1970 ގެ އަހަރުތަކުގައި، މާލޭގެ ކަނޑިންމަގެ ދެފައިކަށީގައި، ދަތުރުކުރާ މީހުންގެ ފަސޭހައަކަށް، ބޮޑު ތަނބެއްގެ މަތީގައި ބައްތިއެއް ބަހައްޓާފައި ހުއްޓެވެ. މިއީ ކަނޑިންމަ ފާހަގަ ކުރަން ޖަހާފައިވާ ބައްތިއެވެ. މިހާރު ފައިކަށީގައި ހުރި ބައްތިއަށް ވުރެ ކުރީގެ ބައްތި މާ ބޮޑަށް ރީތިވާނެއެވެ. ތާރީޚާއި ސަގާފަތަށް ލޯބިކުރާ ބަޔަކު، މީގެ ބައްތިއެއް ރާއްޖޭތެރޭގެ ރަށެއްގެ ނެރުގައި ހަދަން ބޭނުން ވެދާނެއެވެ. އާސާރީ ތަކެތި ފެނުމަކީ، ހިތްހަމަ ޖެހުން ލިބި،  މާޒީއާ އިންސާނާ ގުޅުވާ ދޭނޭ ކަމެކެވެ. ރަށްވެރިކަން މަތިވާނޭ ކަމެކެވެ. ބަނދަރުމަތި ތަހުޒީބުވާނޭ ކަމެއް މެއެވެ. މާލޭގެ ބޭރު ތޮށި ދާދި އަވަހަށް  މަރާމާތުކުރާނެކަމަށް މި ޚަބަރު ބުނެއެވެ. އެހެންކަމުން މިއީ މާލޭގެކަމާ ބެހޭ ފަރާތްތަކުންވެސް ވިސްނަން ރަނގަޅު ކަމެކެވެ.

މި މަޒުމޫނުގައި މި ގެނެސްދެނީ، ކުރިން ބައްތި ހުރިގޮތާ ބެހޭ މަޢުލޫމާތާއި އެ ފަރުމާގެ ފުށަތުކަތަ އާއި ހަދާނޭ ގޮތުގެ ތަފްޞީލްތަކެވެ. އަޅުގަނޑުގެ މަޤްޞަދަކީ، މި ވާހަކައިގެ ތެރެއަށް ކިޔުންތެރީންނަށް ފައިދާކުރާ ނޭ ގުޅުން ހުރި އެހެން މަޢުލޫމާތުތަކެއް ގަތަމުން، އެކަން ކުރާނޭ ގޮތް ކިޔައިދިނުމެވެ.

މާޒީއަށް ބަލައިލުމެއް

ކަނޑިންމަ ކިޔަނީ، ބޮޑެތި ފުޅާ ނެރަށެވެ. ޤުދްރަތީ ގޮތުން ތޮށިން ކެނޑިފައި ހުންނަ ބޮޑެތި ތަނަވަސް ތަންތަނަށްވެސް މިހެން ކިޔައެވެ. ފަޅުފަޅުން ނުކުތުމަށާއި ވަނުމަށް ހަދައިފައި ހުންނަ ނެރުގެ އެއްފަރާތުގެ ތޮށިގަނޑަކީ ފައިކައްޓެވެ. ކޮންމެ ނެރެއްގައި ދެ ފައިކަށި ހުންނާނެއެވެ. މީގެ 90 ވަރަކަށް އަހަރުގެ ކުރިން މާލޭގެ ކަނޑިންމަ ހުރީ، އެހެން ރަށްރަށުގައި ވެސް ކަނޑިންމަ އެ ދުވަސްވަރު ހުރިގޮތަށް ހިރިގަލުން ތޮށިލާފައެވެ. މިކަން އަޅުގަނޑު މެންނަށް އެނގެނީ އިހުގެ ފޮޓޯތަކުންނެވެ. އެ ފޮޓޯތައް ބެއްލެވުމުން، މާލޭގެ ކަނޑިންމައާއި އެހެން ރަށްރަށުގެ ކަނޑިންމައާ މާ ބޮޑު ތަފާތެއް ނެތްކަން ޔަޤީން ކުރެއްވޭނެއެވެ.

