ގިނަ ބައެއްގެ ހަނދާނުގައި ތިން ރަސްމީ ފާލަމެއް މާލޭގައި އަޅައިފިއެވެ. ކޮންމެ ފާލަމެއްވެސް އަޅަނީ ކުރިން ހުރި ރަސްމީ ފާލަން ރޫޅާލުމަށް ފަހުއެވެ. މި މަޒުމޫނުގައި މި ގެނެސްދެނީ މުޙައްމަދު އަމީން ދައުރުގައި އެޅި ރަސްމީ ފާލަމުގެ ކުރެހުންތަކާއި ހަދާނޭ ގޮތެވެ. މި ރަސްމީ ފާލަން އެޅި ތާރީޚާއި ފަރުމާ ކުރި ފަރާތް، ”އިއްޔެ“ ކިޔާ މަޖައްލާއެއްގައި ޢަބްދުލްޙަކީމް ޙުސައިން މަނިކު (ގްލޯރީގެ) ލިޔުއްވާފައި ވެއެވެ. ބައެއް މީހުންނަށް އެންެމެ ރީތީ އަމީން ދައުރުގެ ފާލަމެވެ.
ރާއްޖޭގެ ހުރިހާ ރަށެއްގައި ވެސް ފާލަން އަޅަން ޖެހެއެވެ. މާލޭގެ ރަސްމީ ފާލަންތައް، ރާއްޖެތެރޭގެ ރަށްރަށުން ކޮޕީކޮށް އެއާ ދާދި އެއްގޮތަކަށް ހަދައެވެ. މިސާލެއްގެ ގޮތުން، އައްޑޫ އެއަރޕޯޓުގެ ފަހަތު ފަޅުގައިވާ ފާލަމަށް ވިސްނަވާށެވެ. އެހެންކަމުން، ފާލަން އެޅުމާ މެދު ވިސްނާ ރަށު ކައުންސިލްތަކަށް މި ނަމޫނާއިން ފިލާވަޅުތައް ނެންގެވޭނެއެވެ. މި މަޒުމޫނުގައި ފާލަން އަޅާނެ ގޮތުގެ ތަފްޞީލް މާވަޑިއަކަށް މިކަން ކުރެވޭ މިންވަރަށް ހިމަނާނަމެވެ.

މުޙައްމަދު އަމީން ދައުރުގައި އަޅާފައި ހުރި ފާލަމަކީ ދިވެހިވަންތަ ގޮތަކަށް، ހިތްގައިމު މިންތަކަކަށް ހަދާފައިވާ ފާލަމެކެވެ. މި ފާލަމުގެ ބައެއް ފޮޓޯތައް ތިރީގައި އެވަނީ އިންޓަރނެޓުގައި ހުރި ގޮތަށެވެ.

މަތީގައިވާ ފޮޓޯތަކުން ތިޔަ ބޭފުޅުންނަށް އެ ފާލަން ހުރި ގޮތް ތަޞައްވުރު ކުރެވޭނެއެވެ. (މިއަށް ވުރެ ސާފު ފޮޓޯތަކެއް އެއްވެސް ކިޔުންތެރިޔަކު ގެންގުޅުއްވާނަމަ، އެ ފޮޓޯތަކުން ނަގާފައިވާ ފޮޓޯ ލިބެނިކޮށް އަޅުގަނޑުގެ ކުރެހުންތައް މިހާރަށް ވުރެ ފުރިހަމަ ކުރެވޭނެއެވެ.)

މާލޭގެ ޤަދީމީ ފާލަމަކީ، މުޅިން ލަކުޑިން ހަދާފައިވާ ފާލަމެކެވެ. މައުމޫން ދައުރު ފެށިގެން މާ ގިނަ އަހަރުތަކެއް ނުވަނީސް، މި ފާލަން ރޫޅާލައިފިއެވެ. މިކަން ހިނގަން ދިމާވި ގޮތަކީ، ފާލަމުގެ އިރު ދެކުނުން ކުރިން ހުރި މުހިއްމު އޮފީސްތައް (ވަޒީރުލްއަޢުޡަމުގެ އޮފީހާއި މިފަދަ އެހެން ބައެއް އޮފީސްތައް) ރަންޖެހިކޮށްޓާއި ކުރީގެ ނާދީގެ އުތުރުން އޮތް ކޮށްޓަށް ނާޞިރުދައުރުގައި ބަދަލުކޮށް ވަރަށް ބޮޑު ގުދަނެއް މި ފާލަމުގެ އިރުން ހެދުމެވެ. އެ ދުވަސްވަރު، ކަސްޓަމްސް ހުންނަނީ މި ތަނާ ކައިރީގައި، މިހާރު ޖުމްހޫރީ މައިދާން ހުރި ތަނުގައެވެ. ރާއްޖެއަށް ބޭރުން ގެންނަ ގިނަ މުދައު ބާލަނީ މި ގުދަނަށެވެ. މާކަ ގިނަ އަހަރެއް ނުވަނީސް، ގުދަން ކުޑަވެ، މާފަންނު ގުރާބުތުނޑި ކިޔާ ސަރަޙައްދަށް ކަސްޓަމްގެ ބޮޑު ގުދަން ބަދަލުކޮށް ކަސްޓަމްގެ ޢިމާރާތް އެތަނުގައި ހަދަންޖެހިއްޖެއެވެ. މިހެން ހެދުމުން ބޮޑު ގުދަނުގެ ބޭނުން ކެޑިއްޖެއެވެ. އެހެންކަމުން ފާލަމާއި ގުދަން ހުރި ތަނުން ބައެއް ނަގައި، ކަސްޓަމްސްގެ ޒަމާންވީ ޢިމާރާތް ތަޅާލައި، ބޮޑު ބައެއް ފުންކޮށް މިހާރު ހުރިގޮތަށް އެ ސަރަޙައްދު ހަދައިފިއެވެ. މިކަން ހިނގީ މައުމޫން ދައުރުގައެވެ.

ރަސްމީ ބޮޑު ފާލަން ރޫޅާލައި ޖަހާފައިވާ ބުޑުތައް ނެގި ދުވަހު އެތަން އަޅުގަނޑު ގޮސް ބެލީމެވެ. އަޅުގަނޑަށް ފާހަގަ ކުރެވުނީ  ފާލަން ހަދާފައިވަނީ ކޮންކްރީޓު ބުޑުތަކެއްގެ މަތީގައި ކަމެވެ. ބުޑުތައް ހުރީ ތިރީކޮޅު ފަލަކޮށް މަތި ހިމަކޮށް، މުޅިން ވަށްކޮށެވެ. ބުޑުތަކުގެ މަތީގައި ރަންވަންލޯ ބޯލްޓެއް (ނަޓުޖަހައިގެން ހަރުކުރެވޭ ގޮތަށް ހަދާފައިވާ އިސްކުރެއް) ވަޅުލާފައި ވެއެވެ. އެހެންކަމުން، ބުޑުތައް އެއްގަމުގައި ހަދައި، ފަޅުތެރޭގައި ޖަހާފައި ހުރުމާ ވައްތަރެވެ. ގިނަ ދަސްއަހަރުތަކެއް ވަންދެން ކޮންކްރީޓު ފަޅައިގެން ނުގޮސް ހުރީ، ލަފާ ކުރެވޭގޮތުން އޭގެ އެތެރޭގައި ރަންވަންލޯ  ދެތިން ނަރު ވަޅުލާފައިވާތީއެވެ. މީގެ ބައެއް ބުޑުތައް އަދިވެސް ފަޅުތެރޭގައި ވުމަކީ ގާތްކަމެކެވެ.

