ތިބާގެ ޙަޔާތަށް އައި އެންމެ އުފާވެރި އަހަރަށް 2024 ހެދުމަށް ހިލޭ ކުރެވޭ ފަސްކަންތައް

2023 ވަނަ އަހަރު މާޒީއާ އެކުވެ ދިޔައީއެވެ. ތިބާގެ ޙަޔާތަށް އައު އަހަރެއް އަލިވިލެނީއެވެ. އާދެ! 2024 ވަނަ އަހަރެވެ. ބައެއް މީހުން އައު އަހަރުގެ ދޮރުވެރިރޭ އައު ޢަޒުމްތަކެއް ކަނޑައަޅައެވެ. ބައެއް މީހުން މިފަދަ ޢަޒުމްތަކުގައި ހަފުތާއެއް ވުމަށް ފަހު، އިހު ހުރި އުޅުމަށް ބަދަލުވެއެވެ. އެކަމަކު ބައެއް މީހުން އެ ޢަޒުމްތަކުގައި ދެމިހުރެއެވެ. ތިބާ ހިމެނެނީ މިއިން ކޮންބައެއްގައި ތޯއެވެ؟

2024 ވަނަ އަހަރަކީ ތިބާގެ ޙަޔާތުގައި އައި އެންމެ އުފާވެރި އެންމެ ހިތްހަމަ ޖެހޭ އަހަރަށް ހެދުމަށް ޢަޒުމް ކަނޑައަޅަމާ ތޯއެވެ؟ އާދެ! ހިތްހަމަޖެހުމަކީ، އުފާވެރިކޮށް ހުރުމަކީ، ކޮންމެ މީހަކަށްވެސް އުޅެވިދާނޭ ގޮތެކެވެ. މީހުން އުފާވެރިކޮށް އުޅޭނޭ ގޮތަކީ އެކަމާ ދޭތެރޭ ވަރަށް ގިނަ ދިރާސާތަކެއް ކޮށްފައިވާ ކަމެކެވެ. ފޮތްވިއްކާ މަޝްހޫރު ބައެއް ކަމުގައިވާ އެމޭޒަންގައި، އުފާވެރިކަމާ ބެހޭ ފޮތްތައް ހޯދުމަށް ބުނުމުން ހަތްދިހަ ފަސް ހާސް ފޮތަށް ވުރެ ގިނަ ފޮތުގެ ލިސްޓެއް ލިބެއެވެ. މިއިން ވަރަށް ގިނަ ފޮތްތަކުގައި ވަނީ އެއް ވާހަކަތަކެކެވެ. އުފާވެރިކަމަކީ، ހިތްހަމަޖެހުމަކީ، ފައިސާ އާ މާ ބޮޑަށް ގުޅިފައިވާ ކަމެއް ނޫނެވެ. އެއީ ކޮންމެ މީހެއްގެ އަތްފޯރާ ހިސާބުގައިވާ ކަމެކެވެ. ހިތްހަމަޖެހުމުގެ އުފަލަކީ ކޮންމެ މީހަކަށް ވެސް ފަސޭހަ ކަމާ އެކު ހޯދިދާނޭ އުފަލެކެވެ. މި އުފާ ހޯދުމަށް ތިބާ ޢަޒުމް ކަނޑަނާޅަންވީ ކީއްވެތޯއެވެ؟ އުފާވެރިކަމަކީ ދިރިއުޅުމުގެ މައިގަނޑު މަޤްޞަދުކަމުގައި ގިނަ ބަޔަކު ދެކެއެވެ. މިއާއެކު އެއީ ކޮންމެ މީހަކަށްމެ ޙާޞިލްކުރެވިދާނެހާ، ހޯދިދާނެހާ ގާތުގައިވާ ކަމެކެވެ.

އެއްޗެއް ހޯދުމަށް ކަނޑައަޅާއިރު އެއީ ކޮން އެއްޗެއް ކަން އެނގެން ޖެހެއެވެ. އޭގެ ސިފަތައް ތިމާގެ ފިކުރުގައި ހުންނަން ޖެހެއެވެ. ބިން މައްޗަށް ވެއްޓިފައިވާ ތިނޯހެއް ހޯދާނަމަ، ތިނޯހުގެ ސިފަތައް ނޭނގި ތިނޯހެއް ނުހޯދޭނެއެވެ. ނޫންނަމަ، ތިނޯހެއް ފެނުނަސް އެއީ ތިނޯހެއްކަމެއް ނޭނގޭނެއެވެ. އެހެންކަމުން އުފާވެރިކަމަކީ ކޮބައިކަން، އެ ހޯދަން ބޭނުންވާ މީހުންނަށް އެނގެން ޖެހެއެވެ. އާދެ! އުފާވެރިކަމަކީ ކޮބައިތޯއެވެ؟ ދިވެހި ބަސްފޮތުގައި ބުނާ މާނައިން އުފާ ހޯދާކަން ފަސޭހައެއް ނޫނެވެ. ”ހިތަށާއި ސިކުނޑިއަށް ތަނަވަސްކަމާއި އަރާމު ލިއްބައިދޭ“ ކަންތައްތަކަކީ ކޮބައިތޯއެވެ؟ ނަފްސާނީ ގޮތުން ހިތާއި ސިކުޑިއަކީ ކޮބައިތޯއެވެ؟ އެއީ ދެ އެއްޗެއް ތޯއެވެ؟  ފަތަން ދަސްކުރާހެން، އުފަލަކީ އިންސާނާ ދަސްކުރާ ހުނަރެއް ހެއްޔެވެ؟ ބައެއް މީހުންނަށް އުފާވެރިކަން ސިފަކޮށްދޭން ނޭނގުނަސް، އެ ކަން އިޙްސާސްވި ވަގުތުތައް އެމީހުން ހަނދާން ހުރެއެވެ. އެކި މީހުން ކައިރީގައި ފުން އުފާވެރިކަމެއް އިޙްސާސް ކުރެވުނު ވަގުތު ބުނެދީބަލާށޭ އެހުމުން އެމީހުން ބުނަނީ ކޮންމެވެސް ޤުދުރަތީ ތަނެއްގައި، މިސާލަކަށް ފިނޮޅެއްގައި، ހަނދުވަރުދޭ މޫސުމެއްގައި، ހިގާލަން ދިޔަ ވަގުތު އިޙްސާސް ކުރެވުނު ސިކުޑީގެ ހަމަހިމޭންކަން ފަދަ ވަގުތުތަކެވެ. ނުވަތަ ރުކެއްގެ ހިޔަލުގައި ހުރި ޖޯއްޔެއްގައި އޮށޯވެގެން އޮތް އިރު މޫނަށް ޖެހޭ ފިނިވަޔާއެކު، ގާތުގައި ހުރި އުނިގަހެއްގެ މަލުގެ ވަސް އަންނަމުން ދިޔަ ވަގުތެވެ. ބައެއް މީހުން އެތައް ދުވަސްތަކަކަށް އިންތިޒާރުކުރި ކަމެއްވީ ހިނދުކޮޅު، ނުވަތަ އިމްތިޙާނަކުން ވަރަށް ރަނގަޅަށް ފާސްވި ޚަބަރު ލިބުން ފަދަ ކަންކަން ބުނެއެވެ. ދަރިއަކު ލިބުން ފަދަ، ނުވަތަ ދުރުގައިވާ ގާތް މީހަކު އައުން ފަދަ ކަންކަމެވެ. ނުވަތަ ގާތްމީހަކާ އެކީ ވުން ނުވަތަ ގާތް މީހަކު އުފައުކޮށްދިނުން ފަދަ ހިނދުކޮޅުތަކެވެ.