މަތީގައި އެ ވަނީ 90 ވަރަކަށް އަހަރުގެ ކުރީގެ ދެ ފޮޓޯކަމަށް ބެލެވެއެވެ. ފުރަތަމަ ފޮޓޯގައި އެ ފެންނަނީ މާލޭގެ ބަނދަރުގެ މަގަތު ތޮށިގަނޑުގެ ބަޔަކާއި ކަނޑިންމައެވެ.ކަނޑިންމައިގެ ދެ ފައިކައްޓަކީ މަތި އެއްވަރުކޮށްފައިވާ ގައު ފުންޏެއްގެ ގޮތަށް ސިފަކުރެވެއެވެ. މި ފޮޓޯގައި ޖައްރާފާ ނަމަކަށް ކިޔާ ކޮންނަ ބޯޓު ފެނެއެވެ. މި ޖައްރާފާއަކީ، ޝަމްސުއްދީނު ރަސްކަމުގައި މާލެ ގެނެވުނު ބޯޓެކެވެ. މި ބޯޓު ދުން ހަނދާން އަޅުގަނޑު ވެއެވެ. އެއީ މާލޭގައި ހިންގި އެންމެ ފުރަތަމަ ިއިންޖީނު ކަމަށް ބެލެއެވެ. މި އިންޖީނު އިސްޓާޓުކުރަނީ ފަޓާހެއް ކަހަލަ އެއްޗެއް ގޮއްވާލައިގެންނެވެ.  ދެވަނަ ފޮޓޯއިން އެ ފެންނަނީ ވެސް މާލޭ ބަނދަރުގެ ކަނޑިންމައެވެ. ފައިކައްޓަށް މާބޮޑު ކުރިއެރުމެއް އައިސްފައެއް ނުވެއެވެ. މި ފޮޓޯގައި މަނަވަރާއި ޖެހިގެން އެ ހުރި ބަނގަލާ ބޯޓު ފަހަރަކީ، އެ ދުވަސްވަރު ރާއްޖޭގެ ބޭރުގެ ވިޔަފާރި ކޮންޓްރޯލްކޮށްގެން އުޅުނު ވޯރާ ވިޔަފާރިވެރީންގެ އުޅަނދެވެ. މި މީހުން، ރާއްޖޭގެ ހުރިހާ ސިޔާސީން އެމީހުންގެ ޖީބަށް ލައިގެން އުޅުނު ފަދައެވެ.

ކަނޑިންމަ ނުވަތަ ނެރު ބައްތީގެ ފަރުމާ

ނެރު ބައްތީގެ ފަރުމާ އަކީ ގިނަ ބަޔަކަށް ރީތި އެއްޗަކަށް ވާނެއެވެ. އެއީ އޭގެ ތަނާސަބު ނުވަތަ ޕްރޮޕޯޝަންތައް ރީތިކަމުންނެވެ. މި ދެންނެވީ ދިގުމިނުގެ ނިސްބަތުން ފަލަމިން، ނުވަތަ އެހެން މިނެއްގެ ނިސްބަތުން އެ ނޫން މިންތައް ހިތްގައިމު މިންވަރަކަށް ހުރުމުންނެވެ.  މިކަމުން ދޭހަވަނީ، މި ބައްތި ފަރުމާކޮށްފައިވަނީ ރީތިހުތުރު އެނގޭ ފަންނާނެއްކަމެވެ. މި ބައްތީގެ ވަނާތަކާއި މިންތައް ފަރުމާކުރި މީހަކު، މިކަންކޮށްފައި އެވަނީ ދުނިޔޭގެ އެކި ޤައުމުތަކުގައި ހުންނަ ”ލައިޓްހައުސް“ ތަކުން އިލްހާމު ލިބިގެންކަމަށް އަޅުގަނޑަށް ލަފާކުރެވެއެވެ. ލައިޓްހައުސް އަށް ދިވެހިބަހުން ކިޔަނީ ފަނާރު އެވެ. ފަނާރު ކިޔަނީ ކަނޑު ދަތުރުކުރާ މީހުން ނުރައްކަލުން ސަލާމަތް ކުރުމަށް ޓަކައި އުސް ހަރެއް ހަދައި އެ ހަރުގައި ދުރަށް އަލިފޮނުވާން ހުންނަ ބާރުގަދަ ބައްތިއަށެވެ. ތެދުތެދަށް ބުނަނީނަމަ، މި މި ބައްތި ހުންނަ ހަރާއި ބައްތިއަށް ޖުމުލަގޮތެއްގައި ކިޔަނީ ފަނާރެވެ. ފަނާރަކީ ޢަރަބި ލަފުޒެކެވެ. މި ލަފުޒު މިހާރު ވަނީ ދިވެހިވެފައެވެ. އެންމެ ފުރަތަމަ އަޅުގަނޑު މި ގެނެސްދެނީ މާލޭގައި ކުރިން ހުރި ނެރު ބައްތީގެ ފޮޓޯއެވެ.