1990 ވަނަ އަހަރަކީ ”މިނިވަން 25“ ގެ ނަމުގައި ރަސްމިއްޔާތު ތަކެއް ބޭއްވި އަހަރެކެވެ. މި އަހަރު ދެކުނު އޭޝިޔާގެ ވެރިންގެ ބައްދަލުވުމެއް، ސާކް ސަމިޓް، ރާއްޖޭގައި ބޭއްވިއެވެ. މިކަމާ ގުޅިގެން ޖުމްހޫރީ މައިދާންގެ ކުރިމަތި މިހާރު އޮތްގޮތަށް ހެދިއެވެ. އަދި ބޮޑު ފާލަމެއް ވެސް އެޅިއެވެ.

މި ފާލަމަކީ ގިނަ ބަޔަކަށް ވަރަށް ކަމުނުދާ ފާލަމެކެވެ. މިފާލަމާ ބެހޭ ގޮތުން، އެ ފަރުމާ ކުރި މީހާގެ ނަން ބުނެފައި އޭގެ މައްސަލަތައް ގެދޮރު ކުރަހާ އުޅުނު މީހަކު ކިޔައި ދިނެވެ. އެއް ކަމަކީ، އޭގެ މިންތައް ހިތްގައިމު ނުވުމެވެ. ހީވަނީ އޮޑިހަރުގެއެއް ހެނެވެ. ނަމަވެސް އޮޑި ހަރުގެއަކާ ވެސް ވައްތަރެއް ނޫނެވެ. ފުރާޅުގެ ކަތިމިން މާބޮޑަށް ތޫނެވެ. ފުރާޅު ތިރާވެދާނެ ފަދަ ސިފައެއް ޖަހައެވެ. ކުކުޅުވަހިކޮޅުގައި ޖަހާފައިވާ ކުރި ބޯށި ފާލަމާ އަޅާބަލާއިރު މާ ކުޑައެވެ. އަސްކަނި ކަނުގައި ޖަހާފައިވާ ތެދު ކުރު ކަންޏަކީ ދިވެހި އެއްްެޗެއް ނޫނެވެ. ފާލަމުގެ މޫނުމަތީގައިވާ ކުރެހުންތަކަކީ ދިވެހި ކުރެހުންތަކެއް ނޫނެވެ. ތަނބުތަކުގެ މަތީ މަކުޑީގެ ކުރެހުމަކީ (ކެޕިޓަލްއަކީ) ނީލޯފަރު (ލޮޓަސް) ކުރެހުމެކެވެ. އެ ނިސްބަތްވަނީ ހިންދީންނަށެވެ. ފުރާޅުގެ ކިއްސަރު އަސްކަންޏަށް ތިރިވެ ރަހަވާގޮތުގައި ހުތުރުކަމެއް ވެއެވެ. މިހެން ގޮސް މީނާ ވަރަށް ގިނަ ”މައްސަލަ“ އެ ފާލަމާ ބެހޭ ގޮތުން ކިޔައިދިނެވެ. ފާލަން މާ ”ގައްޑާ“ ކަމަށް ބުންޏެވެ. އަޅުގަނޑަށް ހީވާގޮތުން ވެސް، އެ ފާލަމަށް ވުރެ އަމީންގެ ފާލަން މާ ހިތްގައިމެވެ. އަމީންގެ ފާލަން ހީވަނީ ކައިވެންޏަކަށް ތައްޔާރުވެފައިވާ ލޫޅާފަތި ޖިއްސުއްލަޠީފެއް ހެންނެވެ.  ރީއްޗަކީ އެކި މީހުންނަށް ތަފާތު އެއްޗެކެވެ.

ބައެއް މީހުން ކަންކަމާ މެދު ނުވިސްނައި، ބަޔަކު ކަންކުރިގޮތަށް އެކަން ތަޤުލީދުކުރެއެވެ. ކޮޕީކުރެއެވެ. އެހެންކަމުން، ރާއްޖެތެރޭގެ އެތައް ރަށެއްގައި، މި ފާލަންގޮތަށް ފާލަންތައް ހަދާފައި ހުރެއެވެ. އީޖާދީގޮތަށް ކަންކަމާ މެދު ވިސްނަނީ މަދުބައެކެވެ.

ކުރިން ދެންނެވުނު ފާލަން ބިނާކުރިތާ 25 އަހަރު ވެއްޖެއެވެ. ދެން އައީ މިނިވަން 50 ގެ ނަމުގައި ފާހަގަ ކުރި އަހަރެކެވެ. 2013 ވަނަ އަހަރު ފެށުނު ރައީސް ޔާމީންގެ ދައުރުގައި، މައުމޫން ދައުރުގައި ކޮށްފައިހުރި ކަންކަން މުޅިން ބަދަލުކުރަން ބޭނުންވި ކަހަލައެވެ. އެގޮތުގެ މަތިން ސަލްޓަން ޕާކު އެހެން ގޮތަކަށް ހަދައި ނަންބަދަލުކޮށް އެތަނުގައި ހުރި ކަޅުވަކަރު މިސްކިތް ނަގައި، އިސްލާމީ މަރުކަޒުގެ ހަރިއްމަ ފާރު ތަޅާލައި، ސަލްޓަން ޕާކު ކުރިމަތީގައި ހުރި ޖުމްހޫރީ ބިނާ އެތަނުން ނަގައި، ކުރިން ހުރި ރަސްމީ ފާލަން ރޫޅާލައި އެތަނުގައި އެހެން ފާލަމެއް ހެދިއެވެ. މިއައު ފާލަމަކީ މިހާރު ބޭނުންކުރަމުންދާ ރަސްމީ ފާލަަމެވެ. ހުޅުވީ  30 ޖުލައި 2015 ގައެވެ. މި ފާލަމަކީ، ކެވްލަރ ކިޔާ ބާވަތުގެ ސަތަރީގެ ރިޔާތަކަކުން ހިޔާކޮށް، ދަގަނޑުން ހަދާފައިވާ ފާލަމެވެ. ކެވްލަރ އަކީ ގިނަ ދުވަހަށް ދެމިހުންނަ ބާވަތެއްގެ ވަރަށް ވަރުގަދަ ޕްލާސްޓިކެކެވެ. ކެވްލަރ އެންމެ ފުރަތަމަ ބޭނުުންކުރި އެއް ތަނަކީ ޖިއްދާގައި ހުންނަ ޙައްޖު ޓާމިނަލެވެ. މި ރިޔާތައް ދަމާފައިވަނީ ދަގަނޑު ފަރުމާނުތަކަކާއި ކުނބުތަކެއް ބޭނުންކޮށްގެންނެވެ. ރިޔާތަކުގެ ތިރީގައިވަނީ ހަތަރެސްކަން އާދައިގެ ދަގަނޑުން މަތިވަޑާންގަނޑު ހަދައި، ޕޮލީކާބަނޭޓް ކިޔާ ބާވަތުގެ ދެރަ ޕްލާސްޓިކް ޖަހާފައިވާ ބައެކެވެ. ބަލައިލާ ބެލުމަށް ވަރަށް ދޭސީ އެވެ. މި ފާލަން ހެދީ ޗައިނާގެ އެހީގައި އެމް.ޓީ.ސީ.ސީ. އިންނެވެ. މިކަމާ ބެހޭ އިތުރު މަޢުލޫމާތު މި ޖުމުލައަށް އޮބާލައްވަނިކޮށް ފެނިވަޑައިގަންނަވާނެއެވެ.  މި ފާލަމުގެ އާދަޔާ ޚިލާފު އެއްކަމަކީ ކުދި ލޯންޗުފަހަރު ބޮޑު ރިޔާދަށަށް ވަދެ (ހިޔަލުގައި) އަރައިފައިބާ ހެދޭކަމެވެ.