އުފަލަކީ ހިނދުކޮޅެއްގެ ކަމެއް ހެއްޔެވެ؟ އެއީ ތިމާ ވަކި ވަގުތަކު ހުންނަ މާހައުލުގެ ކަމެއް ހެއްޔެވެ؟ މިއީ ތެދެއްކަމަށް ވަނީނަމަ، އެ މާހައުލަށް ދިއުމުން ކޮންމެ މީހަކުވެސް އުފާވާން ޖެހޭނެތާއެވެ! އެއީ ކުރާކަމަކާ ގުޅިފައިވާ ކަމެއް ހެއްޔެވެ؟ މަސްބާނަން ދިއުމުން އުފާވާނަމަ، ކޮންމެ މީހަކުވެސް މަހަށް ދިއުމުން އުފާވާން ޖެހޭނެތާއެވެ! މިފަދަ ކަންކަމާ ފިކުރުކުރުމުން ވިސްނެނީ އުފާވުމަކީ މިފަދަ ވަގުތީ ކަންކަމެއް ނޫންކަމެވެ. އެއީ ދުނިޔެއާ ދޭތެރޭ ދެކޭ ގޮތުގެ މައްޗަށް ބިނާވެފައިވާ ކަމެއްކަމެވެ. އަހަރުމެންނަށް ދުނިޔެއެއް ބަދަލެއް ނުކުރެވޭނެއެވެ. އެކަމަކު، އަހަރުމެންނަށް ދުނިޔެއާ ދޭތެރޭ ދެކޭގޮތް ބަދަލުކުރެވިދާނެއެވެ. ދުނިޔޭގެ ކަންތައްތަކާ މެދު އަހަރުމެންގެ އެޓިޓިއުޑް ބަދަލުކުރެވިދާނެއެވެ. ކުރީގައި ބަޔާން ކުރެވުނު އުފަލުގެ ވަގުތުތަކަށް ވިސްނާލަ ބަލާށެވެ. އެކަމުގައިވާ ޢާއްމު ބަހާ އަކީ، ހުރިހާ ކަމެއްގައި ހިމެނޭ އެކައްޗަކީ، އެއްކަމަކީ ކޮބައިތޯއެވެ؟

މަތީގައި ބަޔާން ކުރެވުނު އުފަލުގެ ހުރިހާ ތަޖުރިބާތަކަށް ޢާންމު ސިފައަކީ ވަގުތީ ގޮތުން ފިކުރުގައި ހިނގާ އަރާރުންތަކާއި ފިއްތުންތައް ހަނދާންނެތިގެން ވުމެވެ. މާހައުލާއި ނަފުސާ އެއްކޮޅުވެ އެކުވެރިވެގެން ވުމެވެ. ހާސްކަމާއި ނުތަނަވަސް ކަމުން ސިކުނޑި ހުސްވެގެން ވުމެވެ. އުފަލުގެ ތަޖުރިބާއެއް ކުރާ މީހަކު، މިސާލަކަށް ފިނޮޅެއްގައި ހިނގަމުންދާ މީހާ، ހިނގުން ފިޔަވައި އެހެން ޚިޔާލެއް އޭނާގެ ފިކުރަކު ނުވާނެއެވެ. ވަކިކަމެއް ވާނެކަމަށް އުއްމީދެއް ނުކުރާނެއެވެ. އޭނާ ހަމަ ހިނގަނީ އެވެ. އެއްވެސް އެހެން ޚިޔާލެއް ނެތިއެވެ. ކުޑަ ހިނދުކޮޅަކަށް އޭނާގެ މާޒީގެ މަތިން ހަނދާން ނެތެއެވެ. މުސްތަޤްބަލް ރޭވުމުގެ ފިކުރުން ބޯ ބުރަވެގެން ނުވެއެވެ. އެ ވަގުތުކޮޅުވަނީ، އެފަދަ ފިކުރީ ވަސްވާސްތަކުން މިނިވަންވެގެންނެވެ. މި އަރާމުގެ ވަގުތުކޮޅު އޭނާގެ ފިކުރާއި ނަފުސުވަނީ މާހައުލާ ޞުލްޙަވެގެންނެވެ.

ނަމަވެސް މިފަދަ ވަގުތަކީ އަވަހަށް ހުސްވާ، އަވަހަށް ނިމިދާ ކުރު ވަގުތުކޮޅެކެވެ. މިފަދަ ޖާދުވީ ކުރު ވަގުތުތަކާއި ޙިކްމަތުތެރިމީހުންގެ ދާއިމީ އުފާވެރިކަމާ ވަރަށް ތަފާތެވެ. އެމީހުންގެ އުފާވެރިކަން، ފުންވެފައި، ދިގުދެމިގެން ވެއެވެ. ނަމަވެސް، މިދެންނެވި ކަންކަމާ ޚިޔާލުކޮށްލުމުން، އުފާވުމަށް ބޭނުންވާ ސިފަތައް އަހަރުމެންނަށް ވިސްނެއެވެ. ވިހިވަނަ ޤަރުނުގެ ތެރޭގައި، އުފަލާ ބެހޭ ގޮތުން ވަރަށް ގިނަ ދިރާސާތަކެއް ކުރެވި ފޮތްތަކާއި ރިޕޯޓްތައް ލިޔެފައި ވެއެވެ. މިލިޔުންތަކުން، އުފަލުން ހުރުމަށް ބޭނުންވާ ކަންކަން ފާހަގަކޮށް ވަކިކުރެވިފައި ވެއެވެ. ތިރީގައި މިބަޔާން ކުރަނީ މިގޮތުން މިފަދަ ފަސްކަމެކެވެ.

1 މި ހިނދުގައި ދުނިޔޭގައި އުޅޭށެވެ.

ކަމެއް ކުރަން ނުވަތަ އުފަލުން އުޅެން ވަރަށް ގިނަ މީހުން މާދަމާ އަންނަންދެން މަޑުކުރެއެވެ. ނަމަވެސް، އަހަރުމެންނަށް ދުނިޔޭގައި އުޅެން ލިބިފައިވަނީ ހަމައެކަނި މިވަގުތެވެ. މާދަމާ އަންނާނޭ ކަމެއް، ވާނޭ ގޮތެއް ވަނީ ޣާއިބުގައެވެ. އަހަރުމެންނަށް ފަރުދާ ވެފައެވެ. ކަމެއް ކުރަން މާދަމާ ވަންދެން މަޑުކުރުމަކީ މޮޔަކަމެކެވެ. މީހަކާ ދޭތެރޭ ރަނގަޅަށް ކަންތައް ކުރަން މާދަމާ ވަންދެން މަޑުނުކުރާށެވެ. ކަމެއް ވުމުން، ޗުއްޓީކުރަން މަޑުނުކުރާށެވެ. ފަހަރެއްގައި، ތިބާގެ ޙަޔާތަށް މާދަމާ އަލިވިލޭނޭ ކަމެއް ޔަޤީން އެއް ނޫނެވެ.