 

ދެން ތިރީގައިވާ ފަނާރުތަކުގެ ފޮޓޯތަކަށް ބައްލަވާށެވެ. ޤަބޫލުފުޅު ކުރެއްވެން އުޅުއްވޭނީ، ނެރުބައްތީގެ ފަރުމާއަކީ ފަނާރުކަމެވެ.

މި ފޮޓޯތައް ފެނިވަޑައިގަތުމުން، މި ބައްޓަމަށް ހުރި ފަނާރެއް ރާއްޖޭގައި ނެތީ ކީއްވެގެން ބާވައޭ ތިޔަ ބޭފުޅުންގެ ހިތްޕުޅަށް އަރާވަޑައިގަންނަވާނެއެވެ. މާތުރަ، ކޮންމެވެސް ހިސާބެއްގައި އެލުމިނިއަމް ހަރެއްގައި ބޮކި ހަރުކޮށްފައިވާ ހުތުރު ފަނާރެއް ވެއެވެ. ނަމަވެސް، ފަނާރަކަށްވާ ކަހަލަ ފަނާރެއް ނުވެއެވެ. މިކަމުގެ ސަބަބަކީ ރާއްޖޭގައި މިފަދަ ބިނާއެއްކުރުމަށް އެކަށީގެންވާ ހިލަ ނެތުމެވެ. މިހާރު ބޭނުންކުރާ ސިމެންތި ރާއްޖެއަށް ގެންނަންފެށީ ވިހި ވަނަ ޤަރުނުގެ މެދަކާ ހިސާބުން ކަމަށް ވާކަމެވެ. އެހެންނޫނީ ނުހުންނަންވީ ކީއްވެގެން ތޯއެވެ؟ ދިވެހީންނަށް ވުރެ ކަނޑުމަތީގައި ގިނަ އިރު އުޅެނީ ސަފުން އެހެން ކޮން ބައެއް ތޯއެވެ؟