ފާލަން ހަދާފައިވަނީ ދަގަނޑުން ކަމަށް ވާތީ ފަރުމާނާއި ކުނބުތަކުގައި އަދި އެހެން ބައިތަކުގައި ދަބަރުޖަހައިގެން ފާލަން ގިނަ ދުވަސްދުވަހު ހުންނަނީ ވަރަށް ހަޑިވެފައެވެ. މި ފާލަން ނުބެލެހެއްޓި ހަލާކުވަމުން ދާތީ އެވާހަކަ ނޫސްތަކުގައި ޖަހައި ހަދައެވެ. https://mihaaru.com/gallery/2377  https://raajje.mv/storyboard/2567?page=116 ފާލަމަކީ އެތައް ނަޒަރަކުން  ބަލާއިރު މަރާމާތު އުނދަގޫ، ބެލެހެއްޓުން ބޮޑު ފާލަމެކެވެ. ޕޮލީކާބަނޭޓް އަކީ އަވިން މުރަނަވެ ފަޅައިގެންދާ އެއްޗެކެވެ.

ގިނަ ބަޔަކު ސިފަކުރާގޮތުގައި، މި ފާލަމަކީ ހައިބަތު ހުރި ފާލަމެއް ނޫނެވެ. ކުރިން ހުރި ފާލަންވެސް އެމީހުންނަށް މާ ރީއްޗެވެ. ފަރުމާގައި މައްސަލަތަކެއް ވާކަން ޔަޤީން އެވެ. ހަމައެކަނި ރިޔާތައް ރީތިވެގެންނެއް ކަމަކު ނުދާނެއެވެ. ރިޔާތައް ފެންނާނީ ދުރުން ބެލީމައެވެ. އަރައި ފައިބާ މީހުންނަށް ރީތިވާނީ ގާތުން ފެންނަ ހިސާބު ރީތިވީމައެވެ. އެއް ނަޒަރަކުން މުޅި ފާލަން ފެނުމުންނެވެ. ރިޔާއެއީ ފަރުމާގެ ބައެއް ނަމަ، ތިރީބައި ހުންނަން ޖެހޭނީ އޮޑިފަހަރު ހަނދާންވާ ގޮތަށެވެ.  ރިޔާނަގައިގެން ހަދާފައިވާ (ޓެންސައިލް މެމްބްރޭންއިން = ވާން ދުލިން) ހިޔާކޮށްފައިވާ ބައެއް ޢިމާރާތްތައް މި ޖުމުލައަށް ފިތާލައްވަނިކޮށް ފެނިވަޑައިގަންނަވާނެއެވެ.  https://www.pinterest.com/pin/460915343128825396/

ކުރީގެ ރަސްމީ ފާލަން އެ ދުވަސްްވަރުގެ ފައިސާގައި ވެސް ކުރަހާފައި ވިއެވެ.

ޤަދީމީ ބޮޑު ފާލަމުގެ ކުރެހުންތައް

ޤަދީމީ ބޮޑު ފާލަމުގެ ފޮޓޯތަކުން އޭގެ މިންތައް ހޯދި ދާނެއެވެ. އެއީ އެހެން ފޮޓޯއަކުން ވެސް އެއްޗެއްގެ މިންތައް ދެނެގަނެވޭނޭ ފަދައިންނެވެ. މިކަމަށް ބޭނުންވަނީ، ފޮޓޯގައިވާ އެކައްޗެއްގެެ ޙަޤީޤީ މިން އެނގުމެވެ. އެއިރުން، މިން އެނގޭ އެތި ވަޒަނަކަށް ބަލައިގެން އެހެން ހުރިހާ މިންތައް ހޯދޭނެއެވެ. މިއީ ހިސާބުން ކުރެވޭނޭ ކަމެކެވެ. ފާލަމުގެ ކިތަންމެ ފޮޓޯއެއްގައި މީހުން ތިބެއެވެ. އެމީހުންގެ އިސްކޮޅު ލަފާކުރެވެއެވެ. އެހެންކަމުން އެހެން މިންތައް ދެނެގަނެވޭނެއެވެ.

މި އުސޫލު ބޭނުންކޮށްގެން މިންތައް ހޯދުމުން އަޅުގަނޑަށް ފާހަގަކުރެވުނީ ފާލަމުގެ ދެ ފަރާތު މުޑިތަކުގެ މެދުން މިން އަޅާނަމަ، ފުޅާމިނަކީ 14 ފޫޓު ކަމެވެ. އުސްމިނަކީ ½8 އާއި 9 ފޫޓާ ދެމެދެވެ. ދިގުމިނަކީ 40 ފޫޓެވެ. ފުރާޅުތަކުގެ ކަތިމިނަކީ ގާތްގަޑަކަށް 24 ދަރަޖައެވެ. މިއީ ކޮންމެ ދިހަ ފޫޓެއްގެ ދިގުމިނުން ފަސް ފޫޓު އުސްކުރީމާ ހުންނާނޭ މިނާ ވަރަށް ގާތް މިނެކެވެ. އެއީ ވަރަށް ލޮލަށް ފަސޭހަ ކަތިމިނެކެވެ.

މުޅި ފާލަން ހަދާފައިވަނީ ލަކުޑިންނެވެ. ތައްޓު ނޫން ތަންތަނުގައި ވަނީ ފެހި ކުލައާއި ހުދުކުލައިގެ ދަވާދު ލާފައެވެ. ފާލަމުން އުޅަނދަށް އަރައިފޭބުމަށް ވަނީ ހަތަރު ހަރުފަތެވެ. މި ހަރުފަތްތަކުގެ އުސްމިނުގައި ގާތްގަޑަކަށް 8 އިންޗި ހުރެއެވެ. 13 މާޗު 1972 ގައި، އިނގިރޭސި ރާނީ ޒިޔާރަތް ކުރައްވަން ވެގެން، މި ހަރުފަތްތައް އުސްވެގެން އެ ކަމާ ގުޅިގެން ކުރިން އައި އިނގިރޭސި ޖަމާޢަތެއްގެ އެދުމަށް ހަރުފަތްތައް ތިރި ކުރިއެވެ. ހަރުފަތްތައް ތިރިކުރީ 6 އިންޗިއަށް ކަމަށް ލަފާކުރެވެއެވެ. ހަރުފަތްތަކުގެ އުސްމިނުގައި އަޅުގަނޑު ބެހެއްޓީ 7 އިންޗިއެވެ. ދިގުމިނުގައި 18 އިންޗިއެވެ.