ބައެއް މީހުން މާދަމާވާނޭ ގޮތާ ދޭތެރޭ ފިކުރުކޮށް ހިތް ނުތަނަވަސް ކުރެއެވެ. ނުވަތަ މާޒީގައި ކުރިމަތިވެފައިވާ ހިތާމަތައް ހަނދާންކޮށް ހިތްދަތިކުރެއެވެ. ނަމަވެސް، ހިތްހަމަޖެހުމަށްޓަކައި މިއީ މޮޔަކަމެކެވެ. ތިމާގެ އަމިއްލަ އުފަލައްޓަކައި، މާޒީގެ ދޮރު ބަންދުކޮށް ތަޅުލާށެވެ. އަދި މުސްތަޤްބަލް ތި ބަލާ ކުޑަދޮރުގެ ދޮރުފޮތި ކަހާލާ ފަރުދާ ކުރާށެވެ. އެއްވެސް އިންސާނަކަށް މާޒީވި އަހަރުތަކުގެ ފިކުރާއި، މުސްތަޤްބަލްގެ ވެދާނެ ގޮތްތަކުގެ ފިކުރާއި، ނުވީތާކަށް މިއަދުގެ ފިކުރާއެކު ހިތްހަމަޖެހުން ހޯދާނީ ކިހިނަކުން ހެއްޔެވެ؟ ތި ފިކުރުތަކުން ސިކުނޑި އޮންނާނީ ބުރަވެފައެއް ނޫން ހެއްޔެވެ؟ އަހަރުމެންނަށް އޮތީ ހަމަ އެކަނި މިވަގުތެވެ. މާދަމާއަކީ ވެސް މިއަދެވެ. މިހިނދެވެ. އެހެންކަމުން، މިއަދު، މި ވަގުތު ދުނިޔޭގައި އުޅޭށެވެ. މި ބުނަނީ މާދަމާއަށް ތައްޔާރު ނުވާށެކޭ ނޫނެވެ. ވިސްނާލުމުން ތިބާއަށް ޔަޤީން ވާނީ މާދަމާއަށް ވެވޭނޭ އެންމެ ބޮޑު ތައްޔާރަކީ މިއަދު ކުރަންޖެހިފައިވާ ކަންތައްތައް ކުރުމެވެ.

ކޮންމެ މީހަކަށްވެސް އެމީހެއްގެ ޒިންމާތައް، މިއަދު އޮށޯންނަންދެން، ކިތަންމެ ބުރަޔަސް ފުރިހަމަ ކުރެވިދާނެއެވެ. މަޝްހޫރު އިނގިރޭސި އަދީބަކު ކަމުގައިވާ ސްޓީވަންސަން ބުނެފައި ވެއެވެ. ”ކިތަންމެ ބުރަޔަސް، ކޮންމެ މީހަކަށްވެސް އެއްދުވަސް ވަންދެން، އެމީހެއްގެ މަސައްކަތް އެމީހަކަށް ކުރެވިދާނެއެވެ. ކޮންމެ މީހަކަށް ވެސް، އެއް ދުވަހު، ލޮބުވެތިކޮށް، ބަނިޔާދަންކޮށް (އަބުރުވެރިކޮށް، އަޚްލާޤު ރަނގަޅަށް، އަދަބުވެރިކޮށް)، ޠޯހިރުކޮށް އިރުއޮއްސެންދެން އުޅެވިދާނެއެވެ. ޙަޤީޤަތުގައި، ދިރިއުޅުމުގެ މާނައަކީ މިއެވެ.“ މޮޔަމީހުންގެ ހަސްފަތާލުތަކުގައި އެދުމަތިކޮށްފައިވާ ކިތަންމެ ބަޔަކީ މާޒީގެ ހިތާމަތަކުން ސިކުނޑި ފިތި، ބިރުވެރި މުސްތަޤްބަލްގެ ބަރުން މޮޔަވެފައިވާ މީހުންނެވެ. އެމީހުން ހަސްފަތާލަން ވަންނަން ޖެހުނީ މާޒީއާއި މުސްތަޤްބަލްގައި ދިރިއުޅޭތީއެވެ.

އިންސާނާގެ ޠަބީޢަތުގައި ހުންނަ އެންމެ އާޝޯޚުކުރުވަނިވި އެއް ކަމަކީ އަހަރުމެން “ދިރިއުޅުން” ފަހުން ކުރާ ކަމެއްގެ ގޮތަށް ފސްކުރާކަމެވެ. ކޮންމެވެސް ޖާދުވީ ފިނިފެންމަލުގެ ބަގީޗާއެއް، އަހަރުމެންނަށް ފެންނަންޖެހެނީ ކުރިމަތީގައި އޮތް އުދަރެހުގެ އަނެއް ފަރާތުންނެވެ. މިކަމުގެ ވަސްވާސްތަކުން އަހަރުމެންނަށް ގޭގެ ކުޑަދޮރުގެ ބޭރުގައި މިހާރު ހެދި ފޮޅިފައިވާ ފިނި މާތަކުން އުފަލެއް ހޯދާކަށް ނޫޅެއެވެ. އަހަރުމެން މިހާ ބޮޑު މޮޔައިންނަށްވަނީ ކީއްވެހެއްޔެވެ؟

ފަރަންސޭސި މަޝްހޫރު ފީލްސޫފް، މޮންޓެއިން މީގެ 500 އަހަރު ކުރިން ބުނެފައި ވެއެވެ. ”އަހަރެންގެ ޙަޔާތް ވޭތިކުރެވިފައިވަނީ ޚިޔާލީ މުޞީބާތްތަކެއްގެ ބިރުވެރިކަމުގެ ތެރޭގައެވެ. އޭގެ ތެރެއިން އެއްވެސް މުޞީބާތެއް އަހަރެންނާ ކުރިމައްޗެއް ނުވިއެވެ.“ މިއީ ތިބާގެ ޙަޔާތެވެ. އަހަރެންގެ ވެސް ޙަޔާތެވެ. ޚިޔާލީ މުޞީބާތްތަކެއްގެ ބިރުވެރިކަމުގައި ދިރިއުޅުމުގެ ދުވަސްތައް ބޭކާރު ކުރަނީއެވެ. ހޭވެރިވާށެވެ. މިއަދަކަށް އަލިވިލުމެއް ދެނެއް ނުވެއެވެ. މިއަދު ދިރިއުޅެމާ އަންނާށެވެ. މުސްތަޤްބަލްއާއި މާޒީގެ ޚިޔާލުތަކުން ފިކުރުބޮޑު ނުކުރަމާ ހިނގާށެވެ.

2 އަނިޔާތަކާއި ހިތާމަތައް މެދުވެރިކުރި ފަރާތްތަކަށް މަޢާފުކޮށް ކުރިއަށް ދާށެވެ.

