How vacuum lifts work

ލިފްޓް މަސައްކަތް ކުރާ ގޮތާ ބެހޭ ގޮތުން އަޅުގަނޑު ހުށަހަޅަމުންދާ މަޒުމޫނުތަކުގެ ތެރެއިން ފުރަތަމަ މަޒުމޫނުގައި ގެނެސްދެވިފައިވަނީ ތައާރަފެކެވެ. ލިފްޓް އީޖާދުވި ގޮތާއި އެކި ބާވަތް ބާވަތުގެ ލިފްޓްގެ ނަންތަކާއި ބޭނުންތަކެވެ. ފަހު މަޒުމޫނުތަކުގައި މި ތަފްޞީލުކުރަނީ އެކި ބާވަތުގެ ލިފްޓް މަސައްކަތްކުރާ ގޮތެވެ. އެންމެ ފަހު މަޒުމޫނުގައި ގެނެސްދެވުނީ ހައިޑްރޯލިކް ލިފްޓް މަސައްކަތް ކުރާގޮތެވެ. ކުރީ މަޒުމޫނުތަކަށް ތިރީގައިވާ ފޮޓޯތަކުން ދެވޭނެއެވެ.

ތައާރަފު

މި މަޒުމޫނުގައި މި ގެނެސްދެނީ ވެކިޔުމް ލިފްޓް  މަސައްކަތް ކުރާ ގޮތެވެ. މި ލިފްޓް މަސައްކަތް ކުރާ ގޮތް ދެނެގަތުމަށް އެންމެ މުހިއްމީ ”ވެކިއުމް“ މިއީ ކޮން އެއްޗެއްކަން ދެނެގަތުމަށެވެ. އެހެންކަމުން، މި ލަފުޒުގެ މާނައާ ދޭތެރޭ ވިސްނާލަމާތޯއެވެ.

ލެޓިން ބަހުން ވެކިއުމްގެ މާނައަކީ ހުސް އެވެ. އެއްވެސް އެއްޗެއް ނެތުމެވެ. މި ލަފުޒާ ގާތް ބައެއް ލަފުޒު ބައެއް ބޭފުޅުން އަޑުއައްސަވާފައި ވެދާނެއެވެ. މިސާލެއްގެ ގޮތުން ވޭކެންސީ (vacancy) ޢާއްމުކޮށް ބޭނުންކުރަނީ، ވަޒީފާއެއް ހުސްވެފައި އޮތުމަށެވެ. މި ލަފުޒު ބައެއް އޮފީސްތަކުގެ ބޭރުގައި ލިޔެފައި ހުރެއެވެ. ބޭނުމަކީ ވަޒީފާއެއް ހުހަށް އޮތްކަން ނުވަތަ ނެތްކަން މީހުންނަށް އެންގުމެވެ. ހޮޓަލެއްގައި no vacancy މިހެން ލިޔެފިނަމަ، އޭގެ މާނައަކީ ހުސް ކޮޓަރިއެއް ނެތުމެވެ. އެހެންކަމުން، ކޮންމެހެން އެތަނަކަށް ވަދެ ސުވާލު ކުރާކަށް ނުޖެހޭނެއެވެ. vacate ކުރުމަކީ، ގެއެއް ފަދަތަނަކުން ބަޔަކު ގެ ހުސްކޮށް ނުކުތުމެވެ. ނުވަތަ ބަޔަކު ނެރުމެވެ. vacant ވޭކަންޓް މިލަފުޒު ބޭނުންކުރަނީ، ތަނެއް ނުވަތަ މަޤާމެއް ހުސްވެގެންވާ ޙާލަތް ސިފަކުރުމަށެވެ. ޗުއްޓީއަށް އިނގިރޭސިބަހުން ބޭނުންކުރާ ލަފުޒު، vacation ވެކޭޝަންގެ މާނައަކީ އާދަކޮށް ކުރާ މަސައްކަތުން ނުވަތަ ނޯކިރީން ހުސްވެގެން ވުމެވެ. ވެކިއުމް ޢާއްމުކޮށް ސައިންސް ގައި ބޭނުންކުރަނީ އެއްޗެއްގެ ތެރޭގައި އެއްވެސް އެއްޗެއް ނެތުމަށެވެ. ވައި ވެސް ނެތުމަށެވެ.