ދަންނައެވެ. އަޅުގަނޑުގެ މަޤްޞަދަކީ ބޮޑު ފާލަން ހުރި ގޮތަށް ތަފާތެއް ނެތި ކުރެހުން ކަމުގައި ވިއަސް، ޒަމާނަށް އައިސްފައިވާ ބަދަލާ ގުޅިގެން ފާލަމުގެ ހަރުފަތްތަކަށް ބަދަލެއް ގެންނަން ޖެހެއެވެ. އެއީ ގިނަ ބަޔަކަށް މި ކުރެހުންތައް ބޭނުން ކުރެވޭނޭ ގޮތުގެ މަތީންނެވެ. ބޮޑު ފާލަން ހެދި ދުވަސްވަރު ގިނަ މީހުން ބޭނުން ކުރާނީ ފަށްގަނޑު ވަަރަށް ތިރިކޮށް ހުންނަ ދޯނިން ނުވަތަ ޖަލިޔާއިން މީހުން އަރައިފޭބުމަށެވެ. ނަމަވެސް، މި ޒަމާނުގެ ލޯންޗު ފަހަރުގެ ފަށްވަރުގައި ނުވަތަ މަތިކަންވަރުގައި (ލޮނުގަނޑާއި މަތިކަނުގެ ތުންފަތާ ދެމެދު ހުންނަ އުސްމިނުގައި) ގާތްގަޑަކަށް ތިން ފޫޓު ބައި ހުންނާނެއެވެ. އެހެންކަމުން އެފަދަ ލޯންޗަކުން ބޮޑު ފާލަމުގެ ފަޅާވީ ކޮޅުގެ ވަށައިގެންވާ ތިރީ ހަރުފަތްތަކަށް ފައިބަން ވަރަށް ދަތިވާނެއެވެ. އަރައިފޭބުމަށް ފަސޭހަވާނީ، ފާލަމުގެ ތައްޓުއާ އެއްވަރަށް ފާލަމުގެ ކޮޅު ހުރިއްޔާއެވެ. ނަމަވެސް، ދިޔަވަރަށް އަންނަ ބަދަލުން ލޯންޗުގެ ފަށްވަރު ތިރިވާނެތީ ހަރުފަތްތަކެއް ބޭނުންވާނެއެވެ. މީގެ އިތުރަށް އެއްވެސް ކަމަކާ ގުޅިގެން މީހަކު ފަޅަށް އެރެން ނުވަތަ އަރަން ޖެހިއްޖެނަމަ، ހަރުފަތްތަކެއް ހުރުމުން ވަރަށް ފަސޭހަ ވާނެއެވެ.

ބޮޑު ފާލަން ރީތިވުމުގެ އެއް ސަބަބަކީ، މުޑިތަކުގެ ދެމެދުގައި އާއި އަސްކަންޏާއި ކުކުޅުވަހިކޮޅުގެ ނަލަފިލާގައި އަޅާފައިވާ ކުރެހުންތަކެވެ. ނަލަފިލާގައި ހަރުކޮށްފައިވާ ބަޔަކީ ޓިނުން ކަފައިގެން ހަދާފައިވާ ބައެކެވެ. މީގެ ބައްޓަންތަކުގެ އަޞްލަކީ މުލިއާގޭގެ ނަލަފިލާގެ ކުރެހުންތައް ކަމަށް ލަފާކުރެވެއެވެ. ނަކަލުކުރެވޭ ވަރަށް މިކުރެހުންތައް ސާފުކޮށް އެއްވެސް ފޮޓޯއަކުން ނުފެންނާތީ، އަޅުގަނޑު ޤަޞްދުކުރީ އެއް ފޫޓުގެ ފުޅާ ފިލައިން ކެފޭވަރަށް މިފަދަ ކުރެހުން ކުރަހާށެވެ. އެހެންކަމުން މިއީ ވެސް އަޞްލާ ތަފާތުވާނޭ ކަމެކެވެ.

ތަކެތީގައި މިން އެޅުމުގައި ރާއްޖޭގައި މިހާރު ބޭނުންކުރަނީ މެޓްރިކް ޖިންސްތަކެވެ. ދިގުމިން ބަލަނީ މީޓަރުންނާއި މިިލިމީޓަރުންނެވެ. ޚިޔާލަށް ގެންނަށް ފަސޭހަވާ ގޮތަށް، އަދި ރަށު ކައުންސިލްތަކަށް ފަސޭހަވާނޭ ގޮތަށް ކުރެހުމުގައި މިންތައް ޖަހާފައިވާނީ ފޫޓުންނާއި އިންޗިންނެވެ. ކުރީގެ މި ވަޒަނަކީ އިންސާނާއަށް ތަޞައްވުރުކުރަން ފަސޭހަ ވަޒަނެކެވެ. އިނގިރޭސިވިލާތުގައި މެޓްރިކް މިންތައް އުވާލުމުގެ ވާހަކަ ދޭތެރެ ދޭތެރެއިން ދެކެވެއެވެ.

މިއީ އަޅުގަނޑު ގެ ކުރެހުންތަކުން ކުލަޖައްސާފައިވާ ތަޞްވީރެކެވެ. މި ތަޞްވީރު، އަޞްލުގެ ފޮޓޯއާ ވައްތަރުތޯއެވެ؟ ކުރިން ނަގާފައިވާ ހުރިހާ ފޮޓޯއަކީ ބިންމަތީގައި މީހަކު ހުރެގެން ނަގާފައިވާ ފޮޓޯއެވެ. އެހެންކަމުން ފެންނަ ގޮތް ތަފަތުވާނެއެވެ. ފޮޓޯ ނަގާއިރު ބިންމަތީގައި މީހާ ހުންނާތީ، މަތީބައި ބޮޑުކަމަށް ދައްކާނެއެވެ. މި ކުރެހުމަކީ ފްރޮންޓް އެލިވޭޝަން އެކެވެ. ކުރިމަތީ ބިތެވެ.  ކުރިމަތީ ބިތް ކުރަހަނީ ވަރަށް ދުރުގައި ހުރެފައި ބެލީމާ ފެންނަ ގޮތަށެވެ. އެކި ފޮޓޯތަކުން މިން އެޅުމުން އަޅުގަނޑަށް ފާހަގަކުރެވުނީ ފަންގިފިލާގެ އުސްމިނަކީ އަށްފޫޓު ބައި ނުވަތަ ނުވަތަ ނުވަ ފޫޓު ކަމެވެ. ކުރަހާފައިވަނީ ނުވަ ފޫޓު ބަހައްޓައިގެންނެވެ. އެއީ އެއްވެސް ޙާލަތެއްގައި ފަންކާއެއް ހަރުކުރަން ޖެހިއްޖެނަމަ، އެކި ޤައުމުތަކުގައި ފަންގިފިލާ އެޅުމަށް ހުއްދަދޭ އެންމެ ތިރި އުސްމިނެވެ. އެއްވެސް ފޮޓޯއަކުން ކުކުޅުވަހީގެ ވެޔޮގަނޑު ސާފުކޮށް ނޭނގޭތީ މީގައި އެވަނީ އަޅުގަނޑަށް ފެންނަ ޚިޔާލަކަށް ކުރަހާފައެވެ. މީގެ ދެ ވައްތަރެއް ތިޔަ ބޭފުޅުންނަށް ހުށަހަޅާނަމެވެ.

ފާލަމުގެ ތައްޓު ނުވަތަ ޑެކް ހަދާފައި އެވަނީ އެއް ފަހަރާ ދެ ލޯންޗު ކައިރިކުރެވޭ ގޮތަށެވެ. މިކަން ބޮޑަށް ސާފުވާނީ މަތިން ފެންނަ ގޮތް ކުރަހާފައިވާ ކުރެހުމުންނެވެ. ތައްޓުގެ މޫނުމަތީގައި މަތިން ތިރިއަށް ކަޅުކުލައިގައި އެހުރި ބުރިވަރުތަކަކީ ފެންޑަރެވެ. ފެންޑަރަކީ، ލޯންޗު ކައިރިކުރުމުން އެއަށް ގެއްލުން ނުވާނޭ ފަދައިން، ރަބަރުން ހަދާފައި ހުންނަ ދިގު ހޮޅިތަކެއް ފަދަ އެއްޗެކެވެ. ތިރީގައި އެވަނީ، އެހުންނަ ގޮތެވެ. ހަރުފަތްތަކުގެ އުސްމިނުގައި ހުންނަނީ 7 އިންޗިއެވެ. ދިގުމިނުގައި 18 އިންޗިއެވެ. ސިޑިބަރިން ތިރިއަށް ފައިބަންޖެހޭ ޙާލަތްތަކުގައި ހިފަހައްޓާނޭ އަތްގަނޑެއް އެއް ފަރާތުގައި ވެއެވެ.

