ހުރިހާ މީހުންވެސް ދިރިއުޅުމަށްޓަކައި އެކި ބާވަތުގެ ހިޔާވެހިތައް ހަދައި އުޅެއެވެ. ހިޔާވެއްސެއްގެ އެންމެ މުހިއްމު އެއް ޖާގައަކީ ނިދާކޮޓަރި އެވެ. މީހަކު ނިދާކޮޓަރި ފަރުމާކުރަނީ އެމީހަކަށް ފެނިފައިވާ އެމީހަކަށް ރީތި ގޮތަކަށެވެ. މިފަދަ ތަންތަން ހެދުމުގައި، ތަޖުރިބާއަށް ރިއާޔަތްކޮށް، ބައިނަލްއަޤްވާމީ ކަމާބެހޭ ފަރާތުން ނިދާކޮޓަރިއާ ބެހޭ ގަވާއިދެއް ހަދާފައި ވެއެވެ. ހިޔާވެހީގެ ހުރިހާ މިންތަކާ ބެހޭ ގަވާއިދުތައް މިތަނުން ހަދައެވެ.  މި މަޒުމޫނުގައި އަޅުގަނޑު މި ގެނެސްދެނީ ނިދާކޮޓަރީގެ ބައިނަލްއަޤްވާމީ ގަވާއިދުގެ މިންތަކާއި ނިދާކޮޓަރި ފަރުމާކުރުމުގައި ވިސްނަންޖެހޭ، އެ ގަވާއިދުގައިވާ ބައެއް އެހެން ކަންކަމެވެ. މި ޤަވާޢިދުތަކަށް ކިޔަނީ ބައިނަލްއަޤްވާމީ ދިރިއުޅޭތަންތަނާ ބެހޭ ގަވާއިދު (International Residential Code) އެވެ.

މި މަޒުމޫނު ކިޔުުއްވައިފިނަމަ، ގެދޮރު އަޅަން ބޭނުންވާ މީހުންނަށް ވަރަށް ބޭނުން ތެރި މަޢުލޫމާތުތަކެއް ލިބިގެން ދާނެއެވެ.

ނިދާކޮޓަރީގައި ހުންނަން ޖެހޭ ސިފަތައް

(1) އެއްވެސް ނިދާކޮޓަރިއަކަށް އެހެން ނިދާކޮޓަރިއެއްގެ ތެރެއިން ވަދެވިގެން ނުވާނެއެވެ.

(2) ނިދާކޮޓަރިއަށް ވަދެވެން ޖެހޭނީ މީހުން ޖަމާވާ ޢާއްމު ޖާގައަކުން (މިސާލަކަށް މެދުގޭތެރެއިން) ނުވަތަ ކޮރިޑޯއެއް ފަދަ ތަނަކުންނެވެ.

(3) ކޮންމެ ނިދާކޮޓަރިއެއްގައި، އަލީފާން ރޯވެއްޖެނަމަ، ސަލާމަތްވުމަށް ތަނުން ބޭރަށް ނުކުމެވޭނޭ ދެގޮތެއް ހުންނަންވާނެއެވެ. އެއްގޮތަކީ ވަންނަ ބޮޑު ދޮރުކަމަށް ބެލި ދާނެއެވެ. އަނެއް ގޮތަކީ އެހެން ބޮޑު ދޮރެއް ނުވަތަ ކުޑަ ދޮރަކަށް ވެވިދާނެއެވެ. ކުޑަދޮރެއް ނަމަ، އެ ހުޅުވައިލެއްޕޭ ކުޑަދޮރުގެ ހުޅުވޭ ޖާގައިގައި މަދުވެގެން  20 އިންޗި ގުނަ 24 އިންޗި ހުންނަން ވާނެއެވެ. ފަސޭހައިން ނުކުމެވޭ ގޮތަށް މި ކުޑަދޮރުގެ ތިރީ އޮޅި، ތަޅުމުން ފެށިގެން 44 އިންޗިއަށް ވުރެ އުސްވެގެން ނުވާނެއެވެ. އަދި ކުޑަކުދީން ނުކުމެދާނެތީ 24 އިންޗިއަށް ވުރެ ތިރީއޮޅި ތިރިވެގެން ނުވާނެއެވެ. އެއްވެސް އާލަތެއް ބޭނުން ނުކޮށް ފަސޭހައިން އެތެރެއިން މި ކުޑަދޮރު ހުޅުވެން ޖެހޭނެއެވެ.