މިސާލެއްގެ ގޮތުން ހުސްދަޅެއްގެ ތެރޭގައި ވެކިއުމް އެއް ނުހުންނާއެވެ. އެއީ އެ ދަޅުގެ ތެރޭގައި ވައި ހުންނާތީއެވެ. ދަޅަކުން ވައި ހުސްކޮށްލެވިއްޖެނަމަ، ދަޅުގެ ވަށައިގެންވާ ވައި، ދަޅުވަށައިގެން ކޮށްޕާނެއެވެ. ދަޅު ތުނިނަމަ، ވައިގެ ސަބަބުން ދަޅު ފިތޭނެއެވެ. ދަޅެއްގެ ތެރެއިން ވައި ހުސްކޮށްލެވޭނީ ކިހިނަކުން ތޯއެވެ؟  މިކަން ދެއްކުމަށް ކުރާ އެއް ކަމަކީ، ކޮކާކޯލާ ހުސްކުރި ދަޅަކަށް ދެތިން ސައިސަމުސާ ފެން އަޅައި ފެން ކެކެން ފެށުމުން ބަންޑުން  ފެން އެއްޗެއްގެ ތެރެއަށް ތިރިކުރުމެވެ. މިހެން ހެދުމުން، ދަޅު ބަނޑިބަނޑިވެގެން ފިތޭނެއެވެ. އެހެންވާ ސަބަބަކީ، ދަޅު ތެރޭގައިވާ ފެން އާތްވަށްވެ ނިކުންނަށް ދަނިކޮށް، ބަންޑުން ޖެހުމުން، ދަޅަށް ފިނިވެ، އާވިތައް ފެނަށް ބަދަލުވާތީއެވެ. އާވި ނަގާ ޖާގަބޮޑުކަމުން، އެ ފެނަށް ބަދަލުވުމުން ހުސްކަމެއް ދަޅުތެރޭގައި އުފެދެނީއެވެ. ތިރީގައި އެވާ ވީޑިއޯއިން މި ކަންކުރާ ތަން ފެނެއެވެ.

މަހަށް ފެން ނުފެންނަ ފަދައިން، އިންސާނުންނަކަށް ވައެއް ނުފެނެއެވެ. ނަމަވެސް، އަހުރެމެންގެ ވަށައިގެން ވައި ވެއެވެ. ޖައްވުގައިވާ މި ވައި ފަށަލަ އެތައް ކިލޯމީޓަރެއްގެ އުސްމިނުގައި ވެއެވެ. މައްޗަށް ދިޔަ ވަރަކަށް ވައި މަދުވެއެވެ. އެންމެ ފަހުން ވައި ވެސް ނުހުންނަ މުޅިންހެން ވެކިއުމް ހުންނަ ހިސާބަށް ދެވެއެވެ. އިންސާނުން ނޭވާލަނީ ވައިންކަމަށް ވާތީ، ވައި ނެތްނަމަ، ނޭވާނުލެވިގެން އިންސާނާ މަރުވާނެއެވެ. ސްޕޭސްއަށް ދާ މީހުން، ނޭވާލަނީ ޓޭންކެއްގައި ހުންނަ ވައި ބޭނުން ކޮށްގެންނެވެ. އުހުން ދަތުރުުކުރާ މަތިންދާ ބޯޓުތައް ހަދާފައި ހުންނަނީ، ވައި އޭގެ ތެރޭގައި ބަންދުވާ ގޮތަށެވެ.

