މީގެ ދުވަސްކޮޅެއްގެ ކުރިން، ލިޔަމުން ގެންދިޔަ މަޒުމޫނަކަށް އިންސާނާގެލޯ މަރާލުމުން މަތިން ތިރިއަށް ފައިބާ އަދި ތިރިން މައްޗަށް އަރާ ދޮރުފަތެއް ފަދަ ހަންކޮޅަށް ކިޔާ ދިވެހި ނަން ބޭނުންވިއެވެ. ރާއްޖޭގެ އެކި ހިސާބުގެ މީހުންގެ ކައިރީގައި އަހައިގެން ވެސް މިއަށް ކިޔާ ނަމެއް ނުއެނގުނެވެ. ގިނަމީހުން ހީކުރަނީ އެއީ އެސްފިޔަ ކަމަށެވެ. ނަމަވެސް އެސް ފިޔައަކީ، އޭގެ އަރިމަތީގައި (ރަވައިގައި) ފަޅާފައި ހުންނަ އިސްތައްޓެވެ. އިނގިރޭސި ބަހުން މި ބަޔަށް ކިޔަނީ އައި ލިޑް (eye-lid) އެވެ. އެ ނަމުގެ ލަފުޒީ މާނައަކީ ލޮލުގެ މަތިގަނޑެވެ. ދަޅެއްގައި މަތި ޖެހުމުން ވެސް އެތެރެ ފޮރުވޭ ގޮތް ވާތީ މި ގޮތަށް ނަން ކިޔަނީ ކަމަށް ލަފާ ކުރެވެއެވެ.  ޔަގީންވީ މިތަނަށްކިޔާ ދިވެހި ނަމެއް އޮންނާނޭ ކަމެވެ.

މިހެން ކަންވެފައި ވަނިކޮށް، ޙަސަން އަޙްމަދު މަނިކު ނެރުއްވި މަޖައްލާއެއްގައި، މިބަޔަށް ކިޔާ ނަން ލިޔުއްވާފައިވަނިކޮށް ފެނިއްޖެއެވެ. އެއީ 17 އޮކްޓޯބަރ 1989 ގައި ”ވަނަވަރު“ ކިޔާ މަޖައްލާއެއްގެ 4 ވަނަ ޢަދަދުގައެވެ. މި ލިޔުއްވުމުގައި ދިވެހި ބޭސްވެރިކަމުގައި ބޭނުން ކުރާ ބޭސްތަކުގެ އިނގިރޭސި ނަންތައް ވެސް ލިޔުއްވާފައި ވެއެވެ. މަޖައްލާ ވަނީ އިނގިރޭސި ބަހުންނެވެ. އެ މަޖައްލާގެ އެ ޢަދަދުގައި ގިނައިން ވަނީ ބޭސްތަކުގެ އިނގިރޭސި ނަންތަކެވެ. ދިވެހި ބޭސްވެރިކަމުގެ ކުރު ތާރީޚެއްވެސް ލިޔުއްވާފައި ވެއެވެ

ދިވެހި ބަހުން ހަށިގަނޑުގެ ހުރިހާ ތަނަކަށް ކިޔާ ނަންތައް ވެއެވެ. ފަހަކަށް އައިސް މި ނަންތައް ގެއްލި، ހަށިގަނޑުގެ ތަނެއް ސިފަކުރާ ކުރުމަކީ ލަފުޒުކަމަށް ބެލިފައި ވެއެވެ. މިގޮތުން ކަށިމަތި، އަތުގެ ބަނޑުފުށް ފަދަ ލަފުޒުތައް ބޭނުން ކުަރަމުން ގޮސްފައި ވެއެވެ. ސިފަކޮށްދޭ ޢިބާރާތްއް ލަފުޒެއްގެ ގޮތުގައި ބޭނުންކުރަނީއެވެ. ތިރީގައި އެވަނީ ހަށިގަނޑުގެ ބައެއް ތަންތަނަށް ކިޔާ ދިވެހި ނަންތަކެވެ. މިއިން ބައެއް ނަންތައް ބަސްފޮތުގައި ވެއެވެ.

އަޅުގަނޑަށް ލަފާކުރެވޭ ގޮތުން ހަށިގަނޑާ ދޭތެރޭ ޝައުޤުވެރިވާ މީހުން، ދިވެހި ބަހުން ހަށިގަނޑުގެ ހުރިހާ ތަނަކަށް ކިޔާ ދިވެހި ލަފުޒުތައް އެއްކުރުމަކީ ވަރަށް ބޭނުންތެރި ކަމެކެވެ. އައު ލަފުޒުތައް ޢާއްމުވާނީ، ލިޔުންތެރިން، ވާހަކަތަކާއި ޚަބަރުތަކުގައި، އަދި ޢާއްމު ވާހަކަ ދެއްކުމުގައި ލަފުޒުތައް ބޭނުން ކުރުމުންނެވެ.