[މިއީ ކޮޓަރިއަކަށް ވަދެވެން ހުންނަ ދޮރުގެ ބޭރުގައި ރޯވެއްޖެ ނަމަ، މީހުން ސަލާމަތްވުމަށް ބޭނުން ކުރާނޭ އާނގައެކެވެ. އުސްކޮށް ހުންނަ ޢިމާރާތްތަކުގައި ވެސް މިފަދަ ދޮރެއް ހުންނަން ޖެހެއެވެ. މިފަދަ ދޮރެއް ނެތުމުން، މައިދޮރުގެ ކައިރީގައި ރޯވެ، ބޭރަށް ދެވޭނޭ އެހެން ގޮތެއް ނެތިގެން ދެމީހަކު މާލޭގައި ވަރަށް ހިތްދަތި ގޮތަކަށް މަރުވެފައި ވެއެވެ. ރާއްޖޭގައި މި މާއްދާއަށް ބިނާވެށި ފަރުމާކުރާ މީހުން ފަރުވާ ނުވަހައްޓައެވެ.

ބޭރު ޤައުމުތަކުގައި، މި ގަވާއިދަށް ކުޑަދޮރުތައް ހަދާއިރު، ކުޑަދޮރު ބޮޑުކުރާނަމަ، ހަދާގޮތަކީ ތިރީ އޮޅިން ފެށިގެން ގާތްގަޑަކަށް 36 އިންޗިއާ ހަމައަށް ނުހުޅުވޭގޮތަށް ބިއްލޫރިލަނީއެވެ. ހުޅުވޭ ބައި ހުންނަނީ އެއަށް ވުރެ މަތީގައެވެ.]

(4) ކޮޓަރިއަށް އައްޔާއި ވައި ވައްދަން މަދުވެގެން ތަޅުމުގެ އޭރިއާގެ %8 ގައި ހުންނަންވާނީ ބިއްލޫރި ޖެހިފައެވެ. އަދި މަދުވެގެން ތަޅުމުގެ %4 ހުޅުވެން ޖެހޭނެއެވެ.

[މާލޭގެ ގެދޮރު ޢިމާރާތްކުރުމާ ބެހޭ ގަވާއިދުގައި މިހާރު އޮންނަނީ ތަޅުމުގެ އޭރިއާގެ %10 އަތްވާއި ވައި ވެއްދުމަށާއި އަލި ވެއްދުމަށް ކުޑަދޮރު ލާފައި ހުންނަން  ޖެހޭނެ ކަމަށެވެ. އެ ގަވާއިދު މި ޖުމުލައަށް އޮބާލެއްވުމުން ފެނިވަޑައިގަންނަވާނެ އެވެ. ކަމާ ބެހޭ މާއްދާއަކީ 5.1.1 އެވެ. ބޭރު ޤައުމުތަކުގައި ވަޔާއި އަލި ވައްދަން ބޭނުންވާ ޖާގަ އެވަނީ ވަކީން ލިޔެފައެވެ. އެގޮތް މާ ސާފުކަމަށް ފެނެއެވެ.]

ކުޑަދޮރާ މެދު…

ގެދޮރު ފަރުމާކުރުމާ ބެހޭ ގޮތުން ރާއްޖޭގައި އެންމެ ފުރަތަމަ އިޢުލާނު ކުރި ގަވާއިދު މަތީގައި އެވަނީއެވެ. އޭގައި އެ ވަނީ ތަޅުމުގެ އޭރިއާގެ 1/7 ކުޑަދޮރުގައި ހުންނަން ވާނެކަމަށެވެ. މިއީ ގާތްގަޑަކަށް %12 އެވެ. ބައިނަލްއަޤްވާމީ ގަވާއިދުގައިވާ %4 + %8 އާ ވަރަށް އެއްވަރު މިންވަރެކެވެ. މި ގަވާއިދު ނެރުނު ދުވަސްވަރުގެ ކުރިން ރާއްޖޭގައި ބޮޑެތި ކުޑަދޮރުތައް ހަދަން ފަސޭހައެއް ނުވާނެއެވެ. ސަބަބަކީ ބިއްލޫރިއަކީ ރާއްޖޭގައި އުފައްދާ އެއްޗަކަށް ނުވާތީއާއި އެއްތަނުން އަނެއް ތަނަށް ގެންދަން އުނދަގޫ އެއްޗަކަށް ވާތީއެވެ. އަމިއްލަ ގެތަކުގައި އެ ދުވަސްވަރު ހުންނަނީ ވަރަށް ކުދި ކުޑަދޮރެވެ. ފަނުން ހަދައިފައި ހުންނަ ގެތަކުގައި ކުޑަދޮރު ހަދާފައި ހުންނަނީ ތިރިކޮށް ފުޅާކޮށެވެ. ނިދާކޮޓަރިތަކުގައި ކުޑަދޮރު ނުވެސް ހުރެދާނެއެވެ.