މަތީގައި އެވަނީ ފާލަން ދިގަށް މެދުން ފަޅައިލުމުން މަތީބައި ފެންނަ ގޮތެވެ. ފާހަގަ ކުރެއްވޭނޭ ފަދައިން ފާލަމުގެ ރީތިކަން ވަނީ، އޭގައިވާ ނަލަފިލާގެ ކުރެހުންތަކާއި މުޑީގެ ދެ ފަރާތުގައިވާ މަކުޑީގައެވެ. ލަކުޑި ތޭރިތައް ހުރުމަކީ ވެސް ރީތިވާ ކަމެކެވެ. ރަސްމީ ފާލަމުގައިވަނީ ފެހި ދަވާދު ލާފައެވެ. އެއީ ލަކުޑި ގިނަ ދުވަހަށް ރައްކާތެރިކުރުމުގެ ބޭނުމުގައި ކަމަށް ފެނެއެވެ. ކުރިން ދެންެނެވިހެން ނަލަފިލާގެ ވަނާތަކާއި މަކުޑީގެ ވަނާތައް ފޮޓޯތަކުން ސާފުނުވާތީ އެބައިވަނީ އަޅުގަނޑު އަމިއްލައަށް ކުރަހާފައެވެ. މި ފާލަން ހަދަން ބޭނުންވާ މީހުންނަށް މިއަށް ވުރެ ރީތި ގޮތަކަށް މިބައިތައް ފަރުމާކުރެވިދާނެއެވެ.

މަތީގައި އެވަނީ  ފާލަން ތައްޓުއާ ހިސާބުން ބުރިކޮށްލީމާ ފެންނަ ގޮތެވެ. މި ތަޞްވީރުން ދެ ހަރުފަތްބަރިއެއް ވާކަން ފާހަގަކުރެވެއެވެ. އެއީ އެއް ފަހަރާ ދެ އުޅަނދަށް ގާތް ކުރެވޭ ގޮތަށެވެ. ވަރަށް މަދު ފަހަރަކު ނޫނީ ހަރުފަތްތައް ބޭނުން ކުރާކަށް ނުޖެހޭނެއެވެ. އެއް ހަރުފަތްބަރި ތިރިކަން ފާހަގަ ކުރައްވާށެވެ.

ތަފްޞީލީ ކުރެހުންތައް

މަތީގައިވާ ތަޞްވީރުތަކުން، ތިޔަ ބޭފުޅުންނަށް ކުރީގެ ރަސްމީ ފާލަން ހުރިގޮތް ވަރަށް ބޮޑަށް އެނގިވަޑައިގަންނަވާނެއެވެ. މިފަދަ ބިނާތައް ކުރަަހާ ތަފްޞީލްކުރަނީ ކޮމްޕިއުޓަރ އެޕް އަކުންނެވެ. ތަފްޞީލްކުރެހުންތައް ހިމެނޭ ކޮމްޕިއުޓަރ ފައިލް މި މަޒުމޫނު ނިމޭތާގައި ޑައުންލޯޑް ކުރެވޭގޮތަށް ހިމެނީމެވެ. އެފަދަ ކުރެހުންތައް ”ކިޔަން“ ފަރިތަނޫން ފަރާތްތަކުން މި ފާލަން އަޅަން ބޭނުންވާ ތަފްޞީލްތައް މި މަޒުމޫނުގެ ތެރޭގައި ހިމަނާނަމެވެ.

ފާލަން އަޅާތަނާއި ފުންމިނާއި ދިގުމިން

ފާލަން އަޅަންވާނީ ގަދައަށް އޮއެ ނުދެމޭ ތަނެއްގައެވެ. ބޮޑަށް އޮއެ ދެމޭނަމަ، ފާލަމުގެ މުޑިތަކުގެ ބުޑުން ވެލި ކެހިގެން ފުންވަމުން ދާނެއެވެ. މިކަން ހައްލުކުރުމަށް މުޑިތަކުގެ ބުޑަށް ގައު އެޅިދާނެއެވެ.
ފާލަން ފަރުމާކޮށްފައިވަނީ 48 ފޫޓުގެ ދިގު ގަލްފްްކްރާފްޓް ލޯންޗެއް ގާތްކުރެވޭ ވަރަށެވެ. މިފަދަ ގަލްފްކްރާފްޓެއް ނުބީހޭނީ ފެންްވަރުގައި މަދުވެގެން ½2 ފޫޓު ހުންނަ ނަމައެވެ. މި މިންވަރުން ޢާއްމުކޮށް ބޭނުންކުރާ 36 ފޫޓުގެ ލޯންޗެއް ނުބީހޭނެއެވެ. ރައްކާތެރި ކަމާއި ރާޅު ބަނދަރުތެރޭގައި ހުންނާނެކަމަށް ބަލައި، އެންެމެ ދިޔަވަރު ހިކިއިރު، ފުންމިނުގައި މަދުވެގެން 4 ފޫޓު ހުރުން ރަނގަޅުވާނެއެވެ.

ފާލަމުގެ ދިގުމިން ބިނާވަނީ ތޮށިމަތިން ފެށިގެން މި ފުންމިން ލިބެން އޮތް ދުރުމިނުގެ މައްޗަށެވެ. ބޭނުން ނުވާ ވަރަށް ފާލަން ދިގުކުރުމަކީ އިތުރު ޚަރަދެކެވެ. ނަމަވެސް ރީތިކަމަށް ފެންނާނީ މަދުވެގެން ދިގުމިނުގައި 25 ފޫޓު ހުރިނަމައެވެ. މިހާރު ކުރަހާފައިވާ ގޮތުން ފާލަމުގެ ދިގުމިނަކީ ގާތްގަޑަކަށް 44 ފޫޓެވެ.

މުޑި ޖެހުން

މުޑިއަކަށް ޢާއްމުކޮށް ޖަހަނީ، އެ ފޫޓު ދިގު ހުރަހު ގައި (ޑައެމީޓަރު) ހުންނަ އެސްލޯން ހޮޅިއެވެ. ބޯމިން މުހިއްމެއް ނޫނެވެ. ހޮޅީގެ ދިގު ހުރަހުގައި (ޑައެމީޓަރ) ގައި 10 އިންޗި ހުންނަވަރަށް ހިމަވިއަސް، ފަރުވާލެއް ނެތެވެ. ހޮޅި ޖެހުމަށް ބޭނުންކުރަނީ، ޕްރެޝަރު ގަދަ ވައި ނުވަތަ ފެން ނުކުންނަ ހިމަ ހޮޅިއެކެވެ. މި ހޮޅި، އެސްލޯން ހޮޅީގެ ފުލަށް މަހައި ވައި ފޮނުވުމުން، ވެލިގަނޑު ބުރުއްސައިގެން ގޮސް ހޮޅި އަޑިއަށް ދެއެވެ. ވައިގެ ބަދަލުގައި ޕަންޕަކުން ލޮނު ފޮނުވިއަސް މިހެން ވެއެވެ. މިއާއެކު ހޮޅި ތިރިއަށް ދާނެއެވެ. ބައެއް މީހުން ހޮޅި ނުވަތަ ލޮނު ފޮނުވަނީ، ހޮޅީގެ މަތީކޮޅުގައި އެލްބޯއެއް ލައި ހިމަކޮށްގެންނެވެ. އެއީ މި ވީޑިއޯއިން ފެންނަ ފަދައިންނެވެ. https://www.youtube.com/watch?v=-QynWRc_U-k&t=648s

