނެއްގައި ބޮޑު ފެންގަނޑެއް އޮތަސް، އެފެންގަނޑުގައި ނޫކުލައެއް ހުންނާނެއެވެ.

ތިރީގައިވާ ޗާޓުން އެ ފެންނަނީ އިރުގެ އަވި ދިނުމުން، އެކި ކުލައިގެ އަލި ފެންގަނޑެއްގައި އަޑިއަށްދާ މިންވަރެވެ.

ޗާޓުން ފާހަގަ ކުރެއްވޭނޭ ފަދައިން، ދަނބުކުލައާއި ރަތް ކުލަ ވަރަށް އަވަހަށް ފެނުގެ ތެރެއަށް ދީރެއެވެ. ފެނާއެކުވެ ގެއްލިދެއެވެ. އެންމެ އަޑިއަށް ދަނީ ނުލާއި ފެހީގެ އެކި ދުޅަތަކެވެ. 100 ވަރަކަށް މީޓަރު އަޑީގައި މުޅިންހެން ހުންނަނީ ނޫކުލައާއި ފެހިކުލައެވެ. ފެނުގެ މަތީ ފަށަލަތަކަށް ހުދު އަލީގައި ހިމެނޭ އެހެން ކުލަތައް ދީރުންވެ ހުސްވެއެވެ.

ހުރިހާ ދިރުމެއްގައި ވެސް، އެ އެތި ކައިއުޅޭ އެހެން ދިރުންތަކަށް ފަސޭހައިން ނުފެންނަގޮތް ހެއްދެވުމުގައި ހުރެއެވެ. ކަނޑުގެ އަޑީގައި ރަތްކުލައިގެ މަސް ގިނައީ އެހެން ވެގެންނެވެ. ރަތްކުލައިގެ މަހެއް، ނޫ އަލިން ފެންނައިރު އެ ފެންނާނީ ކަޅުކުލައިގައެވެ. ކަޅު މަހެއް ފަދައިންނެވެ. އެހެންވުމުން، ކަނޑުގެ އަޑީގެ އަނދިރިކަމުގެ ތެރެއަށް ފޭދިފައިވާ ފަނޑު ާ ނޫ އަލިން މިފަދަ މަސް ކައިއުޅޭ އެހެން ބޮޑެތި މަސްމަހަށް އެ ފެނުން ކުޑަވެއެވެ.

އުޑުގައި ނޫ ކުލަ ހުންނަ ސަބަބު

ވަރަށް އުހަށް އަރައި މަތިން ދާބޯޓުގައި ދަތުރުކުރާއިރު، މަތި ފެންނަނީ ކަޅުކޮށެވެ. މިއީ ކާއިނާތުގެ މައި ކުލައެވެ. އާދެ! ދުރުގައިވާ ތަރިތަކާއި ގުރަހަލިތަކުން އަލި ފޮނުވިއަސް، ޖައްވުގައި އެ ޖެހޭ އެއްވެސް އެއްޗެއް ނެތްނަމަ، އައްޔެއް ނުފެނެއެވެ. އެއީ ދުމުގައި އަލި ޖެހުމުން ފެންނަ ފަދައިންނެވެ. އިންސާނުންނަަށް އަލި ފެންނަނީ އެހެން އެއްޗެއްގައި ޖެހި ރިވެލިވެ އޭގެ ދޯދިތައް ލޮލަށް އެޅުމުންނެވެ. ނޫނީ، އަލި ފޮނުވާ އެއްޗަކަށް ބެލުމުންނެވެ.

އާދެ! އަޅުގަނޑުމެން އުޑުކަމަށް މި ކިޔާ ނޫކުލައިގެ ފަށަލައަކީ ދުނިޔެ ވަށައިގެންވާ ފަށަލައެކެވެ. އެއީ މުޅި ކާއިނާތުގެ އަދި ފަޒާގެ ކުލައެއް ނޫނެވެ. މި ނޫކުލައިގެ ހިސާބު ނިމޭތަނާއި ކަޅުކުލައިގެ ފަޒާ ފެށޭ ހިސާބަކީ ކަނޑައެޅިފައިވާ ރޮނގެއް ނޫނެވެ. މިއީ މަޑުމަޑުން ނޫކުލައިން އެއްވެސްކުލައެއްނެތް ކަޅަށް ބަދަލުވާ ހިސާބެކެވެ. ބައެއް މީހުން ދެކެނީ މި ނޫކުލަ ފެށެނީ 120 ކިލޯމީޓަރު އުހުގައި ކަމަށެވެ. އަނެއް ބައި މީހުން 60 ކިލޯމީޓަރު އުހުގައި ކަމަށެވެ. މިއީ ސްޕޭސް (ފަޒާ) ފެށޭތަނެވެ.  ނަމަވެސް މަތިންދާބޯޓެއްގައި އުހަށް އެރުމުން ފަޒާ ކަޅުކޮށް އޮންނަތަން ފެނެއެވެ.