ކުޑަދޮރާ މެދު އަދި އިތުރު ދެތިން ކަމެއް މި ތަނުގައި ބަޔާން ކުރާނަމެވެ. ފުރަތަމަ ކަމަކީ ބޮޑު އެއް ކުޑަދޮރަށް ވުރެ، ހަމަ އެ އޭރިއާގެ ދެ ކުޑަދޮރުން ކޮޓަރިއަށް މާބޮޑަށް އަލިވާނެއެވެ. އަލި ފެތުރޭލެއް ރަނގަޅުވާނެ އެވެ.

 ދެވަނައަށް ފާހަގަކޮށްލަން ޖެހޭ ކަމަކީ، ކުޑަދޮރެއް އުސްވި ވަރަށް ކޮޓަރިއަށް އަލިވާ މިންވަރު، ހަމަ އެ އޭރިއާގެ ފުޅާ ކުޑަދޮރަކަށް ވުރެ ބޮޑުވާނެއެވެ. މިހެން އެ ވަނީ، ތިރިއާ އަޅައިބަލާއިރު، މަތީގައި ހުރި އާނގައަކުން ބޮޑަށް ކޮޓަރިއަކަށް އަލި ފެތުރޭނޭ ބީދައިންނެވެ.

ތިންވަނައަށް ކުޑަދޮރާ ބެހޭ ގޮތުން ފާހަގަކޮށްލަން ޖެހޭ ކަމަކީ، ކޮޓަރިއަކީ އޭސީކުރަން ހަދާ ކޮޓަރިއެއް ނަމަ، ކުޑަދޮރުތަކުގެ އޭރިއާ، ތަޅުމުގެ އޭރިއާ އަށް ވުރެ %25 (ހަތަރުބައިކުޅަ އެއްބަޔަށް ވުރެ) ބޮޑުނުކުރުމަށް ކަމާ ބެހޭ ފޮތްތަކުގައި ލިޔެފައި ހުންނަ ވާހަކައެވެ. އެއީ ކޮޓަރީގެ ކުޑަދޮރުތައް ގިނަނަމަ، ފަސޭހައިން ބޭރުގެ ހޫނު ކޮޓަރިތެރެއަށް ވަންނާނެތީ އެވެ. މެދު އިރުމަތީ ޤައުމުތަކުގައި، ހޫނު ގަދައިރު ކޮޓަރީގެ ކުޑަދޮރުތައް ބަންދުކުރާނީ އެވެ. އޭރުން ބޭރުގެ ހޫނު ވަނުން ކުޑަވާނެއެވެ. ބައެއް މީހުން ކޮޓަރިތަކުގެ މުޅި ބިތް ކުޑަދޮރުން ފުރާލައެވެ. އެ ވާނީ ފިނިކުރަން އުނދަގޫ ނުވަތަ ފިނިކުރަން ޚަރަދު ބޮޑު ގޮތަކަށެވެ.

ހަތަރުވަނައަށް އަޅުގަނޑު ފާހަގަކޮށްލާ ކަމަކީ، ޤުދްރަތީގޮތުން ފިނިކުރަން ބޭނުންނަމަ، ނުވަތަ އޭސީކުރާއިރު ޚަރަދުކުޑަކުރަން ބޭނުން ނަމަ ކުޑަދޮރުގައި ދެ ފަށުން ބިއްލޫރި ޖެހުމުގެ މުހިއްމުކަމެވެ. ދެފަށުން ޖަހާއިރު، ދެ ބިއްލޫރިގަނޑުގެ ދޭތެރެ ބައި އިންޗިއަށް ވުރެ ކުޑަވެގެން އަދި ބޮޑުވެގެން ނުވާނެއެވެ.  މިފަދަ ކުޑަދޮރުން ހޫނު އެތެރެވުން މަދުކުރެއެވެ. އަޑުވެސް މަޑުކުރެއެވެ. އަވިދިނަސް އެތެރޭގެ ތަކެތީން ކުލަދިއުން މަދުކުރެއެވެ. ރައްކާތެރިކަން ބޮޑުވެއެވެ.

