MV Kelaa — Thaana font in regular and semi-bold sizes

އެމްވީ ކެލާ އަކީ، އާދައިގެ ކުދި ސައިޒުން ލިޔުމަށާއި ފެވިއަކުރުން ލިޔުމަށް ފަރުމާކޮށްފައިވާ ފޮންޓެކެވެ. މި ފޮންޓު އެހެން ފޮންޓުތަކުގެ އަކުރުތަކާ ދެތިން ގޮތުން ތަފާތެވެ. އެންމެ ފުރަތަމަ، ނޫނުގެ މެދު ތުނޑު އެހެން ފޮންޓުތަކުގެ ތުނޑުތަކާ އަޅާ ބަލާއިރު ވަރަށް ފާޅުކަން ބޮޑެވެ. ސ ދިގެވެ. އޯބޯފިލި ވަރަށް އުހެވެ. އަކުރުތަކުގެ ފިލިތައް އަކުރުތަކާ ވަރަށް ގާތެވެ.

އެހެން ފޮންޓުތަކާ ބެހޭ ގޮތުން އަޅުގަނޑު ދަންނަވާފައި ވާނޭ ފަދައިން، ފެވި ނުވަތަ ފަލަ އަކުރުތަކުގެ ބައްޓަންތަކުގެ ފާޅުކަން، ކުދި އަކުރުތަކަށް ވުރެ ކުޑަވެފައި އަކުރުތައް ބޮޑަށް އެއްވަރުކަމަށް ފެންނާނެއެވެ. ކުދި އަކުރުތައް ބޮޑުކޮށްފިނަމަ، ހުތުރުވާ ވަރަށް ބައްޓަންތައް ބޮޑުވާނެތީއާއި ލިޔަން ނަގާ ޖާގަ ކުޑަކުރަން މިހެން ހަދަނީއެވެ.

ތިރީގައި އެވަނީ ރާއްޖޭގައި އެންމެ މަޤްބޫލް ބައެއް ފޮންޓު އާއި މި ފޮންޓު އަޅާކިޔަން އެނގޭގޮތަށް ލިޔެފައެވެ. ކުދި އަކުރުންނާއި ފެވި އަކުރުންނެވެ.

މި އަކުރުތަކަކީ ކޮން ބޭފުޅެއްގެ އަތުލިޔުމެއް ތޯއެވެ؟ 2001 ވަނަ އަހަރުގެ ކުރިން، މައިކްރޮސޮފްޓް ވާޑްގައި ދޭސީގޮތުން ނުވަތަ
މަހަލީ ގޮތުން ތާނައެއް ނުލިޔެވެއެވެ. ތާނަ ލިޔެވޭގޮތް ހެދީ ވިންޑޯޒް އެކްސްޕީ އިން ފެށިގެންނެވެ. އޭގެ ކުރިން ވާޑްގައި ތާނަ ލިޔަނީ ”ގަދަ“ ކަމުންނެވެ. ”ރެކޯޑަރ“ ކިޔާ ޕްރޮގްރާމެއް ބޭނުންކޮށްގެން ކާރސަރ ފަހަތަށް ޖައްސައިގެންނެވެ. އެ ދުވަސްވަރު، ފައިސާގެ ހިސާބުތައް ހެދުމުގައި ބޭނުންކުރި އެއް ފޮންޓަކީ، ބަޔަކު ފޮންޓު ކޮޕީކޮށްފާނެތީ އެކަން ދަތިވާގޮތަކަށް ހަދާފައިވާ ފޮންޓެކެވެ. 2001 ގެ ފަހުން ވިންޑޯޒްގައި ތާނަ ލިޔެވޭގޮތް ހެދުމާ ގުޅިގެން މި ފޮންޓު ބޭނުންކުރާތީ ނުފެނެއެވެ. ލަފާކުރެވޭ ގޮތުން ވިންޑޯޒްގައި ތާނަ ލިޔުމަށް ފޮންޓަށް ގެންނަންވީ ބަދަލު އެއްވެސް ފަރާތުން ނުގެނެސް ފޮންޓު އުވުނީއެވެ. ނަމަވެސް، އެ ފޮންޓަކީ ބަޔަކަށް ރީތި ފޮންޓެކެވެ. ފޮންޓުގެ ތެރޭގައި ފޮންޓު އުފެއްދި ފަރާތެއް، އަދި ކާކުގެ ލިޔުމެއްކަން އެނގޭކަށް ނެތެވެ.

ފޮންޓުގެ ކޮޕީއެއް އަޅުގަނޑުގެ އަތުގައި އޮތުމާ އެކު، އޭގެ އަކުރުތައް ރީތިކޮށް، މި ފޮންޓު އުވި ދިޔަ ނުދިނުމަށްޓަކައި މިގެނެސް ދެނީ އެ ފޮންޓާ ވައްތަރުކޮށް ހަދާފައިވާ ފޮންޓެކެވެ. މި ބައްޓަމުގެ ބޯލްޑް ނުވަތަ ފެވި ފޮންޓު ހަދާފައި މިވަނީ، ހިސާބާއި ފަވާފައި ތާނަ ލިޔާ ބައެއް އުސޫލުތައް ބޭނުންކޮށްގެން އަޅުގަނޑެވެ.

ފަހަކަށް އައިސް އަޅުގަނޑު ފަރުމާ ކުރާ އެހެން ފޮންޓުތައް ފަދައިން މި ފޮންޓުގެ ކުދި އަކުރުތައް 1 ޕޮއިންޓް އާ ހަމައަށް ގާތްކުރެވޭނެއެވެ. އެހެން ހެދުމަށް މައިކްރޮސޮފްޓް ވާޑް އިން ލިޔާނަމަ، ވާޑް ހުޅުވުމަށް ފަހު، ފޮންޓު ޕެނަލްގެ އެޑްވާންސްޑް ޓެބަށް އޮބާލައްވައި، ގާތްކުރަން ޖެހޭ މިންވަރު ލިޔަން ފާހަގަކޮށްފައިވާ ތަނުގައި  ބޭނުންވާ މިންވަރެއް (މިސާލަކަށް 0.25 ޕޮއިންޓް)  ލިޔުއްވާނީއެވެ.

މި ފޮންޓުގެ އިނގިރޭސި އަކުރުތައް ހުންނާނީ ތާނަ އަކުރާ އަޅާބަލާއިރު އެމުނިއެކުލެވޭ ގޮތަކަށެވެ. ފޮންޓުގައި ރުފިޔާގެ ނިޝާންވެއެވެ. އެ ވަނީ ` ގައެވެ. މިފިތަކީ ކިބޯޑުގެ 1 ގެ ވާތް ފަރާތުގައިވާ ފިތެވެ.

އެމްވީ ކެލާގެ ކުދި އަދި ފެވި ފޮންޓު ޑައުންލޯޑުކުރެއްވުމަށް ތިރީގައިވާ ނިޝާނަށް އޮބާލައްވާށެވެ!