ފަޅުގައި ގެ އަަޅަން ރިސޯޓްތަކުގައި ބޭނުންކުރަނީ ކޮންކްރީޓް ވަށް ހޮޅިއެވެ. އަޑިއަށް ކޮއްޕަނީ ތުރުތުރުއަޅާ މެޝިނަކުންނެވެ. މި ވީޑިއޯއިން ފެންނަ ފަދައިންނެވެ. https://www.youtube.com/watch?v=tvCv4qeQvPI

މުޑި ޖަހާނީ ކިހާ އަޑިއަކަށް ހެއްޔެވެ؟ ރާއްޖޭ ގެ މާހައުލުގައި ހަތަރު ފޫޓު ބިންގަނޑުގެ އަޑިއަށް ޖެހިއަސް ރަނގަޅުވާނެއެވެ. ޢާއްމުކޮށް ބޭނުންކުރާ އުސޫލަކީ، ބިމުން މަތީގައި ހުންނަ ބަޔާއި އެއްވަރު ބައެއް އަޑިއަށް ކޮށްޕުމެވެ. ހޫނުކޮށްގެން ނުވަތަ ތެރަސްލައިގެން ހޮޅި ގުޅުވުމަކީ މައްސަލައެއް ނޫނެވެ.

ފުރަތަމަ ހޮޅި އޮލަނބަށް ޖެހުމަށްފަހު، ހޮޅީގެ ފުލުން ފެން ނުވަންނާނޭ ގޮތަށް ފޫޓެއް ހުންނަ ވަރަށް ކޮންކްރީޓް އަޅާނީއެވެ. ދެން ބައި އިންޗީގެ 4 ދަގަނޑު އެއް ފޫޓުން ރިންގު ބަނދެ ލުމަށް ފަހު، އެތެރެއަށް ކޮންކްރީޓް އަޅާނީއެވެ. ކަވަރުގައި ދެ އިންޗި ބަހައްޓަން ވާނެއެވެ. އެއިރުން ފުރަތަަމަ މުޑި ޖެހުނީއެވެ. ދެން ހުރި މުޑިތައް ޖެހުމުގެ ކުރިން، ނުވަތަ އެންމެ ފުރަތަމަ، ފަޅުގެ ލޮނުގަނޑުގެ މަތީގައި މުޑިތަކުގެ މަސައްކަތް ކުރަން ދޮޅުއިންޗީގެ ހޮޅިން ގިޔުގަނޑެއް ރާވާލައިގެން އަށްޓެއް ހަދަން ވާނެއެވެ. މި އަށި ހޮޅިތަކުގެ ކޮޅަށް ވުރެ 18 އިންޗި ތިރީގައި ހުރުމަކީ މުޑިތަކުގެ މަތިން ދުއްވާ ބެރިތައް ހަދަން ފަސޭހަވާނޭ ކަމެކެވެ. ހޮޅި ޖަހާއިރު ހުންނަންވާނީ މި ގިޔުގަނޑުގައި އެކި ފަރާތް ފަރާތަށް ހޮޅި ނުޖެހޭނެހެން ހައްޔަރު ކުރެވިފައެވެ. ދެން ކުރިން ބުނި ފަދައިން، ދަގަނޑު ލައި ކޮންކްރީޓް އަޅާނީއެވެ. ހުރިހާ މުޑިއެއް އެއްވަރު ކުރުމަށް ޚާއްޞަ ސަމާލުކަމެއް ދޭން ވާނެއެވެ. ހޮޅީގެ ދަގަނޑުތައް ހުންނަންވާނީ މަތީގައި ބެރި އެޅުމަށް އެއް ފޫޓަށް ނެރެފައެވެ. ގިނަ މުޑިތަކުގެ އުސްމިން އެއްވަރު ވިޔަސް ބައެއް މުޑިތަކުގެ އުސްމިން ކުރުވާނެއެވެ.

ތިރީގައި އެވަނީ ރަސްމީ ފާލަން ހެދުމަށް މުޑިތައް ޖަހަންވީ ގޮތެވެ.

މުޅި ފާލަމުގެ އޮނިގަނޑުގެ ފެންނަ ހުރިހާ ތަންތަން ހުންނާނީ ލަކުޑިންނެވެ. ތިރިއަށް ފައިބާ ހަރުފަތްތައް ކޮންކްރީޓުން ހެދިކަމުގައި ވިޔަސް، އޭގެ މަތީގައި ހުންނަންވާނީ ލަކުޑި ފިލާ އަޅައި ހައްޔަރުކޮށްފައެވެ. ބޭނުންނަމަ، މި ހަރުފަތްތަކާއި ބެރިތައް މުޅިން ލަކުޑިންވެސް ހެދިދާނެއެވެ. ކޮންކްރީޓުގެ ރަނގަޅު ކަމަކީ 50 އަހަރު ވަންދެން ހުންނަ ކަމެވެ. މުޅިން ލަކުޑި ނަމަ، ޖެހޭނީ ދޭތެރެ ދޭތެރެއިން މަރާމާތުކުރާށެވެ. އަޅުގަނޑު ކުރިން ދެންނެވިހެން، ހަރުފަތްތައް ހަދަން ބޭނުންކުރާ ދަގަނޑުގައި ހުންނަންވާނީ ދޯނި ބަންނަން ބޭނުންކުރާ ބާވަތުގެ ރެސިން ލާފައެވެ. ރާއްޖޭގައި ޢާއްމުކޮށް ކޮންކްރީޓް ކުރަން ބޭނުންކުރާ 1:2:3 ރޭޝިއޯގެ ކޮންކްރީޓަކީ ފެން ނުވަންނަ ކޮންކްރީޓެއް ނޫނެވެ. ފެން ނުވަންނަ ކޮންކްރީޓަށް ބޭނުން ކުރަނީ 1:1:2 ގެ ރޭޝިއޯއިން އެއްކޮށްފައި ހުންނަ ކޮންކްރީޓެވެ. ކޮންކްރީޓުގެ ކަވަރުގައި މަދުވެގެން 2 އިންޗި ހުންނަން ވާނެއެވެ. ކޮންކްރީޓް ރަނގަޅަށް ގަށައި ވައިބްރޭޓު ކުރަން ވާނެއެވެ. ހަރުފަތްތައް ހަދާނީ ބައި އިންޗީގެ ދަގަނޑުން 6 އިންޗި 6 އިންޗިން ގޮޅި ޖަހައިގެންނެވެ.

މެއްލަތައް ކޮންކްރީޓަށް ހަރުކުރުން

މެއްލަތަކުގެ ދިގުމިނަކީ 9 ފޫޓު 6 އިންޗިއެވެ. ފަރާތެއްގެ ހުންނަނީ މެދުވެގެން 5 އިންޗި ނުވަތަ 6 އިންޗިއެވެ. މި މެއްލަތައް ގަނޑު ލަކުޑިއަކަށް ވާކަށް ނުޖެހެއެވެ. ދޮޅު އިންޗީގެ ހަތަރު ފިލާ ވަށައިގެން ހަރުކޮށްގެން މެއްލަތައް ހެދިއަސް ވަރު ހުންނާނެއެވެ. ކޮންކްރީޓް ބެރިތަކުގައި މެއްލަ ނުވަތަ ލަކުޑި މުޑިތައް ހަރުކުރުމަށް ބޭނުންކުރާނީ އެސްއެސް ބުރެކެޓެވެ. އެންމެ ފަސޭހަވާނޭ ކަމަށް ފެންނަނީ އެސްއެސް ފްލެޓް ބާރ އިން ނުވަތަ އޭންގްލްއިން ބުރެކެޓް ހެދުމެވެ. މިކަމަށް ޚާއްޞަ ބުރެކެޓުވެސް ހުރެއެވެ. ބުރެކެޓު ހަރުކުރުމަށް ކުރިން އިސްކުރު ވަޅުލުމެއް ކޮންމެހެން ބޭނުމެއްނުވާނެއެވެ. ތޮރުފާފައި، ސިމެންތި އަޅައި އެސްއެސް 10 އެމްއެމް ގެ ރޮޑު ތޮރުފި ލޯވަޅަކަށް ލުމުން ވެސް ފުދޭނެއެވެ.