ޖައްވުން ފެށިގެން ބިމާހަމައަށް ހުންނަ ވައިގެ ބަރުދަނަކީ ގާތްގަޑަކަށް ކޮންމެ އަކަ ސެންޓިމީޓަރަކަށް އެއް ކިލޯގްރާމް އެވެ. މިބަރުން ކޮންމެ އެއްޗެއް ހުންނަނީ ފިތިފައެވެ. ނަމަވެސް، އަހުރެމެންނަށް އެކަން އިޙްސާސެއް ނުވެއެވެ. ސަބަބަކީ ހުރިހާ ފަރާތަކުން ވައިގެ ފިއްތުން އިޙްސާސް ވާތީއެވެ. ދަޅަކުން ވައި ހުސްކޮށްލުމުން ދަޅު ފިތެނީ ބަންދުވެފައިވާތީ، އެތެރެއިން އެއް ވަރަކަށް ނުފިއްތޭތީއެވެ.  ބުނެވޭ ގޮތުގައި، ކޮންމެ އަކަ ސެންޓިމީޓަރަކަށް ގާތްގަޑަކަށް އެއް ކިލޯގެ ބަރުދަނުގެ ފިއްތުން އިޙްސާސް ކުރެވެއެވެ. ފުއްޕާހަމެއް ފުއްޕުމަށް ފަހު މޫދުގެ އަޑިއަށް ލާނަމަ، އަޅުގަނޑުމެންނަށް ފެންނާނީ ފެނުގެ ފިއްތުމުގެ ސަބަބުން އެ ފުއްޕާހަން ކުޑަވަމުންދާ ތަނެވެ. ފުއްޕާފައިވާ ހަމެއް ޖައްވުގެ މައްޗަށް ގެންދާ ވަރަކަށް އެ ހަން ބޮޑުވެ އެންމެ ފަހުން، ހަމަށް ނުހިފެހެއްޓިގެން ފަޅަައިގެން ގޮސް ބިންމައްޗަށް ވެއްޓެއެވެ.

ޖޫސް ތައްޓެއް ހޮޅިއަކުން މީހަކު ބޯ އިރު، ޙަޤީޤަތުގައި އޭނާ ކުރާ ކަމަކީ، އަނގައިގެ ތެރެއިން ވައި ހުސްކުރަނީ އެވެ. އަނގައިގައި ވެކިއުމް އެއް އުފައްދަނީއެވެ. މިހެން ހެދުމުން، ވައިގެ ކޮއްޕުމުން، ޖޫސްތައް ހޮޅީގެ ތެރެއިން މައްޗަށް ވެކިއުމް އާ ދިމާއަށް އަރަނީއެވެ. މައްޗަށް އަރަނީ ދަމާތީކީ ނޫނެވެ. މައްޗަށް އަރަނީ ޖައްވުގެ ޕްރެޝަރުގެ ސަބަބުނެވެ. މީހާ ކުރާކަމަކީ އަނގައިގެ ތެރޭގައި ވެކިއުމް އުފެއްދުމެވެ.  ވެކިއުމް އުފެދެނީ، ވައިނެތް ބޮޑުޖާގައެއް ގޮތުގައި، ފުއްޕާމޭ ހުޅުވުމުންނެވެ. ދެން މޭ ތެރެއަށް ވައިތައް ދެއެވެ. މިއީ އިހު ޒަމާނުގައި ތިލޭރުން ގަދަ ހޫނު އުފައްދަން ގިރުނބާ ބޭނުންއިރު ވާގޮތަށް ވާކަމެކެވެ. ގިރުނބާއަށް ދަމާލުމުން، އެ ފަތްޖެހި އޭގައި ހުރި ވައިތައް އުނދުނަށް ދެއެވެ. ދެން ދޫކޮށްލުމުން އޭގެ ވަތްތައް ތިރިއަށް ވެއްޓި ހުޅުވޭއިރު، އޭގެ ތެރެއަށް ވައި ވަދެއެވެ. ވައި ވަންނަނީ އެތެރޭގައި ވައި ނެތި ޖާގައެއް އޮތުމުން، ޖައްވުގެ އޮއްބުމުގެ ބާރުގައެވެ.