ކުޑަދޮރާ ބެހޭ ގޮތުން އެންމެ ފަހު ވާހަކައެއްގެ ގޮތުން ދަންނަވާނީ، ކުޑަދޮރު ހުރުން އެންމެ އެކަށީގެންވާނީ ދޮރު ހުންނަ ބިތާ ވީހާ ދުރުގައި ހުންނަ ބިތުގައި ކަމެވެ. ކުޑަދޮރާއި ބޮޑުދޮރު އެއް ބިތެއްގައި ބެހެއްޓުމަކީ އެއްގޮތަކަށް ވެސް ކޮށްގެން ވާނޭ ކަމެއް ނޫނެވެ. ޤުދްރަތީގޮތުން ވައި ބޮޑަށް ދައުރުވާނީ، ބޮޑު ދޮރު ހުންނަ ބިތުގެ ކުރިމަތީގައިވާ ބިތުގައި ކުޑަދޮރު ހުންނަ ނަމައެވެ. އޭރުން، ވައި ހުރަހަށް ކޮޓަރީގެ ތެރޭގައި ދަތުރުކުރާނެތީ، ކޮޓަރިތެރޭގައި އޮކްސިޖަން ގިނަވެ، ވިހަ ގޭސްތައް މަދުވެ، ވަސް ކެނޑި، ހޫނާއި ޖަރާސީމު މަދުވާނެއެވެ. އޭސީ ކުރާ ތަނެއް ނަމަވެސް، ފަންކާއަކުން ބޭރަށް ވައި ފޮނުވޭނޭ ގޮތެއް ހުންނަން ވާނެއެވެ.

(5) ކޮންމެ ނިދާކޮޓަރިއެއްގައި މަދުވެގެން 2 އިލެކްޓްރިކް ސޮކިޓް (ސޮކެޓް) ހުންނަން ވާނެއެވެ. [އެމެރިކާގެ ގަވާއިދެއްގައި ހަފޫޓު ވައުގަނޑެއް އޮތް އެއްޗެއް ގުޅޭހާ ކައިރި ކައިރީގައި ސޮކެޓު ހުންނަން ޖެހެއެވެ. އެއީ ކޮންމެ 12 ފޫޓުން ފާރުގައި އެއްޗެކެވެ. ބައިނަލްއަޤްވާމީ ގަވާއިދުގައި، ކޮޓަރީގައި އަންނައުނު ބަހައްޓާނޭ އަލަމާރިއެއް ހުންނާކަށް ނުޖެހެއެވެ.]

(6) ނިދާކޮޓަރީގެ އުސްމިނުގައި މަދުވެގެން 7 ފޫޓު ހުންނަން ވާނެއެވެ. ފަންގިފިލާ ނުވަތަ ފުރާޅު ނުވަތަ ސީލިން ކަތި ނަމަ، އޭގެ ދެބައިކުޅަ އެއްބައި 7 ފޫޓަށް ވުރެ އުސްވާން ވާނެއެވެ. [ދިވެހިރާއްޖޭގައި ފަންކާ ބޭނުންކުރާތީ، އަދި ފަންކާގެ އެންމެ ތިރިއާއި ތަޅުމާ ދޭތެރޭ މަދުވެގެން 7 ފޫޓު ހުންނަން ޖެހޭތީ، ރާއްޖޭގައި ރަނގަޅުވާނީ ކޮޓަރީގެ އުސްމިނުގައި މަދުވެގެން ½8 ފޫޓު (އަށް ފޫޓު ބައި) ހުންނަ ނަމައެވެ. ނުވަ ފޫޓު ވަރަށް ރަނގަޅުވާނެއެވެ.]

ނިދާކޮޓަރީގެ ސައިޒު

(7) ނިދާކޮޓަރިއެއްގެ އެންމެ ހަނި ބިތުގައި މަދުވެގެން 7 ފޫޓު ހުންނަން ވާނެއެވެ. [މީގެ މާނައަކީ 6 ފޫޓު ފުޅާ ކިތަންމެ ދިގު ކޮޓަރިއެއް ވެސް ނިދާކޮޓަރިއެއް ކަމަށް މި ގަވާއިދު ނުދެކެއެވެ.]