ބުއްދިވެރި މީހަކު ބުނެފައި ވެއެވެ: ”ކަންކަމަށް މަޢާފު ނުކޮށް ރުޅިވެރިކަމުގައި ދެމިހުރުމީ، އަނގުރު ގަނޑެއް، އެހެން މީހަކާ ދިމާއަށް އެއްލުމުގެ ބޭނުމުގައި އަތުން ހިފަހައްޓައިގެން ހުރުމެވެ. މިކަމުން، ފިހޭނީ ތިމާގެ އިނގިލިތަކެވެ.“ ޙިކްމަތްތެރިމީހުން، ރުޅިވެރިކަމުގައި ދެމިހުރުމުގެ ގެއްލުންތަކުގެ މައްޗަށް މިފަދަ ކިތަންމެ ވާހަކަތަކެއް ބުނެފައި ވެއެވެ.

ދުނިޔޭގެ ހަމައަކީ، ތިމާއަށް އެހެން މީހުންގެ ފަރާތުން ރުޅިއަންނަ ކަންތައްތަކާއި އަނިޔާތަކާއި ބޭވަފާތެރިކަމާއި އުނދަގޫތަކާއި ގެއްލުންތައް ލިބިފައި ވުމެވެ. އެހެންމީހުންނަށް ވެސް އެފަދަ ކަންތައްތައް މެދުވެރިވެފައި ވާނެއެވެ. މިއީ ދުނިޔޭގައި ކަންހިނގާ ގޮތެވެ. ދުނިޔޭގެ ސުންނަތެވެ. މިފަދަ ޙާލަތްތަކުގައި، އަނިޔާ ލިބުނު ފަރާތުން އެ އަނިޔާ ދިން ފަރާތަށް މަޢާފުކުރުމަކީ، ކަމުގެ ބާވަތުން ވަރަށް އުނދަގޫ ކަމަކަށް ވެއެވެ. ކޮންމެވެސް ދުވަހަކުން ބޮނޑިއެއް ދިނުމުގެ ބޭނުމުގައި، ނުވަތަ އެކަމުންވީ ހިތްދަތިކަމުން އެ ރުޅިވެރިކަން ހިތުގައި ބޭއްވެއެވެ. މިކަމުގެ ސަބަބުން، ތިމާ އެ އަނިޔާކުރި މީހާއާއި އެ ހާދިސާއާ ވަލަކުން އެއްސެއެވެ. އެކަންތައް ހިތަށް އަބަދު ކަށިޖަހައި ޖަހައި ހުރެއެވެ. އެ އަނިޔާއާއި ބޭވަފާތެރިކަމާއި ގެއްލުންތަކުގެ ވޭން ފަށްފަށުން  ލިބިލިބި ހުރެއެވެ. ހިތްހަމަ ޖެހުމަށް، އުފާވެރިކަމުގައި ދެމިހުރުމަށް އެ ޚިޔާލުތައް ދަތިކުރެއެވެ. އެފަދަ ކަންކަން ކުރިބަޔަކަށް މަޢާފުދިނުމަކީ، އެ ހާދިސާއާއި ތިމާ ގުޅިފައިވާ ވައު ބުރިކޮށް އެ ފިކުރުތަކުން މިނިވަންވެ ކުރިއަށް ދެވޭނޭ ކަމެކެވެ. އެ ޚިޔާލުތަކުން ލިބެމުންދާ ފިކުރުބޮޑުވުން ފިލުވާލެވޭނޭ ކަމެކެވެ. އެއީ މާޒީގެ އަނިޔާތަކުގެ ސަބަބުން މިހާރުގެ ހާލަތް ތަޣައްޔަރު ވިޔަ ނުދިނުމަށް ކުރެވޭނޭ ކަމެކެވެ. ކަންކަމަށް މަޢާފުދެވޭ މީހުންނަކީ އުފާވެރިކަން ބޮޑު ބައެކެވެ. މިއާ ޚިލާފަށް ރުޅިވެރިކަން ހިތުގައި ބާއްވައިގެން އުޅޭމީހުންނަކީ، ނުތަނަވަސްކަން ބޮޑު، ހިތާމަވެރި، ފަސޭހައިން ރުޅިއަންނަ ބައެކެވެ.

މަޢާފުދިނުމުގައި ބޮޑަށް މަންފާއޮތީ ތިމާއަށެވެ. ބައެއް ފަހަރު، މިބާވަތުގެ މައްސަލަތަކުގައި ކަން ކުރިމީހާއަށް، އޭނާއަށް އެކުރެވުނީ ގޯސްކަމެއްކަން ނުވެސް އެނގެއެވެ. އެކަމުން އޭނާއަކަށް އެއްވެސް އުނދަގުލެއް ނުވެއެވެ. ކުރިކަމުގެ ސަބަބުން ހިތާމައިގައި އުޅެން ޖެހެނީ ތިމާއެވެ. އެހެންކަމުން، ތިމާއަށް އެންމެ ފައިދާ ބޮޑީ މަޢާފުދިނުމެވެ. މަޢާފުދިނުމަކީ ކެރުން ބޭނުންވާ، ތިމާގެ ޒަމީރު ލުއިވާނޭ ކަމެކެވެ. މަޢާފުދިނުމަކީ ކުށް ކުރި މީހާ، އެކުރި ކަމަކީ ރަނގަޅު ކަމަކަށް ހެދުމެއް ނޫނެވެ. އެކަމުން، ތިމާއަށް ދަސްވި ޢިބްރަތް، ނުލިބޭ ފިލާވަޅަކަށް ހެދުމެއް ނޫނެވެ. ލިބުނު އަނިޔާއަށް، އޭނާގެ ޒިންމާ ނެތިގެން ދާކަމެއްވެސް ނޫނެވެ.

2024 ވަނަ އަހަރަކީ، އައު ދަތުރެއްގެ ފެށުން ކަމުގައި ހަދަމާތޯއެވެ. 2023 ގެ ދަތުރުގައި ތި އުފުއްލި ފޮށިތަންމަތި، މާޒީގައި ބަހައްޓާފައި، ހުސް ފޮށްޓަކާއިގެން ދަތުރު ކުރިއަށް ގެންދަމާތޯއެވެ؟ މިހާރު ތި ގެންގުޅޭ ފޮށިތަންމަތި، މާ ބަރުވެއްޖެ ނޫންތޯއެވެ؟ ދަތުރު ހަލުއިވެ، ދުރަށް ދަތުރުކުރެވޭނީ ލުއިކޮށް ދަތުރުކުރާ މީހުންނަށެވެ.

3 ޝުކުރުވެރި ޙަޔާތެއް އުޅޭށެވެ.