މެދުން ފަޅައިލީމާ ފާލަން ފެންނަ ގޮތް

ތައްޓު އެޅުމާއި ތޭރިތައް ހަރުކުރުން

ހަތަރެސްކަން ލަކުޑި މެއްލަ ނުވަތަ މުޑި ތަކުގެ ކޮންމެ ފަރާތެއްގައި މަދުވެގެން 5 އިންޗި ނުވަތަ 6 އިންޗި ހުންނަން ވާނެއެވެ. މި މެއްލަތައް ހުންނަންވާނީ ދާރަ ޖަހާފައެވެ. ދާރަޖަހާނީ ފަރާތެއް 10 ބައިކޮށް އެއްބައިގެ ފުންމިނަށެވެ. ދާރަޖަހަން ދަތިނަމަ، ރޫޓަރަކުން ފޮފަ ނެގިދާނެއެވެ. ތޭރިތައް ހަރުކުރުމަށް މެއްލަތައް ކޮންނަންޖެހޭ ތަންތަން ކުރިން ކޮންނަނިކޮށް ފަސޭހަވާނެއެވެ.

ތައްޓުއަޅަށް ބޭނުންކުރާ ފިލާތައް ނުވަތަ މަޅުތައް ހަރުކޮށްފައި އެވަނީ 2×4″ ގެ ލަކުޑި ފަތީގެ މަތީގައެވެ. މި ފަތިތައް ކޮންކްރީޓަށް ހަރުކުރަން އެންގްލް ބުރެކެޓް ބޭނުންކުރެވިދާނެއެވެ. ނުވަތަ ތޮރުފައި އެންކަރިން ބޯލްޓް އެޅިދާނެއެވެ. ލިބޭނަމަ ހަ އިންޗި ދޮޅު އިންޗީގެ މަޅުތައް އަތުރާނީ މި ފަތިތަކުގެ މަތީގައެވެ. މަޅުތައް ހަރުކުރާނީ ނުފެންނަ ގޮތަށް ކަތިކޮށް ލޯ މޮހޮރު ޖަހައެވެ. މޮހޮރު ނުވަތަ އިސްކުރު ހޯދަން އުނދަގޫނަމަ، އެސްއެސް ނަރު ނުވަތަ ބްރޭޒިން ރޮޑު ބުރިކޮށް ޖެހިދާނެއެވެ. ދެ މަޅުގަނޑުގެ ދޭތެރޭގައި މަދުވެގެން އެއް ސޫތުވަރުގެ ހުސްޖާގައެއް ދޫކުރަން ވާނެއެވެ.

މަތިވަޑާންގަނޑު ހެދުން

މި ފާލަމުގެ މަތިވަޑާންގަނޑު ހެދުމަށް ބޭނުންކޮށްފައިވަނީ ތިނެސްކަނަށް ހުންނަ ލަކުޑި ގިޔު ގަނޑެކެވެ. މީގެ އެންމެ ސާދާ ވައްތަރު ތިރީގައި އެވަނީއެވެ. ލަކުޑި ފަތިތަކުގެ ހުރިހާ ކޮޅުތައް ގުޅާފައިވަނީ ތޮރުފައި ޖަހައިފައިވާ އިސްކުރަކުން ކަމަށް ވިސްނަވާށެވެ. ލޯވަޅަށް ބާރު ނުވިއަސް، މި ތިނެސްކަން އޮންނާނީ އޮންނަ ގޮތަށެވެ. އެކި އަރިއަރިއަކަށް ނުދާނެއެވެ. މިއަށް އިނގިރޭސި ބަހުން ކިޔަނީ ޓްރަސް އެވެ. އެ ލަފުޒަކީ އިހުގައި ދަރުބޮނޑިއަށް ކިޔާ ނަމެކެވެ. މިއީ ޤުދްރަތީގޮތުން ވަރަށް ގަދަ އެއްޗެކެވެ. ބައިސްކަލުގެ މައިގަނޑަކީވެސް މިފަދަ ޓްރަސްއެކެވެ. ސައިކަލާއި ކާރުގައި ވެސް ޓްރަސް ހިމެނެއެވެ. ޖަޕާނު މީހުންނަށް ވެސް، އަދި ދިވެހީންނަށް ވެސް، ޓްރަސް ގެ ބާރު ދެނެގަނެވިފައިވާ ކަމަކަށް ނުބެލެވެއެވެ. ޓްރަސްގެ ބައެއް ފަތިތައް ފިތެއް ހިފާނެއެވެ. އަނެއް ބައި ފަތިތައް ދެމެން ހިފާނެއެވެ.

އިހުގައި މިފަދަ ގޮތަކަށް ދިވެހީން މަތިވަޑާންގަނޑު ހެދިއަސް އޭގެ ބައިތައް ގުޅާފައިވާ ގޮތުން އެއީ ޓްރަސް އަކަށް ނުވެއެވެ. ޓްރަސްއަކުން 100 ވަރަކަށް ފޫޓު ފުޅާ ތަނެއް ވެސް ހިޔާ ކުރެވިދާނެއެވެ. ތަންތަން ހިޔާ ކުރުމަށް ބޭނުންކުރާ އާދައިގެ ޓްރަހެއް ތިރީގައި އެވަނީއެވެ. މިފަދަ ޓްރަހަކުން 16 ފޫޓު ފުޅާ ތަނެއް ހިޔާ ކުރެވޭނެއެވެ. މިއަށް ވުރެ ފުޅާނަމަ، ޖެހޭނީ އިތުރު ތިނެސްކަން އުފެދޭ ގޮތަށް ގިޔުގަނޑުގައި އިތުރު ފަތިތައް ހިމަނާށެވެ. އަޅުގަނޑުމެންގެ ފާލަމުގެ ފުޅާމިނަކީ 14 ފޫޓު ކަމުންނާއި ކޮންމެ 4 ފޫޓަކުން ޓްރަސް އެއް އޮންނާތީ މި ޓްރަސް ބޭނުން ކުރެވޭނެއެވެ. ޓްރަސް ހެދުމަށް އަޅުގަނޑުމެން ބޭނުންކުރާނީ ″2×″4 ގެ ލަކުޑިއެވެ. ″1.25×″6 ގެ ލަކުޑި ފަތިވެސް ބޭނުން ކުރެވިދާނެއެވެ. ޓްރަސްގެ ކޮޅުތައް ހިފަހައްޓާފައިވަނީ ކަލާކުރި 10 އެމްއެމްގެ ރޮޑު ބުރިކޮށް ނަޓު އަޅައިގެންނެވެ. ކޮންމެ ގުޅުވުމެއްގައި ދެ ނަޓު ވެއެވެ. ކޮޅަށް މެދަށް ހުރި ކުރުކަންޏަށް ކިޔަނީ ތޮނަ އެވެ. އެ ކޮންމެހެން ގަދަވުމެއް ބޭނުމެއް ނުވެއެވެ. ޓްރަސް މަތިވަޑާމުގައި އެއަށް ހުންނާނީ ދެމޭ ބާރެކެވެ. ފިތޭ ބާރެއް ނޫނެވެ. ދިވެހި މަތިވަޑާމުގައި ތޮނައަށް ކުރާނީ ކުރުވާ ބާރެކެވެ.