ޖޫސްތައްޓަކަށް ކިހާ ދިގު ހޮޅިއެއް ޖަހައިގެން މިގޮތަށް ޖޫސް ބޮވޭނެތޯއެވެ؟ ހިސާބުތަކުން ދައްކަނީ ރާއްޖޭގައި ނަމަ، އޮލަނބަށް ހުރި އެންމެ ދިގު ހޮޅީގެ ދިގުމިނަކަށް ވާނީ 34 ފޫޓު ކަމެވެ. މިއަށް ވުރެ ދިގުނަމަ، ކިތަންމެ ވަރަކަށް “ދެމިއަސް” ޖޫހެއް އެއަށް ވުރެ މައްޗަށް ނާރާނެއެވެ. އަދި މިހާ ދިގު ހޮޅިއަކުން ޖޫސް ބުއިމަށް އަނގައިގެ ތެރޭގައި އެއްވެސް ވައެއް ހުރެގެން ނުވާނެއެވެ. މިކަން ކުރެވޭނީ ވަރަށް ފުއްޕާމޭ ރަނގަޅު މީހަކަށެވެ.

ފުއްޕާމެއިން ކުރާކަމަކީ، ހޮޅީގެ ތެރޭގައި ހުރި ވައި ފުއްޕާމެއިގެ ތެރެއަށް ދެމުމެވެ. މިގޮތަށް އެއްޗެއްގެ ހުރި ވައި ދަމައި ހުސްކުރުމަށް، ބޭނުންކުރާ ޕަންޕުވެސް ހުރެއެވެ. އެއަށް ކިޔަނީ ވެކިއުމް ޕަންޕު އެވެ. ރާއްޖޭގައި ވެކިއުމް ޕަންޕު އެންމެ ގިނައިން ބޭނުންކުރަނީ ވެކިއުމް ކްލީނަރ ގެ ގޮތުގައެވެ. ކަރަންޓާ ގުޅުމުން، އޭގެ ތެރޭގައިވާ ބުރަފައްޗެއް އެނބުރިގަނެގެން އޭގައިވާ ވައިތައް ބޭރުކޮށްލައެވެ. އެތެރެ ހުސްވުމުން ޖައްވުމުގެ އޮބުމުގެ ސަބަބުން ވައި އެތެރެއަށް ވަދެވެނީ ހޮޅިއެއްގެ އެތެރެއިންނެވެ. ކުންޏާއެކުއެވެ. އޭސީ ހަދާ މީހުން ވެސް ވެކިއުމް ޕަމްޕް ގެންގުޅެއެވެ. އެއީ ތަރުމޯޒެއް ވަރުގެ ކުޑަ އެއްޗެކެވެ. އެންމެ ބާރު ގަދަ ވެކއުމް ޕަންޕަކަށް ރާއްޖޭގައި ބޭނުންކުރީ މާލޭގެ މަގުތަކުގައި ފާޚާނާ ހޮޅިތައް ލީ ދުވަސްވަރު، ބިމުގައިވާ ފެން ދަމައިގަތުމަށް ބޭނުންކުރި ޕަންޕެވެ.