ވަރަށް ގިނަ ދިރާސާތަކުން އެނގި އޮޅުންފިލަނީ ޝުކުރުވެރިވުމާއި އުފާވެރިކަމާ ގުޅުމެއް އޮންނަ ކަމެވެ. ތިބާއަށް ތިހީކުރެވެނީ ގިނަ މީހުން ހީކުރާ ގޮތް ނަމަ، ތިއީ ކުށް ހީއެކެވެ. ގިނަ މީހުން ހީކުރަނީ ޝުކުރުވެރިވަނީ އުފާވުމުން ކަމަށެވެ. ނަމަވެސް ޙަޤީޤަތަކީ އެއެއް ނޫނެވެ. އެތައް ކަމަކުން ޔަޤީންވަނީ، އުފާވެރި ކަމަކީ ޝުކުރުން އަންނަކަމެއް ކަމެވެ. އެހެން ޢިބާރާތަކުން ބުނާނަމަ، އުފާވެރިމީހުން ޝުކުރުވެރިވަނީ އަކީ ނޫނެވެ. ޝުކުރުވެރިވުމުން އުފާވެރި މީހުންނަށްވަނީ އެވެ. ޝުކުރުވެރިވުމަކީ، އެކި މީހުން އެކި ގޮތަށް ތަރުޖަމާ ކުރާކަމެވެ. ބައެއް މީހުންނަށް އެއީ ކުރިމަތިވާ ދަތި ހާލަތެއްގެ އުޖާލާ ފަރާތަށް ބެލުމެވެ. ބައެއް މީހުންނަށް އެއީ ތަނަވަސްކަން ވަޒަން ކުރުމެވެ. ބައެއް މީހުންނަށް އެއީ ތިމާގެ ދިރިއުޅުމުގެ ކަންތައްތައް ކޮށްދިން ފަރާތްތަކަށް، ހިތުގައި އުފެދޭ ހެޔޮއެދުމާއި އިޚްލާޞްތެރިކަމުގެ ޝުޢޫރު ފާޅުކުރުމެވެ. އަނެއް ބަޔަކަށް އެއީ ކަލާނގެ އަށް ޝުކުރުވެރިވުމެވެ. އެއީ ކުރިމަތިވި މުޞީބާތްތަކުގެ ބަދަލުގައި ލިބުނު ނިޢުމަތްތައް ހިސާބުކުރުމެވެ. ކަންކަންވަނީ އެހެންމީހުންގެ އެހީއިންކަން ދެނެގަތުމެވެ.

2024 ވަނަ އަހަރަކީ އުފާވެރި އަހަރަކަށް ހެދުމަށް ޝުކުރުވެރި ހިތަކުން ކަންކަން ދެކެމާތޯއެވެ. އެކަމުގެ މަންފާތައް ގިނަ ގުނަވެފައި މަތިވެރިއެވެ. ޚުދު މާތްﷲ ވަޙީކުރައްވާފައި ވަނީ، ނޫން… ވަޢުދުފުޅުވެވަޑައިގަންނަވަނީ، ޝުކުރުވެރިވާ މީހުންނަށް ނިޢުމަތްތައް އިތުރުކޮށްދެއްވާނޭ ކަމަށް ނޫންތޯ އެވެ؟ ޝުކުރުވެރިވުމުން ލިބޭ އުފާވެރިކަމުގެ އިޙްސާސްތަކުގެ އިތުރަށް އެހެން މަންފާތައް އެކަމުގައި ހިމެނެއެވެ. މިގޮތުން، ޝުކުރުވެރިވާ މީހުން އުއްމީދީ ހަރަކާތްތެރި މީހުންނަށް ވެއެވެ. އަދި އެމީހުންގެ ކިބައިގައި ދީންވެރިކަމާއި ރޫޙާނީ ސިފަތައް ހުރެއެވެ. އެމީހުންނަކީ ފަސޭހައިން މީހުންނަށް އެހީތެރިވާ، އެހެންމީހުންގެ އިޙްސާސްތައް ދެނެގަނެވޭ މީހުންނަށް ވެއެވެ. ކަންކަމާ ހާސްވެ ފިކުރުހުސްވުން އެމީހުންގެ މެދުގައި މަދެވެ. އަދި އެހެންމީހުންނަށް ލިބިފައިވާ ނިޢުމަތްތަކާ މެދު ޙަސަދަވެރިވުން ކުޑަވެފައި ދުނިޔެވީ ތަކެއްޗަށް ހެސްގަތުން ކުޑައެވެ. ޝުކުރުވެރިވުމުން ލިބޭ ތިރީހަކަށް މަންފާއެއް ބައެއް ދިރާސާތަކުގައި ފާހަގަކޮށްފައި ވެއެވެ. ކުރުކުރުމަށްޓަކައި، އެ މަންފާތައް ތިރީގައި ޚުލާޞާ ކޮށްލަނީ އެވެ.

މިޒާޖަށް ކުރާ އަސަރުތައް:

ކަންކަމާދޭތެރޭ ރަނގަޅަށް ހީކުރެވުން، ދުނިޔެއާއިގެން  އުޅުން ކުޑަވުން، ރޫޙާނީ ކަންކަމަށް ސަމާލުކަން ދެވުން، އަމިއްލަ އެދުންތައް ކުޑަވުން، ނަފުސާ ދޭތެރޭ ދެކޭގޮތް ރަނގަޅުވުން.

ޞިއްޙަތަށް ކުރާ އަސަރުތައް:

ނިދި އަރާމުވުން، ބަލިތަކުން ދުރުވުން، ޢުމުރު ދިގުވުން، ގައިގައި ވަރު ޖެހުން، ކަސްރަތު ކުރުން ގިނަވުން.

ޖަޒުބާތަށް ކުރާ އަސަރުތައް

ހަނދާންތައް އުފާވެރިވުން، ހަސަދަވެރިވުން ކުޑަވުން، ސްޓްރެސް (ހާސްކަން ނުވަތަ ފިއްތުންތައް) ކުޑަވުން، ހިތްހަމަ ޖެހުން، މުރަނަކަން ކެނޑުން (މަރަނަވުން ނުވަތަ ހިތާމަވެރިކަމަކުން އަވަހަށް އަރައިގަތުން)

އިޖްތިމާޢީ އަސަރުތައް

މީހުންނާ އެކުވެރިވުން ފަސޭހަވުން، ކައިވެނި އުފާވެރިވުން، އިޙްތިރާމް ލިބުން ބޮޑުވުން، ރަޙްމަތްތެރިން ގިނަވުން، ގުޅުންތައް ބަދަހިވުން.

ވަޒީފާއަށް ކުރާ މަންފާތައް

މީހުން މެނޭޖްކުރުން ފަސޭހަވުން، އޮފީހުގެ ގުޅުންތައް ބޮޑަށް ލާމެހިވުން، މަޤްޞަދުތައް ޙާޞިލްވުން، ނިންމުންތައް ހަރުދަނާ ވުން، އުފެއްދުންތެރިކަން އިތުރުވުން.

އާއެކެވެ! ތިޔަ ހިތަށް އަރާ ސުވާލުތައް އަހަރެންނަށް އަޑު އިވޭކަހަލަ އެވެ. މިހާ ގިނަ މަންފާތަކެއް ޝުކުރުވެރިވުމުގައި ހަމަވޭ ހެއްޔެވެ؟ މިއީ ކަޅުދިރި ވިއްކާ މީހުންވެސް ދައްކާ ކަހަލަ ވާހަކަ އެކެވެ. ޝައްކު ކުރައްވާނަމަ، މި ދިރާސާ ރިޕޯޓް ކިޔާށެވެ! ވަގުތު ނެތްނަމަ، މި ވީޑިއޯ ބަލާލަ ބަލާށެވެ.