ނެރުބައްތި ފަރުމާކޮށް ބިނާކުރާނޭ ގޮތް

ނެރު ބައްތި ނުވަތަ ފަނާރުގެ މިންތައް

މި މަޒުމޫނު ލިޔުމުގެ ބޭނުމަކީ، މާލޭގައި އެތައް އަހަރެއް ވަންދެން ހުރި ސަގާފީ ކަނޑިއްމަ ބައްތި ނުވަތަ ނެރުބައްތި، ރާއްޖޭގެ ކޮންމެވެސް ރަށެއްގައި ހެދުމަށް އެހީތެރިވުމެވެ. ފަނާރެއް ގޮތަށް ހަދާފައި ހުރި ނެރު ބައްތި ހަދާނޭގޮތް ކިޔައިދިނުމެވެ. އެންމެ ފުރަތަމަ އަޅުގަނޑުމެން ޖެހޭނީ، މާލޭގެ ކަނޑިންމައިގައި ހުރި ބައްތީގެ މިންތަން ދެނެގަންނާށެވެ. މިކަން ކުރަން އަޅުގަނޑު ބޭނުންކުރީ ހިސާބެވެ. އެ ބައްތި ހުރި ހިސާބުގައި މީހަކު ހުރި ފޮޓޯއެއް ލިބުމުން، މީހާގެ އިސްކޮޅު ގާތްގަޑަކަށް އެނގޭތީ، އެހެން ހުރިހާ މިނެއް އަޅުގަނޑުމެންނަށް ހޯދޭނެއެވެ. ދެން ފޮޓޯއިން ފެންނަ ގޮތަށް ބައްތި ނުވަތަ ފަނާރު ކުރެހިދާނެއެވެ. ތިރީގައި އެވަނީ މި ފަނާރުގެ ކުރެހުމެވެ.

ހަދާނޭ ގޮތް

މަތީގައިވާ ކުރެހުމުން ފާހަގަކުރެއްވޭނޭ ފަދައިން، ފަނާރުގެ މެދުބައި މައްޗަށް ހިމައެވެ. ތިރި ހުންނަނީ ވަރަށް ކުޑަކޮށް ފަލަކޮށެވެ. ކުރެހުމާ އަޞްލު ފޮޓޯއާ އަޅާބެއްލެވުމުން ފާހަގަ ކުރެއްވޭނީ ކަނޑިންމަ ބައްތި ނުވަތަ ފަނާރު އާ މި ކުރެހުން ވަރަށް ވައްތަރު ކަމެވެ. ނަމަވެސް، ބުޑުގައި ދެ ހަރުފަތެއް ވާކަން ފާހަގަ ކުރެއްވޭނެއެވެ. މިއީ އަޞްލު ފަނާރުގައިވާ ބުޑަށް ވުރެ ތަންކޮޅެއް އުސް ބޮޑު ބުޑެކެވެ. ރާއްޖޭގައި މި ފަނާރު ހަދާއިރު، ހަދަން ޖެހޭނީ، ބޮޑު ހިލަފަދަ އެއްޗަކުން ހަދާފައިވާ ތޮށިގަނޑެއްގެ މަތީގައެވެ. ފަނާރުގެ ތަރަހަ ނުވަތަ ބިންގަލަކަށް ވާނީ މި ބުޑެވެ. މި ބުޑުގައި، ބާރަށް ވައިޖެހޭއިރު ފަނާރު ފުރޮޅާނުލާވަރު ކުރަން ޖެހޭތީ ބޮޑުކުރަން ޖެހުނީއެވެ. މި ބާވަތުގެ ބުޑަށް ކިޔަނީ މާސް ކޮންކްރީޓް ބުޑެވެ. މިއަށް އެއްވެސް ގޮތަކަށް ދަގަނޑު ލެއްވުމަކީ މުހިއްމު ކަމެއް ނޫނެވެ. ކޮންކްރީޓް އަޅާނީ، ތޮށިގަނޑުގައިވާ ބާތަކުގެ ތެރެއިން ކޮންކްރީޓް ފައިބައިގެން ނުދާނޭހެން ގޯނި ނުވަތަ އެފަދަ އެއްޗެއް އަޅައެވެ. ބިންގާ އަޅާއިރު، ވަށްކޮށް ޓިނުން ނުވަތަ ތުނި ޕްލައިވުޑުން ބުރެއްހެން އޮންނަ ދެ ތައްގަނޑު ބޭނުންކުރަން ޖެހޭނެއެވެ. އަދި މެދުގައި ދޮޅު އިންޗީގެ ހޮޅިއެއް ޖަހަން ޖެހޭނެއެވެ. އެއީ ވަށައިގެން ފާރު ރާނާއިރު ވަށްކޮށް ރާނަން ބޭނުންވާ މިންބަލަންށެވެ. މި ހޮޅި ޖަހަންޖެހޭނީ ފަހުން ނެގޭގޮތަށެވެ. ހޮޅީގައި ފާހަގަކޮށްފައިވާ އުސްމިނުގައި ބުޑުގެ މަތިން ފެށިގެން ދިހަފޫޓު ބައިގައި، ޑައެމީޓަރު (ދިގުހުރަސް) ގައި 36 އިންޗި ހުންނަ ދަގަނޑު ބުރެއް، ރޭނުމުގެ ބޭނުމަށް ވެލްޑް ކުރަންވާނެއެވެ. ކޮންކްރީޓް ދަގަނޑު ނަރެއް ވަށްކޮށްލަބައި ވެލްޑް ކުރެވިދާނެއެވެ. ހޮޅި ޖަހަން ޖެހޭނީ ރަހަ ފަތި ބޭނުންކޮށްގެން ނުވަތަ އޮލަނބު ބޭނުންކޮށްގެން ވަރަށް ތެދަށެވެ. ލަނބުރާން ޖަހައިގެން ފަހުން ތެދުވެސް ކުރެވިދާނެއެވެ.