ވެކިއުމް ލިފްޓް މަސައްކަތް ކުރާ ގޮތް

މަތީގައި ބަޔާން ކުރެވުނު ވާހަކަތަކުން، ވެކިއުމް ލިފްޓެއް މަސައްކަތް ކުރާގޮތް ދެނެގަތުމަށް ބޭނުންވާ ފަސްމަންޒަރު ލިބިގަނެވިފައި ވާނެއެވެ. މައިގަނޑު ގޮތެއްގައި، ވެކިއުމް ލިފްޓް މަސައްކަތް ކުރަނީ ހޮޅިއަކުން ޖޫސްތައްޓެއް ބޯއިރު ޖޫސް ހޮޅިން މައްޗަށް އަރާ ގޮތަށެވެ. ހޮޅީގެ ގޮތުގައި ބޭނުންކުރަނީ ތިން ފޫޓު ނުވަތަ ހަތަރު ފޫޓު ހުންނަ ވަރުގެ ޕްލާސްޓިކް ހޮޅިއެކެވެ. އެ ހޮޅިން ވައި ހުސްކުރަން، ވެކިއުމްކުރަން، ވައި ދަމަނީ ހޮޅީގެ މައްޗާ ގުޅާފައިވާ ވެކިއުމް ޕަންޕަކުންނެވެ. ބައެއް ފަހަރު ހޮޅީގެ މަތީގައި ވެސް ވެކިއުމް ޕަމްޕް ހަރުކުރެއެވެ.

ކޮންމެ ތަޅުމެއްގައި ހޮޅީގެ ތެރެއަށް ވަނުމަށް ދޮރު ކަނޑާފައި ހުރެއެވެ. މި ދޮރު ހުޅުވެނީ ބޭރަށެވެ. މިއީ ވައި ނުވަންނަ ގޮތަށް ހަދާފައިވާ ދޮރެވެ.

ލިފްޓުން މައްޗަށް އެރުމަށް ބޭނުންކުރަނީ ހޮޅީގެ ތެރޭގައި ދަތުރުކުރާ  ކާރެކެވެ. ނުވަތަ ކެޕްސިއުލެކެވެ. މި ކާރުގެ މައްޗާ (ސީލިންގއާ)  ހޮޅިއާ ދޭތެރެ ހުންނަނީ ވައި ދަތުރު ނުކުރާނޭ ގޮތަށް ބަންދުކޮށްފައެވެ.

ޕަންޕު ހިންގުމުން ކާރުގެ މަތީގައިވާ ބައިން ވައި ހުސްވާނެއެވެ. ކާރާއި ހޮޅީގެ ތިރީބައި ހުންނާނީ ވައިގެ ޕްރެޝަރާ އެއްވަރަށެވެ. ވައި ހުސްވަމުން ދިޔަ ވަރަކަށް ކާރު ޖައްވުގެ ވައިން މައްޗަށް ކޮށްޕާނެއެވެ. ރަނގަޅު ތަޅުމަށް ދެވުމުން ވަގުތީ ގޮތުން ހޮޅީގެ ތެރޭގައި ފާލަކުން ކާރު ހިފެހެއްޓި ޕަންޕު ނިންވާލާނެއެވެ. ދެން ދޮރު ހުޅުވާފައި ފައިބަންވީއެވެ.

މިހާ ހިސާބުން ބައެއް ކިޔުންތެރިންގެ ހިތަށް އަރާނީ ކަންދިމާވާގޮތުން ޕަންޕު ހުއްޓިއްޖެނަމަ، މީހާ ހުރި ކާރު ނުވަތަ ޕްލެޓްފޯމް ވެއްޓޭނެ ހެއްޔެވެ؟ މި ސުވާލުގެ ޖަވާބަކީ ނޫނެވެ. ކަންދިމާވާ ގޮތުން ކަރަންޓުު ކެނޑިއްޖެނަމަ، ދެކަމެއް ވާނެއެވެ. އެއްކަމަކީ، ވަގުތުން އަރިމަތީގައި ފާލެއް އެޅި ހުރިތަނުގައި ކާރު ހިފެހެއްޓުމެވެ. ދެން، ވިސްނަންޖެހޭ ނުކުތާއަކީ، ޕަންޕު ނުހިނގިއަސް، ކާރުގެ މަތިވަނީ ބަންދުވެގެންކަމެވެ. އެހެންކަމުން ޖައްވުގެ ވައި ކާރުގެ މައްޗަކަށް ނުވަންނާނެއެވެ. އެބައިގެ ޕްރެޝަރ ދަށްކަމުން، ފާލު ނެތަސް ކާރު ހިފެހެއްޓިފައި ހުންނާނެ އެވެ. އެއީ ހޮޅިބުރިއެއް  ފެނަށް ބާނައި މަތީކޮޅުގައި އިނގިލި އަޅައި އުފުލާލުމުން ފެން ނުފައިބާ ފަދައިންނެވެ.  ކަރަންޓު ކެނޑުމުން ލިފްޓްގައި ހުރި މީހާ އިސްކުރެއް ހުޅުވުމުން ވައި މައްޗަށް މަޑުމަޑުން ވަދެ، ލިފްޓް ބިމަށް ތިރިކުރެވޭނެއެވެ.