ދެން ތިކުރާ ސުވާލު ވެސް އަހަރެންނަށް އަޑުއިވޭ ކަހަލައެވެ. ޝުކުރުވެރިވާނީ ކިހިނެތް ހެއްޔެވެ؟ 2024 ވަނަ އަހަރު އަންނާކަށް ވަގުތެއް ނެތެވެ. ޝުކުރުވެރިވާން ދަސްކުރާނީ ކިހިނެތް ހެއްޔެވެ؟ މި ސުވާލުގެ ޖަވާބުގައި އެކި ފަރާތްތަކުން އެކި ކަންކަން ލިސްޓް ކޮށްފައި ހުރެއެވެ. ތިރީގައި މި ވަނީ ބައެއް މިސާލެވެ.

ޝުކުރުވެރިވާން ސިޓީއެއް ނުވަތަ މެސެޖެއް ލިޔުން. މިހާރުވެސް އަތުގައި ތިއޮތީ ފޯނެވެ. ޝުކުރުވެރިވާންވީ މީހަކަށް ޝުކުރުވެރިވެފައި މެސެޖެއް ފޮނުވާލަންވީ ނޫންހެއްޔެވެ؟ އެންމެ ރަނގަޅުވާނީ އަތުން ނޯޓެއް ނުވަތަ ނުވީތާކު އީ-މެއިލެއްވެސް ފޮނުވާލެވުނު ނަމައެވެ. މިފަދަ ސިޓީއެއް މަހަކު އެއް ފަހަރު ކޮންމެވެސް މީހަކަށް ފޮނުވާނަމަ، ތިބާ ހިނގާނީ އެންމެ އުސް “ނުވަ ވަނަ ވިލާގަނޑު” ގައެވެ. ބައެއް ފަހަރު އަމިއްލަ ނަފުސަށް އެފަދަ ސިޓީއެއް ލިޔެލުންވެސް ރަނގަޅުވާނެއެވެ.

ފިކުރުން މީހަކަށް ޝުކުރުވެރިވުން. އަމިއްލަ ޚިޔާލުން މީހަކު ކޮށްދީފައިވާ ކަމަކަށް ޝުކުރުވެރިވުމަކީ ވެސް މަތިވެރި ހިތްހަމަ ޖެހުމެއް ލިބޭ ކަމެކެވެ.

ޝުކުރުވެރިވާ ކަންތައްތައްތަކުގެ ޑައެރީއެއް ލިޔުން. ބައެއް މީހުން އެމީހުން ޝުކުރުވެރިވާން ޖެހޭ ކަންތައްތައް ފާހަގަކޮށް ކޮންމެ ދުވަހަކު ޑައެރީއެއްގައި ލިޔެއެވެ. ފަހެ އެއީވެސް، ހިތްހަމަ ޖެހުން ލިބޭ ކަމެކެވެ.

ހަފުތާއަކު ފަސް ނިޢުމަތެއް ލިޔުން. ތިމާއަށް ލިބިފައިވާ ފަސް ނިޢުމަތެއް ނުވަތަ އެހެން ވެސް ޢަދަދެއްގެ ލާބަތައް ލިޔެލުމަކީ ޝުކުވެރިވުމުގެ އާދަ ތިމާގެ ކިބައިގައި އަށަގެންނު ވޭނޭ ކަމެކެވެ. މިފަދަ ކަންތައްތައް ލިޔާއިރު، ވީހާ ވެސް ޞަރީޙަކޮށް ލިޔުން ރަނގަޅުވާނެއެވެ.

ދުޢާކުރުން. ލިބިފައިވާ ނިޢުމަތްތަކުގެ މަތިން ހަނދާންކޮށް އެ ނިޢުމަތްތަކަށް ކޮންމެ ދުވަހަކު މާތް ﷲ އަށް ޝުކުރުވެރިވުމަކީ ވެސް ޝުކުރުވެރިވުމުގެ އާދައިގެ ތެރޭގައި ހިމެނިދާނޭ ކަމެކެވެ. މި ފަދަ ދުޢާ ތަކުގައި ތިމާއަށް ލާބަ ދިން ފަރާތްތައް ފާހަގަކޮށްލެވިދާނެ އެވެ.

އާދެ! 2024 ވަނަ އަހަރު އުފާވެރި އަހަރަކަށް ހެދުމަށް ތިބާ މަސައްކަތް ކުރަންވީ އެކަމުގެ ސަބަބުން ތިބާއަށް ހިތްހަމަޖެހުން ލިބޭތީއެވެ. ޝުކުރު ރައްދުވާ މީހާއަށް ކުރާ އަސަރަށްވުރެ ތިބާއަށް ކުރާ ހެޔޮ އަސަރުތައް ބޮޑުވާނެއެވެ. ހަމަ މިއާއެކު، ތިމާ މީހަކަށް ކޮންދޭ ހެޔޮކަމެއްގެ ބަދަލުގައި އޭނާ ކަމެއް ކޮށްދީފާނެ ކަމަށް އުއްމީދުކޮށްގެން، ބަލައިގެން ނުވާނެއެވެ. އިންސާނާގެ ޠަބީޢަތަކީ ޝުކުރުވެރި ނުވުމެވެ.

4 އުފާވެރި ޚިޔާލުތަކާ އެކު އަވަދިނެތި އުޅޭށެވެ.

އުފާވެރިކަން އިންސާނާގެ ކިބައިން ގެއްލޭ ސަބަބަކީ، ކަންކަމާ ފިކުރުކުރާނޭ—ވެދާނޭގޮތާ މެދު ކަންބޮޑުވާނޭ—ވަގުތު އޮތުމެވެ. މިވަގުތު ނެތުމަކީ މީހާ އުފާވާނޭ ކަމެކެވެ. އެއީ އެ ފިކުރުތަކުން ހިތް މޮޅިކުރާނޭ ފުރުޞަތު ނޯންނާނެތީއެވެ. އެހެންވެ، 2024 ވަނަ އަހަރަކީ އުފާވެރި އަހަރަކަށް ހަދަން ކުރަން ފެންނަ އެންމެ ރަނގަޅު ކަމަކީ އަވަދި ނެތި އުޅުމެވެ. ކުރާހިތްވާ ކަންތައްތަކެއް ކުރުމުގެ މަސްޣޫލުވުމެވެ. އުފާވެރި ޚިޔާލުތަކުން ހިތް ފުރާލުމެވެ.