ފީފާ ރާނާނޭ ގޮތް

ފަނާރުގެ ބިންގަލުން ފެށިގެން މައްޗަށް ހުންނަ ދިހަފޫޓު ބައިގެ ތަނބެއް ފަދަ ވަށް ބަޔަށް އިނގިރޭސި ބަހުން ކިޔަނީ ”ބެރަލް“ އެވެ. ބެރަލްގެ މާނައަކީ ފީފާއެވެ. މި ބަޔަށް ބެރަލް ކިޔާ ސަބަބަކީ، ފީފާއެއް ހެން މި ބައި ހުންނާތީއެވެ. ފަނާރުގެ މި ބައި ރޭނުމަކީ މި މަސައްކަތުގެ އެންމެ އުނދަގޫ ކަމެވެ. ކުރީ ޒަމާންތަކުގައި ތެޅި ހިރިގަލުން ވަޅު ރާނާގޮތަށް މިބައި ރޭނިދާނެއެވެ. ނަމަވެސް، ވަޅެއްގެ ފަލަމިން މައްޗާއި ތިރި އެއްވަރު ވާނެއެވެ. ފަނާރުގެ ފީފާބައިގެ މަތި، ތިރިއާ އަޅާބަލާއިރު 6 ހިމައެވެ. ތިރީގެ ޑައެމީޓަރަކީ 42 އިންޗި ކަމުގައި ވިޔަސް، މަތީބައިގެ ޑައެމީޓަރަކީ 36 އިންޗިއެވެ. ފަނާރު ރީތިކަމަށް ދައްކާ އެއް ސަބަބަކީ ތިރިން ފެށިގެން މައްޗަށް ބަލާއިރު ކުޑަކޮށް މަތި ހިމަކަމަށް ފެންނާތީއެވެ.