އާދެ! އުޑުން އަޅުގަނޑު މާނަކުރަމުން މި ދަނީ މި ނޫކުލައިގެ ފަށަލައަށެވެ. ނޫކުލައިގައި މިބައި ހުންނަ ސަބަބު ދެނެގަތުމަށް ދުނިޔޭގެ ވަށައިގެން މިވާ އެޓްމޮސްފިއަރ ނުވަތަ ގޭހުގައި ފަށަލައިގައި ތަފާތު ގޭސްތައް ހުންނަކަން އެނގެން ޖެހެއެވެ. ނައިޓްރޮޖަން އާއި އޮކްސިޖަން އެވެ. ކާރބަން ޑިއޮކްސައިޑް އާއި ހައިޑްރޮޖަން ފަދަ ގޭސްތަކެވެ. ބިމަށް ހުރިހާ އެއްޗެއް ދަމާ ބާރެއް (ގްރެވިޓީ) ހުންނާތީ ބިމާ އެންމެ ކައިރީގައި ހުންނަނީ އެންމެ ބަރު ގޭސްތަކެވެ. އެންމެ މަތީގައި ލުއި ގޭސްތަކެވެ. ހައިޑްރޮޖަން އާއި މީތޭން އާއި އޮޒޯން ފަދަ ގޭސްތަކެވެ.

އިރުން ފޮނުވާ ތަފާތުކުލަތަކުގެ އަލި އުޑުގެ މަތީގައިވާ ލުއި ގޭސްތަކަށް  އެޅުމުން ވަނީ ކިހިނެއްތޯއެވެ؟

ކުރިން ބަޔާން ކުރެވުނު ފަދައިން، އައްޔަކީ އިލެކްޓްރިކް ރާޅެކެވެ.  އެކި ކުލަތަކުގެ ރާޅުގެ ދިގުމިން ތަފާތެވެ. ކޮންމެ ކުލައަކަށް ވަކި ދިގުމިނެއް ވެއެވެ. އެއީ އޭގެ ޠަބީޢީ ސިފައެވެ. އެންމެކުރީ ދަނބުކުލައިގެ ރާޅުގެ ވޭވްލެންތު ނުވަތަ ދިގުމިނެވެ. އެންެމެ ދިގީ ރަތްކުލައިގެ ރާޅެވެ.

ފަޒާގައިވާ ގޭސް ޒައްރުތަކުގައި، ދަނބުކުލައިގެ އަލި ޖެހުމުން ވަރަށް ފަސޭހައިން އެ ފެތުރެއެވެ.  . އެންެމެ ބޮޑަށް ފެތުރެނީ ދަނބުކުލައެވެ. ދެން ނޫކުލައެވެ.  ގޭސް ޒައްރުތަކުގައި ޖެހިފައި އެންމެ ބޮޑަށް ފެތުރެނީ ދަނބުކަމަށް ވާނަމަ، ދަނބުކުލައިގައި އުޑު ނޯންނަނީ ކީއްވެ ހެއްޔެވެ؟ މިސުވާލުގެ ޖަވާބަކީ އިންސާނުންގެ ލޮލަށް ދަނބުކުލަ ފެންނަނީ ވަރަށް ގަދަ ނަމައެވެ. އެހެންކަމުން، ދަނބުކުލައިގައި އުޑު ނުފެންނަނީއެވެ.  މިއާއެކު ދަނބުކުލަ ފެތުރޭލެއް ބޮޑުކަމުން އެ ކުލަ އަވިން މަދުވެއެވެ. ބުނެވޭ ގޮތުގައި ދަނބު/ނޫ ކުލައިގެ %25 އުޑުގައިވާ ގޭސްތަކުން ފެތުރިގެން ދެއެވެ. އެހެންވެއްޖެނަމަ، ފަޒާގައި އަވި ފެންނާނީ ދުނިޔެއަށް ފެންނަ ހުދުކުަލައިގައި ބާވައެވެ؟

އިރުއަޮއްސޭއިރު އުޑުމަތީގެ ކުލަތައް ދޮންފަޅޯކުލައަށް ބަދަލުވުން

އިރު އޮއްސޭއިރު، ގިނަ ފަހަރު، އުޑުމައްޗަށް ރަތްކުލައިގެ ދަޅަތައް އަރައެވެ. އިރު ވެސް ރަތުގެ ވަންނި ކުލަތަކަށް ބަދަލުވެއެވެ.  ޖައްވުގައި ތަނެއް ރޯވުމުގެ ސަބަބުން ދުން ބޯ ވެއްޖެނަމަ ވެސް، މި ކުލަތައް އިރަށާއި އައްޔަށް އަރައެވެ. އެއީ ކީއްވެގެން ހެއްޔެވެ؟