އުފާވެރިވުމާ ބެހޭ ލިޔުންތަކުގައި، ސޯޝަލް މީޑިއާގައި ގިނަ ވަގުތު ނުއުޅޭންވެސް ލިޔެފައި ހުރެއެވެ. މިއީ ހިތްދަތިކަމުގެ ބަލި ޖެހޭ ކަމެކެވެ. ދުވާލަކު އެއްފަހަރު އީމެއިލް ބަލާފައި، ވަގުތުން ޖަވާބުދީ އެކަން ނިންމާލާށެވެ. އެހެންމީހުން އުޅޭނޫޅޭ ގޮތް ބަލަން ފޭސްބުކް އާއި އެހެން އެފަދަ ކަންކަމަށް ވަގުތު ނަގާނުލާށެވެ. ގިނަ މީހުން ފޭސްބުކް އަށް ޕޯސްޓުކުރަނީ އެމީހުންގެ އެންމެ އުފާވެރި ވަގުތުތަކުގެ މަންޒަރުތަކެވެ. އެފަދަ ވަގުތުތައް އެމީހުންގެ ޙަޔާތަށް ވެސް އަންނަނީ ފޮއިދުވަހުން އެއް ފަހަރަށް ވުރެވެސް ނާދިރުކޮށެވެ. އެއީ އަކީ އެމީހުންގެ ޢާންމު ދިރިއުޅުމުގެ ކަންތައްތަކެއް ނޫނެވެ. މި މަންޒަރުތައް ފެނިފައި، އެކަންކަމަށް ހެއްލިގެން، އެމީހުންގެ ދިރިއުޅުމާއި ތިމާގެ ދިރިއުޅުމާ އަޅާ ކިޔާ ދެރަވުމުގެ ބަދަލުގައި، އެފަދަ ކަންކަމުގެ ޙަޤީޤަތަށް ވިސްނާށެވެ. މިފަދަ ބޭކާރު ކަންކަމުގައި ޙަޔާތުގެ ވަގުތުތައް ނަގާލުމުގެ ބަދަލުގައި، އެހެންމީހުންނަށް އެހީތެރިވުމުގައި، ނުވަތަ ތިމާކުރާ ހިތްވާ ކަންތައްތައް ކުރުމުގައި އަވަދިނެތި އުޅޭށެވެ.

މީހުން ކަންކަމާ ފިކުރުބޮޑުވެ ހިތްހަމަ ޖެހުން ގެއްލިދަނީ ދެރަވާންޖެހޭ ފަދަ ކަންކަމާ ފިކުރުކުރާނޭ ވަގުތު އޮތީމައެވެ. އެއްވެސް ސިކުނޑިއަކަށް އެއްފަހަރާ ދެ ކަމަކާ ނުވިސްނޭނެ އެވެ. މިއީ ނަފްސާނީ ޢިލްމުގެ އެއް ތަރަހަ އެވެ. ޤަބޫލުކުރަން ދަތިނަމަ، މާދަމާ ކުރާނޭ ކަންތައްތަކާއި ތިބާގެ ރަށުގެ މަލަމަތި ދުރުން ފެންނަގޮތާ ދޭތެރޭ އެއްފަހަރާ ވިސްނާލަ ބަލާށެވެ. ޤަބޫލުކުރެވޭނީ އެއްކަމަކަށް ފަހު އަނެއް ކަމަކާ ދޭތެރޭ ވިސްނުނަސް، އެއްފަހަރާ ދެކަމާ ނުވިސްނޭ ކަމެވެ. މަޝްހޫރު ޢިލްމުވެރިޔަކު ބުނެފައި ވެއެވެ. ”ހިތްދަތިވުމުގެ ސިއްރަކީ، ތިމާހުރީ އުފާވެފައިތޯ ނުވަތަ ދެރަވެފައިތޯ ފިކުރުކުރާނޭ ހުސްވަގުތު ލިބުމެވެ.“ އެހެންވީމާ، އުފާވެފައިތޯ ނުވަތަ ދެރަވެފައިތޯ ވިސްނުމަށް ފުރުޞަތު ނުދީ އަވަދިނެތިއުޅޭ ދިރިއުޅުމެއް އުޅޭށެވެ. މިއީ ޑިޕްރެޝަން އަށް ނުވަތަ ހިތްދަތިވުމުގެ ބައްޔަށް އޮތް އެންމެ ބޮޑު ބޭހެވެ. މި ބައްޔަށް މިއަށް ވުރެ ބާރުގަދަ ބޭހެއް މި އުޑުދަށަކު ނުވެއެވެ.

އުފަލަކީ އަދި ހިތާމައަކީ ޝުޢޫރެކެވެ. ތިމާގެ ފިކުރު އެހެން ގޮތަކަށް ބަދަލުކޮށްލެވިއްޖެ ނަމަ، މީހާއަށް އުފާވެސް އަދި ދެރަވެސް ވެވިދާނެއެވެ. އަހަރުމެންގެ ޝުޢޫރުތައް ކޮންޓްރޯލް ކުރަނީ އަހަރުމެންގެ ފިކުރެވެ. ޢިލްމުވެރިއެއްގެ ކައިރީގައި ސުވާލު ކުރެވުނެވެ: ”ކަލެއަށް ކިޔެވުމުން ދަސްވި އެންމެ ބޮޑު ފިލާވަޅަކީ ކޮބައިހެއްޔެވެ؟“ އެ ސުވާލުގެ ޖަވާބުގައި އޭނާ ބުނީ އެއީ އަހުރެމެން ވިސްނާގޮތުގެ މުހިއްމު ކަމެވެ. އަހަރެންނަށް ތިބާ ވިސްނާ ގޮތް އެނގޭނަމަ، ނުވަތަ ވިސްނާ ކަންތައްތައް އެނގޭނަމަ، އަހަރެންނަށް ތިބާ އެނގޭނެއެވެ. އަހަރުމެން، އަހަރުމެންނަށް ވަނީ، އަހަރުމެންގެ ފިކުރުންނެވެ. ވިސްނާ ގޮތުންނެވެ. ކޮންމެ މީހަކު ވާހުށީ މުޅި ދުވަހު އޭނާ ވިސްނާ ފަދައިންނެވެ. ރަނގަޅު ފިކުރުތަކެއް އަހަރުމެންގެ ސިކުނޑީގައި ގެންގުޅޭނަމަ، އަހަރުމެން ރަނގަޅުވާނެއެވެ. އަދި ގޯސް ފިކުރުތަކެއް އަހަރުމެންގެ ސިކުނޑިގައި ގެންގުޅޭނަމަ…… އަހަރުމެންގެ ދިރިއުޅުމަކީ، އަހަރުމެންގެ ޙަޔާތަކީ އަހަރުމެންގެ ފިކުރުން ބައްޓަން ކުރާ އެއްޗެކެވެ. އަހަރުމެންގެ ސިކުނޑި އުފާވެރި ޚިޔާލުތަކަކުން ފުރާލާނަމަ، އަހަރުމެން އުފާވާނެއެވެ. އަހަރުމެންގެ ސިކުނޑި ހިތާމަވެރި ޚިޔާލުތަކަކުން ފުރާލާނަމަ، އަހަރުމެން ދެރަވާނެއެވެ. އަހަރުމެންގެ ސިކުނޑި ބަލިމަޑުކަމުގެ ޚިޔާލުތަކަކުން ފުރާލާނަމަ އަހަރުމެން ބަލިވާނެއެވެ. ފޭލިވުމުގެ ޚިޔާލުތަކުން ފުރާލާނަމަ، ފޭލިވާނެއެވެ. އެހެން މީހުން އަހަރުމެން ދެކޭނީ އަހަރުމެން އަހަރުމެން ދެކޭ ގޮތަކަށް ނޫނެވެ. އެމީހުން އަހަރުމެން ދެކޭނީ އަހަރުމެން ވިސްނާ ގޮތަށެވެ. އަބަދު މޮޅީގައި އުޅޭނަމަ، އަހަރުމެން ކައިރީގައި މަޑުކުރާނީ ކޮން ރައްޓެއްސެއް ހެއްޔެވެ؟ އަހަރުމެންނާ ވާހަކަ ދައްކާނީ ކޮން ބައެއް ހެއްޔެވެ؟ ހަބަރު ކިލޯއަކަށް ހިނި ނާރާ ވަރަށް ހަކުރު ސަމުސަލަކަށް ހިނި އަރައެވެ.