މިބައި ރާނަށް ފަސޭހަވާނީ، ދުވާރުގައި ހުންނަ ފަދަ ކުދި އެޅިގަލެވެ. މިފަދަ ގަލުގެ ސައިޒަކީ އިންޗިން 2 ×  3 × 7  އެވެ. މި ބާވަތުގެ ގައު ލިބެން ނެތްނަމަ، ކުޑަ ތައްގަނޑެއް ހަދައިގެން އަމިއްލައަށް ގައު އެޅިދާނެއެވެ. އާދައިގެ 4 އިންޗީގެ އެޅިގަލުން ރާނާނަމަ، ރަނގަޅުވާނީ ވަށްކޮށް ރާނަން ފަސޭހައަށް ގައުތައް ކޮޅަށް ބަހައްޓައިގެން ރޭނިއްޔާއެވެ. ރޭނުމަށް ހަދާނެ ގޮތަކީ، މެދުގައިވާ ހޮޅި ވަށައިގެން ނަނުބުރިއެއް އައްސައި، އިހުގައި ވަޅުރާނާގޮތަށް،  ޑައެމީޓަރުގައި 42 އިންޗި ހުންނަ ވަށް ރޮނގެއް ދަމައި މި ރޮނގުގައި،  ވަށައިގެން 4 އިންޗި ދުރުމިނުގައި ކޮންކްރީޓު މޮހޮރު ޖަހާނީއެވެ. ނޫނީ 42 އިންޗި ޑައެމީޓަރުގައި ހުންނަ ވަށް ދަގަނޑު ބުރެއް ނުވަތަ ބަންދެއް ތިރީގައި ހަރުކުރާނީއެވެ. ފީފާގެ ބައްޓަން ގެންނަނީ މެދަށް ޖެހި ހޮޅީގެ މަތީގައިވާ ވަށްބުރުން ތެދަށް ތަރަހައިގައި ޖެހި މޮހޮރަށް ނުވަތަ ތަރަހައިގެ މަތީގައިވާ ވަށް ދަގަނޑަށް ދަމާ ކަރާކަންވާރުންނެވެ. ފީފާބައި ރާނާއިރު، މިބައިގެ ތެރެއަށް ވަންނަން ހަނިވެގެން 20 އިންޗި ފުޅާ، ތިރިވެގެން 48 އިންޗި ހުންނަ ވަރުގެ ދޮރެއް ތޮށިގަނޑާވީ ފަރާތުގައި ހިމަނަން ވާނެއެވެ. ފީފާބައި ދިހަފޫޓު ބަޔަށް ރޭނުމަށް ފަހު ދެން މައްޗަށް ހުރި ދެ ފޫޓު ހުންނަނީ މައްޗާއި ތިރި އެއްވަރަށް ފީފާއެއްގެ ގޮތަށެވެ. މި ދެ ފޫޓުގެ އުސްމިނުގެ ތެރޭގައި، މަތީގައި ދެއިންޗީގެ ބޯ ވަށް ކޮންކްރީޓް ގަލެއް ވެއެވެ. ފަނާރުގެ ބައްތި ހުންނަނީ މިގަލުގައި ހަރުކޮށްފައެވެ. އެހެންކަމުން ކަރަންޓު ނަރު ގެންދިއުމަށް މި ގަލުގެ މެދުގައި ދެ އިންޗީގެ ލޯވަޅެއް ހުންނަން ވާނެއެވެ. ފީފާގެ ދިހަ ފޫޓުބައިގެ މަތިން ބޭރުގައި ތިން ބަންދެން ގޮތަށް ފޮފަނަގާފައި ވެއެވެ. މިއީ ސިމެންތި ޖަހާއިރު ކޮށްފައިވާ ކަމެކެވެ. މި ގޮތަށް ފޮފަ ނަގަނީ ޓިނުކޮޅެއް ބޭނުންވާ ބައްޓަމަށް ކަފައި، ފިލާކޮޅެއްގައި ހަރުކޮށް، މި ޖުމުލައަށް ފިތާލީމާ ފެންނަ ވީޑިއޯގެ ދެ މިނެއްޓު ބައިގެ ފަހުން ހަދަމުންދާ ގޮތަށެވެ.