ވެކިއުމް ލިފްޓްގެ އުފަކާރައާއި ހިތިކާރަ

ދެން މި ބަޔާން ކުރަނީ މިބާވަތުގެ ލިފްޓްގެ ފައިދާ (އުފަކާރަ) އާއި ދިމާވާ މައްސަލަ (ހިތިކާރަ) ތަކެވެ. އެއްވެސް ބާވަތެއްގެ ލިފްޓަކީ ހުރިހާ ޙާލަތަކަށް ރަނގަޅު އެއްޗެއް ނޫނެވެ. އެކި ކަންކަމަށް ރަނގަޅީ އެކި ބާވަތުގެ ލިފްޓެވެ.

އުފަކާރަ

1. މި ބާވަތުގެ ލިފްޓްގެ ހުރިހާ ބަރެއް ހިފަނީ ލިފްޓްގެ ބުޑަށެވެ. އެހެންކަމުން، ޢިމާރާތަށް އެއްވެސް ބަރެއް ނުހިފާނެއެވެ.
2. މިއީ އެންމެ ދުވަހަކުން ހަރުކުރެވޭ ލިފްޓެކެވެ. އެކަކަށް ދަތުރުކުރެވޭ ލިފްޓް ގޮޅީގެ ޑައެމީޓަރަކީ އެންމެ 32 އިންޗިއެވެ.  މިގެއަށް ގެންނާނީ ބޮޑުބައި ރާވައިގެންނެވެ.
3. ލިފްޓްގައި ހުންނަ އިރު ވަށައިގެން ފެންނާނެއެވެ.

ހިތިކާރަ

1. މި ބާވަތުގެ ލިފްޓް ޢާއްމުކޮށް ބަހައްޓައި އުޅެނީ އުސްވެގެން ފަސް ބުރިއަށް ހުންނަ ގެތަކުގައެވެ. މާ އުސްކޮށް ހަދާ ތަންތަނަކު މިބާވަތުގެ ލިފްޓެއް ނުބެހެއްޓޭނެއެވެ.
2. މި ބާވަތުގެ ލިފްޓް އެންމެ ބޮޑުކޮށް ހަދާފައި ހުންނަނީ ހަތަރު މީހުންނަށެވެ.
3. ވެކިއުމް ލިފްޓަކީ ބާރަށް ދަތުރުކުރެވޭ އެއްޗެއް ނޫނެވެ.

މަތީގައިވާ އުފަކާރައާއި ހިތިކާރައާ މެދު ވިސްނުމުން މި ބާވަތުގެ ލިފްޓް އެންމެ ރަނގަޅުވަނީ ދެތިން ބުރިއަށް ކަމަށް ލަފާކުރެވެއެވެ. އަގަކީ ގާތްގަޑަކަށް 10000 ޑޮލަރެވެ. އެއީ ބެހެއްޓުމާއެކުއެވެ. އަޅުގަނޑަށް އެނގިގެން ރާއްޖޭގައި މިބާވަތުގެ ލިފްޓެއް އަދި ނުހުރެއެވެ.