އިރުގެ އަލީގެ ބާރު އެންމެ ގަދަވަނީ އިރު ބޯމަތީގައި ހުންނަ އިރުއެވެ.  އެއީ މީހާއާ އިރު އެންމެ ގާތްވާއިރު އެވެ. މި ވަގުތު އަވި ދަތުރުކުރަނީ ދުނިޔެވަށައިގެންވާ ގޭސްތަކުން ސީދަލަށެވެ. އެހެންކަމުން، ދަތުރުކުރަންޖެހޭ ރާސްތާ ކުރެވެ. އިރު އޮއްސެންދާއިރު، ދަތުރުކުރަންޖެހޭ ރާސްތާ ދަނީ ދިގުވަމުން، އަލީގެ ބާރު ކުޑަވަމުންނެވެ. އިރުއޮއްސެން ކައިރިވީމާ، އިރުގެ އަލި ދުނިޔެ ވަށައިގެންވާ ގޭސްތަކުގެ ބޯ ފަށަލައަކުން ދަތުރުކުރަން ޖެހެއެވެ. އެއީ ތިރީގައިވާ ކުރެހުމުގައިވާ ފަދައިންނެވެ.

ކުރެހުމުގައި B ޖަހާފައި އެވަނީ މެންދުރާ ގާތް އިރު، އިރުގެ އަލި ދަތުކުރަންޖެހޭ ގޭސްތަކުގެ ބޯމިނުގައެވެ. A ޖަހާފައި އެވަނީ އިރު އަޮއްސެން ގާތްވާ އިރު، އިރުގެ އަވި ދަތުރުކުރަންޖެހޭ ގޭސްތަކުގެ ފަށަލައަށެވެ. ފާހަގަކުރެވޭ ކަމަކީ، A މާބޮޑަށް ވެސް ދިގުކަމެވެ. ދަނބު އަލި އަދި ނޫ އަލި މި ބޯ ފަށަލައިގައި ދަތުުކުރާއިރު ފެތުރި މުޅިންހެން ހުސްވެއެވެ. ދެން އިރުން ފޮނުވާ އަލީގައި ގިނައިން ހުންނާނީ ރަތާއި ރީނދޫގެ ވަންނި ތަކެވެ. މި ކުލަތައް ވެސް ގޭސްތަކުގެ ބޯަމިނުން ފެތުރެން ފަށައެވެ. އުޑުމަތީގައި ދުމާއި އެހެން ކުޑިތައް ގިނަވި ވަރަކަށް ރަތްކުލަ ފެތުރޭލެއް ބޮޑުވާނެއެވެ. އަދި ކުލައިގެ ރަތްކަން ސަފުން ބޮޑުވާނެއެވެ.

އިރުގެ ކުލަތަކާ މެދު ވިސްނާ ފިކުރުކުރާ ނަމަ، ހައިރާންވާހާ ވެއެވެ. ގުދުރަތުގެ ފުރިހަމަކަމާ މެދު ފިކުރު ކުރާ މީހުންނަށެވެ.

إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ لَآيَاتٍ لِّأُولِي الْأَلْبَاب

ހަމަކަށަވަރުން، އުޑުތަކާއި ބިން ހެއްދެވުމުގައްޔާއި ރޭދުވާ ތަފާތުވުމުގައި ބުއްދިވެރީންނަށް ކަށަވަރުވެގެން ހުރި ހެކިތައް ވެއެވެ.

الَّذِينَ يَذْكُرُونَ اللَّهَ قِيَامًا وَقُعُودًا وَعَلَىٰ جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالْأَرْضِ رَبَّنَا مَا خَلَقْتَ هَٰذَا بَاطِلًا سُبْحَانَكَ فَقِنَا عَذَابَ النَّار

އެއުރެންނީ، ކޮޅަށް ތިބެގެންނާއި، އިށީނދެ ތިބެގެންނާއި، އޮށޯވެތިބެގެން، ﷲ ހަނދުމަކޮށް، އުޑުތަކާއި ބިން ހެއްދެވުމާމެދު، ފިކުރުކޮށް އުޅޭ މީހުންނެވެ. (އެއުރެން ދަންނަވާނެތެވެ.) އަޅަމެންގެ ވެރި ރަސްކަލާކޮ! އިބަރަސްކަލާނގެ މިތަކެތި ހައްދަވާފައިވަނީ، ބާޠިލްގޮތެއްގައެއް ނޫނެވެ. އިބަރަސްކަލާނގެ ހުސް ޠާހިރުވަންތަ ކަމާއެވެ! ފަހެ، ނަރަކައިގެ ޢަޛާބުން އަޅަމެން ދިންނަވާދޭނވެ!