ދިއްލޭބައި ހެދުން

ބައްތި ހަރުކުރާ ބައި ހެދުމަށް ބޭނުންކުރަން އެންމެ ރަނގަޅުވާނީ އެލުމިނިއަމް ކަމަށް ލަފާކުރެވެއެވެ. ރާއްޖޭގައި ޢާއްމުކޮށް ހުންނަ އެސްއެސް އަކީ 304 މަރުކާގެ އެއްޗިއްސެވެ. މިއީ ލޮނު ޖެހުމުން ދަބަރު ޖަހާނޭ ބާވަތެކެވެ. ލޮނުޖެހޭ ހިސާބުގައި ބޭނުންކުރަނީ 316 މަރުކާގެ އެސްއެސް އެވެ. މި ބާވަތް ވިއްކަން ހުންނަނީ ވަރަށް މަދުންނެވެ. އެލުމިނިއަމުން ހަދާނަމަ، އެ ވެލްޑް ކުރެވޭނީ ޚާއްޞަ ބާވަތެއްގެ ވެލްޑިން ރޮޑެއް ބޭނުންކޮށްގެންނެވެ. ދެން އޮތް އަނެއް ގޮތަކީ ރަތުލޯއިން ހެދުމެވެ. މިއީ ފަސޭހައިން ބެއްދޭނޭ އެއްޗެކެވެ. އެންމެ އަގުހެޔޮ ވާނެކަމަށް ފެންނަނީ ލަކުޑިން ހަދައި، ބޭރުގައި ތުނިކޮށް ފައިބަރު ޖެހުމެވެ. އަލި ބޭރަށް ނުކުންނަ ކުޑަދޮރުތަކަށް ބިއްލޫރި ކަފައި، ސިލިކޯންލައި ތަތް ކުރެވިދާނެއެވެ. މި ބައްތިބައި މަތީގައިވާ ގަލުގައި ހަރުކުރަން ތިރީކޮޅުގައި ބުރެކެޓު ހުންނަން ޖެހޭނެއެވެ.

ޙަޤީޤީ ފަނާރެއް ރާއްޖޭގެ ރަށެއްގައި ހެދުން

ކަނޑުމަތީ ދަތުރުތައް މީހުން ގިނައިން ކޮށް އުޅޭ ރަށްރަށުގައި، އުސް ފަނާރުތައް ހަދާފައި ހުރެއެވެ. މި ތަންތަންވަނީ، ރަށް ފަސޭހައިން ފާހަގަކުރެވޭ، މީހުންނަށް މަގުދައްކާ، ބޭނުންތެރި ތަނަކަށެވެ. ފަތުރުވެރީން މިތަންތަނަށް ޒިޔާރަތްކޮށް ހަދަތެވެ. މި ސަބަބުތަކަށްޓަކައި، ރާއްޖޭގެ ރަށެއްގައި ދިގު ރުކަކަށް ވުރެ ދިގުނޫން ފަނާރެއް ހެދުން ކިހިނެއްވާނެތޯއެވެ؟
ރަށްރަށުގައި ބޮޑު އަކުރުން ނަން ލިޔުމުގެ ފޯރި ހިނގިގޮތަށް، މިފަދަ ކަމެއް އެއް ރަށެއްގައި ކޮށްފިނަމަ، އެހެން ރަށްރަށުގައި ވެސް އެކަން ކުރާނެއެވެ. އަޅުގަނޑު މި މަޒުމޫނުގައި ހިމަނާފައި އެވަނީ ދުނިޔޭގެ އެންމެ ރީތި ފަނާރުތަކުގެ ފޮޓޯއެވެ. މިއިން ކިޔުންތެރިޔާއަށް އެންމެ ރީތި ފަނާރެއް ހޮއްވެވުމަށް ފަހު، ރަށެއްގެ ތޮށިމަތީގައި ނުވަތަ ދަތުރުކުރާ މީހުންނަށް ފަސޭހައިން ފެންނަ ހިސާބުގައި އެތަން ބިނާކުރުން ކިހިނެއްވާނެތޯއެވެ؟ 40 ފޫޓު އުސް ފަނާރެއް ހަދާނަމަ، އެތެރޭގައި މައްޗަށް އަރަން ސިޑިއަށް ހުންނަން ވާނެއެވެ. އަދި، އެންމެ މަތީގައި، ދުރު ބަލަން މީހުންނަށް ހުރެވޭ ގޮތަށް ތައްޓެއް ނުވަތަ ޑެކެއް އެޅި ބައެއް އޮންނަން ވާނެއެވެ. ރޯދަ މަހުގެ ހަނދު ބެލުން ފަދަ ކަންކަމަށް މިފަދަ ޑެކެއް ވަރަށް ބޭނުންތެރިވެސް ވާނެއެވެ.

ބިނާވެއްޓާ ބެހޭ މަޒުމޫނުތައް

މުޅި ވެބްސައިޓްގެ ފިހުރިސްތު