ޙަޤީޤީ ޓްރަސްގެ އެންމެ މުހިއްމު ސިފައަކީ ފައިދޮށް، ރަހައަށް އޮންނަ ތާވަކަރާ ވަރަށް ރަނގަޅަށް ގުޅުވައިލުމެވެ. ދެ ފައިދޮށް އެންމެ މަތިން ޖެހޭ ފަތޮޅު ނުވަތަ ފައްތަރުވެސް ރަނގަޅަށް ގުޅުވުމެވެ. ވަހެއް ކޮންމެހެން ބޭނުމެއް ނުވެއެވެ. ފައިދޮށް މެއްލަ މަތީ ވަކަރަށް ނުވަތަ ފަތްފޮށި ވަކަރަށް ހަރުކުރަނީ ކާޅުއަނގަ ކައްވާދެއް ނުވަތަ ކެނޑުމެއް ބޭނުންކޮށްގެންނެވެ. ދިވެހީން ވަޑާންކުރާއިރު ހަދާގޮތަކީ ފައިދޮށް މާ ގަދައަށް ފާރުމަތީ ފަތްފޮށި ވަކަރަށް ހަރުކުރަނީއެވެ. އަޞްލު ގުޅުވަންޖެހެނީ ތާވަކަރަށެވެ. ކާޅު އަނގަ ކަނޑަނީ ފައިދޮށުގެ ތިންބައިކުޅަ އެއްބަޔަށް ވުރެ ފުން ނުވާ ވަރަށެވެ. ފައިދޮށް ފަތްފޮށި ވަކަރަށް ހަރުކުރަނީ އިސްކުރު ޖަހައެވެ. މި އިސްކުރު ދެ އަރިމަތިން ވެސް ޖަހައި އުޅެއެވެ.

ޓިނު ޖަހަން، ފައްޗަކަށް ބޭނުންކުރާނީ ދޮޅު އިންޗި ދެ އިންޗީގެ ފައްޗެވެ. ފާލަމުގެ ވަޑާމުގެ މަސައްކަތް ކުރަމުންދާން ޖެހޭނީ އެއްކޮޅުން ފެށިގެން ނިންމަމުންނެވެ. ލޮނު ބުރުއްސާ ހިސާބަކަށް ވާތީ ޓިނު އިސްކުރަން ބޭނުންކުރަންވާނީ އެސްއެސް އިސްކުރެވެ.

ފާލަމުގެ އޮޓޯކޭޑް ކުރެހުންތައް ޑައުންލޯޑު ކުރެއްވުމަށް މި ޖުމުލައަށް އޮބާލައްވާ!

ނިންމައިލުން

މަތީގައި އެ ދެންނެވުނީ ބޯދާ ރަސްމީ ފާލަން، ރާއްޖޭގެ ކޮންމެވެސް ރަށެއްގައި ހެދުމަށް ބޭނުންވާ ތަފްޞީލްތަކެވެ. ފާލަން ކުރުވި ވަރަކަށް ޚަރަދު ކުޑަވާނެއެވެ. އެންމެ ދިޔަވަރު ހިކިފައި އޮންނައިރު، ފަޅުގެ ފުންމިނުގައި ތިންފޫޓު ބައި ވަރު ހުންނަނަމަ، ފާލަން މާ ދިގުކުރުމުގެ ބޭނުމެއް ނެތެވެ. އަޅުގަނޑުމެން ކުޑައިރު، މާލޭގެ ގިނަ ގޭގެއަށް ހުންނަނީ އިލެކްޓްރިކް ލާފައެއް ނޫނެވެ. އެހެންކަމުން، ގާޒީކަން ފަދަ އެކި ކޯސްތައް ކިޔަވަމުންދާ މީހުން ފާލަމުގެ ބޮކީގެ އަލީގައި ރޭގަނޑު ފިލާވަޅުދަސްކުރަން ތިބެއެވެ.

މާލޭގެ ކުރިން ހުރި ރަސްމީ ފާލަމަށް ވުރެ ހުޅުލޭގައި ހަދާފައި ހުރި ރަސްމީ ފާލަން މާ ރީއްޗެވެ. މި ފާލަމުގެ ފޮޓޯ ތިރީގައި އެވަނީއެވެ. މި ފާލަން އަދިވެސް އެބަހުއްޓެވެ.

ހުޅުލޭ ފާލަން ހަދާފައިވާ އުސޫލު، ރާއްޖެތެރޭގެ ކޮންމެވެސް ރަށެއްގެ ފާލަން ހަދަން ވަރަށް ރަނގަޅުވާނެއެވެ. މި ފާލަމުން އިލްހާމު ލިބިގެން އަޅުގަނޑަށް ފެންނަ ގޮތުގައި ފާލަން ހަދަންވީ އެއްގޮތަކީ ފަޅުގެ ފާލަން ހަދާ ހިސާބުގައި އަޅަންވީ ހަތަރު ފުރާޅު ލީ ފަރާތެއްގައި 25 ވަރަކަށް ފޫޓު ހުންނަ ގެއެކެވެ. މި ގެ ހިޔާކުރާނީ އިހުގެ މުހިއްމު ތަންތަން ފަދައިން މަތީ ބައި އުސްކޮށް ދެ ވަރަކަށް ފުރާޅުބައެއްލައި ފެންފަހި ކޮށެވެ. ތިން ފަރާތުން ލާންޗު ޖައްސަށް ފަސް ފޫޓު ފުޅާ ޑެކެއް އޮންނަންވާނެއެވެ. މި ޑެކަށް ނުކުމެވޭނީ ވަށައިގެން ޖަހާފައިވާ ތިރި ފަޑިތަކަކުން ކަނޑާފައިވާ ދޮރަކުންނެވެ. މިގެއަށް އާދެވޭނީ އެއްގަމުން 6 ފޫޓު ފުޅާ ހިޔާކުރި ފާލަން ބުރިއަކުންނެވެ. މިގޮތުގެ މަންފާއަކީ: (1) އެއް ފަހަރާ ތިން އުޅަނދަށް ކައިރި ކުރެވުން، (2) އެތައް ބަޔަކު ފާލަމުން ލަފާފުރާ މީހުންނާ ސަލާންގަލާން ކުރަން ފާލަމުގައި ތިބެވުން، (3) ފާލަމުގައި މުނި ފޫހިވިލުވައިލަން، މީހުންނާ ބައްދަލުކޮށް ވާހަކަ ދައްކަން ތިބެވުން މިއެވެ. އެހެނީ ފާލަން ފަދަ އަގުބޮޑު އެއްޗެއް ހަދާއިރު ތަފާތު ބޭނުން އެތަނުގައި ކުރެވުމަކީ ވަރަށް މަންފާ ބޮޑު ކަމަކަށް ވާނެއެވެ. މިހާރު ހަދާހެން ފާލަމުގެ ހުރިހާ ހިސާބެއް އެއް ފުޅާމިނެއްގައި ހެދުމަކީ އެހާ ބޭނުންތެރިކަމެއް ހެނެއް ހިޔެއް ނުވެއެވެ. މިފަދަ ފާލަމެއްގެ ކުރެހުން ފަހުން އަދި ހުށަހަޅާ ނަމެވެ. އިންޝާﷲ!

ބިނާވެއްޓާ ބެހޭ އެހެން މަޒުމޫނުތައް ކިޔުއްވަން އޮބާލައްވާ!