(8) އެކަކު ނިދަން ފަރުމާކުރާ ނިދާކޮޓަރިއެއްގެ އޭރިއާގައި އެންމެ ކުޑަވެގެން 70 އަކަ ފޫޓު ހުންނަން ވާނެއެވެ.

(9) އެކަކަށް ވުރެ ގިނަ މީހުން ނިދާ ކޮޓަރިއެއް ނަމަ، މަދުވެގެން ކޮންމެ މީހަކަށް 50 އަކަ ފޫޓު ތަޅުމުގައި ހުންނަން ވާނެއެވެ. [މީގެ މާނައަކީ ދެމީހުން ނިދާ ކޮޓަރިއެއްގެ ތަޅުމުގައި އެންމެ މަދުވެގެން 100 އަކަފޫޓު ހުންނަން ޖެހޭނެއެވެ.]

އެހެން ބައެއް ނޯޓުތައް

  1. ދެމީހުން ނިދާ ބޮޑު އެނދެއް ބަހައްޓާނަމަ، ކޮޓަރީގެ ފުޅާމިނުގައި 12 ފޫޓު ހުރުން ވަރަށް އެދެވިގެން ވެއެވެ. ނަމަވެސް 13 ފޫޓަށް ވުރެ ފުޅާކުރުމުން، އިތުރު ބޭނުމެއް ނުކުރެވި ޖާގަ ގެއްލެއެވެ. ދިގުމިން ކަނޑައަޅާނީ އެމީހަކު ބޭނުން ވަރަކަށެވެ. ދެމީހަކު ނިދާކޮޓަރީގެ ދިގުމިނުގައި 10 ފޫޓު ނުވަތަ 12 ފޫޓު ބެހެއްޓިދާނެއެވެ. ނުވަތަ އެއަށް ވުރެ ދިގު ކުރެވިދާނެއެވެ. ގެއެއްގައި ނަމަ، ނިދާކޮޓަރިތައް ބޮޑުވި ވަރަކަށް އެހެންޖާގަތައް ކުޑަވެފައި، ތަން ސާފުކުރަން ކުރަންޖެހޭ މަސައްކަތް ބޮޑުވާނެއެވެ. ހޮޓާތަކުގެ ކޮޓަރިތަކުގެ ދިގުމިން 16 ފޫޓުން ފެށިގެން 25 ފޫޓާ ހަމައަށް ހުރެއެވެ. އޭރުން ބެލްކަނީ (ބާލްޚާނާ) އެއް ނުވަތަ އިށީދެގެން މަޑުކޮށްލާނޭ ޖާގައެއް ހެދޭނެއެވެ. ގެއާ ޚިލާފަށް ހޮޓާތަކަކީ އަމިއްލަ އެހެން ޖާގަތަކެއް މެހުމާނުންނަށް ލިބޭތަނެއް ނޫނެވެ. ހޮޓާތަކުގެ ކޮޓަރި ބޮޑު ސަބަބަކީ އެއީ އެވެ.

  2. ބެލްކަނީ އެއްގެ ފުންމިން 4 ފޫޓަށް ވުރެ ކުޑަ ނަމަ،  ގިނަ ފަހަރު ބެލްކަނީ ބޭނުން ކުރެވިފައި ހުންނަނީ ގުދަނެއްގެ ގޮތުގައި އެއްޗެތި ބެހެއްޓުމަށެވެ. ބައެއް ޤައުމުތަކުގައި ބެލްކަނީގެ ފުންމިނުގައި 6 ފޫޓު ހުންނަން ޖެހެއެވެ. އޭރުން، އެހެން މަސައްކަތެއް/ކަމެއް ކުރާ ތަނެއްގެ ގޮތުގައި އެތަން ބޭނުން ކުރެވޭނެއެވެ. މިފަދަ ބެލްކަނީއަށް ޖާގައިގެ ބައެއް ނަގަނީ ކޮޓަރި ތެރެއިންނެވެ. ބޭރަށް ކޮޅުމަތާ ޖަހައި (ކެންޓިލީވަރ ކޮށްގެން) ނެރެގެންނެއް ނޫނެވެ.

  3. ކޮޓަރީން ބެލްކަނީއަށް ނުކުތުމަށް ހުންނަ ދޮރު، 6 ފޫޓަށް ވުރެ ފުޅާކުރުމުގައި އެއްވެސް މަންފާއެއް ނުވެއެވެ. ފުޅާނަމަ، ކޮޓަރިތެރޭގައި ތަކެތި ބަހައްޓާނޭ ޖާގަ މަދުވާނެއެވެ.

  4. ކޮޓަރިއެއްގެ ހުރިހާ ދިއްލުންތަކެއް ފާރުގައި ނުވަތަ ސީލިންގައި ހަރުކުރުމުން ތަޅުމުން ޖާގަ ނުގެއްލެއެވެ.

  5. މި ޒަމާނުގައި ކޮޓަރިއެއްގައި ބޭނުންކުރާ އިލެކްޓްރިކް ސާމާނު ގިނަކަމުން، ކޮންމެ ކޮޓަރިއެއްގައި އިލެކްޓްރިކް ޑީބޯޑެއް ހުރުމަކީ ފައިދާހުރި ކަމެކެވެ.

ނިންމައިލުން

މި މަޒުމޫނުގައި ބަޔާން މިކުރެވުނީ ނިދާކޮޓަރި ފަރުމާ ކުރުމާ ބެހޭ ބައިނަލްއަޤްވާމީ ގަވާއިދުތަކެވެ. މި ގަވާއިދުތަކަށް ރާއްޖޭގައި އަމަލު ނުކުރިއަސް، މިއީ ކޮޓަރިއެއް ހަދާނަމަ، ވިސްނާލަން ވަރަށް ރަނގަޅު ގަވާއިދުތަކެކެވެ. އެތައް ހާސް ބައެއްގެ ޢަމަލީ ތަޖުރިބާގެ އޮށްޓަރެވެ. ރާއްޖޭގައި ނިދާކޮޓަރިއެއް ފަރުމާކުރާއިރު، ގެއެއްގައި އެފަދަ ތަނެއް ހެދުމާއި ގެސްޓް ހައުސް އެއް ފަދަ ތަނެއްގައި ނިދާކޮޓަރިއެއް ހެދުމާ ވަރަށް ތަފާތުވާނެއެވެ. ގޭގައި ހަދާކޮޓަރިއަށް ވުރެ ގެސްޓް ހައުސްއެއްގެ ކޮޓަރީގެ އޭރިއާ ބޮޑުވާން ވާނެއެވެ. މާ ތަނަވަސް ވާން ޖެހޭނެއެވެ. ގާތްގަޑަކަށް ހުރިހާ ހޮޓާތަކާއި ގެސްޓް ހައުސްގެ ކޮޓަރިތައް ހުންނަނީ ދާދި އެއްގޮތަކަށެވެ. އެއީ 100 ވަރަކަށް އަހަރުގެ ތަޖުރިބާއިން އެންމެ ރަނގަޅުކަމަށް ފެންނަ ގޮތެވެ. ތިރީގައި އެވަނީ ހޮޓަލެއްގެ ކޮޓަރިއެއްގެ މިންތަކެވެ. މިއީ ނިސްބަތުން ފުޅާ ކޮޓަރިއެކެވެ.

ތިރީގައި އެވާ ފޮޓޯއަށް އޮބައިލުމުން ޑައުންލޯޑުވާނީ، އޮޓޯކޭޑުން އަޅުގަނޑު ކުރަހާފައިވާ ހަ ނިދާކޮޓަރިއާއި ކުޑަ ރެސްޓޯރަންޓަކާއި އެހެން ވަސީލަތްތަކުގެ ޖާގަ ހިމެނޭ ގެސްޓް ހައުސްއެއްގެ ހުރިހާ ކުރެހުންތަކެވެ. މިކުރެހުންތަކުން ނިދާކޮޓަރިއެއްގެ ހުރިހާ މިންތަކެއް ބެއްލެވޭނެއެވެ. މިތަން ފަރުމާކޮށްފައިވަނީ ހޮޓާފަދަ ތަންތަނުގައި ނިދާކޮޓަރި ހަދާފައި ހުންނަ މިންތަކަށް، ރާއްޖޭގެ ވެއްޓަށެވެ. މި ފައިލް ހުޅުވޭނީ ކޮމްޕިއުޓަރަށް އޮޓޯކޭޑް އަޅާފައިވާ ނަމައެވެ.

ގަސް ހެއްދުމާ ބެހޭ މަޒުމޫނުތައް

މުޅި ވެބްސައިޓްގެ ފިހުރިސްތު