އަހަރުމެން މި ދައްކަނީ އުފަލުން އުޅުމަށްޓަކައި، އަވަދިނެތި އުޅެންޖެހޭ ވާހަކައެވެ. އަދި މި އަވަދިނެތިއުޅުމުގެ ސަބަބުން، ހިތާމައިގެ ޚިޔާލުތަކަށް ޖާގަ ނުދިނުމުގެ ވާހަކައެވެ. ފިކުރުކުރާނަމަ، އުފާވެރި ޚިޔާލުތައް ކުރުމުގެ ވާހަކައެވެ. ވަރަށް ގިނަ މީހުން ހީކުރަނީ އަހަރުމެންގެ ޝުޢޫރުތައް އުފެދެނީ ޙަރަކާތްތަކަށް ފަހު ކަމަށެވެ. ނަމަވެސް، ޝުޢޫރުތަކާ ޙަރަކާތްތައް ވަނީ ލާމެހިފައެވެ. އަދި ޙަރަކާތްތައް އަހަރުމެންނަށް މާ ފަސޭހައިން ކޮންޓްރޯލް ކުރެވެއެވެ. އެހެންކަމުން ޝުޢޫރުތައް ކޮންޓްރޯލް ކުރުމަށް ޙަރަކާތްތައް ބޭނުން ކުރެވިދާނެއެވެ. ވީމާ، އަމިއްލަ ޙަޔާތުގައި އުފާވެރިކަން ނެތްނަމަ، ވަރަށް އުފަލުން އުޅޭ މީހެއްހެން ޙަރަކާތްތައް ހުރުމުން، އެމީހަކު އުފާވާނެއެވެ. ތިބާ ރުޅިއައިސްގެން ހުރެ ހިނިތުން ވެލަ ބަލާށެވެ. އެއީ ކުރެވޭނޭ ކަމެއް ނޫނެވެ. އެހެންކަމުން، ހިނތުން ވެލައިފިނަމަ، ތިމާގެ ފިކުރުވެސް، ޝުޢޫރުތައް ވެސް ހިނިތުން ވާނެއެވެ. ވީމާ އުފަލުން އުޅެން، ތި މޫނަށް ހިތްގައިމު ހިނިތުންވުމެއް ގެނެސްފައި، ދެކޮޑު ފަހަތަށް އިތިކޮށްލާފައި، ހިތްވަރާއެކު ކުރިއަށް ހިނގައިގަނެ ބަލާށެވެ. އޭރުން ތިބާ ހުންނާނީ އުފަލުންނެވެ. މިހެން އުޅޭއިރު، ބައެއް މީހުން މޮޔައެކޭ ހީކުރިއަސް އަޅާނުލާށެވެ. ބަލަ އަހަރެންނަކީ ސޭކެކޭ ހީކުރާ މީހުންނެއް ވެސް ވަކި މަދެއް ނޫނެވެ.

5 ޙަރަކާތްތެރިވެ ކަސްރަތު ކުރާށެވެ.

ކަސްރަތު ކުރުމަކީ ޙަޔާތުގެ ކޮންމެ ބައްޔަކަށް، ހަނދާން ނެތުމާއި ހިތްދަތިވުމުގެ ބައްޔަށާއި ތުރުތުރު އަޅާ ޕާރކިންސަން ބައްޔާއި އަލްޒައިމާ ބައްޔަށް ދާންދެން، ފަރުވާ އެއްކަމަށް ޢިލްމުވެރިން ބުނާތާ އެތައް ޒަމާނެއް ވެއްޖެއެވެ. މިކަމަކީ ހަށިގަނޑު ރީތިކޮށް ބެހެއްޓުމަށާއި އުފާވެރިވުމަށް ވެސް ޝިފާއެކެވެ. މަގުމަތިން މިހާރު ބައްދަލުވާ ކޮންމެ 10 އަންހެނުންގެ ތެރެއިން 9 އަންހެނުންނަކީ ފަލަ އަންހެނުންކަމަށް ފާހަގަ ކުރެވެއެވެ. އެމީހުންގެ ކައިރީގައި އެ ޢުމުރުގައި އެމީހުންގެ މަންމަމެން ތިބީ ކޮން ސިފައަކަށްތޯ އަހައިފިނަމަ، ގިނަ މީހުން ބުނާނީ އެމީހުންނަށް ވުރެ ރޫފަ ރަނގަޅުކޮށް، ލޫޅާފަތިކޮށް ކަމާ މެދު ޝައްކެތް ނެތެވެ. ވޭތިވެދިޔަ 15 ވަރަކަށް އަހަރުގެ ތެރޭގައި، ތަފާތު އެކި ސަބަބުތަކާ ހުރެ ފިރިހެނުންނާއި އަންހެނުން އެކަށީގެންވާ ވަރަށް ވުރެ ފަލަވެއްޖެ އެވެ. މިއީ ޢާއްމު ޞިއްޙަތުގެ ބޮޑު މައްސަލައެއްގެ ގޮތުގައި ބަލަން ވެއްޖެ ކަމެކެވެ. ބުރަވުމާއި ހިތްދަތިވުމާއި މޮޅިވެރިކަމުގެ އެއް ކޮންޓްރޯލަކީ ހަރަކާތްތެރިކަން އިތުރު ކުރުމެވެ.

ޤަބޫލުކުރަން ދަތިވެދާނެއެވެ. ނަމަވެސް، ހަށިގަނޑުގެ އެކިއެކި ކަންތައްތައް ކޮންޓްރޯލް ކުރަނީ ނުވަތަ އެއް މިންވަރެއްގައި ހިފަހައްޓަނީ ހަށިގަނޑުން އުފައްދާ އެކި އެކި ބާވަތްތަކުގެ ދިޔަތަކަކުންނެވެ. މީގެ ތެރެއިން އުފާވެރިކަމާ ގުޅިފައިވާ ދިޔައެއް ނުވަތަ ހޯމޯން އެއް ވެސް ވެއެވެ. ކަސްރަތުކޮށް ނިންމާލުމުން، އުފާވެރިކަމާ ބެހޭ ހޯމޯނުތައް އުފައްދައެވެ. ނަތީޖާއެއްގެ ގޮތުން އިންސާނާއަށް އުފާވެރިކަމާއި ހިތްހަމަޖެހުން އިޙްސާސް ކުރެވެއެވެ. ބައެއް މީހުން ކަސްރަތަށް ދެވިހިފަނީ ވެސް މިގޮތުގެ މަތިންނެވެ. ތިރީގައިވާ ކުރެހުމުން އެ ފެންނަނީ ހަމަ އެކަނި ވިހި މިނެއްޓުގެ ހިނގާލުމަކަށް ފަހު، ސިކުނޑިއަށް އަންނަ ބަދަލެވެ.

brainafterex

ކޮންމެ ދުވަހަކު ހިނގުމަކީ ވެސް، އުފާވެރިކަމުގެ ގޮތުން ބަލާއިރު މުހިންމު ކަމެކެވެ. އުފާވެރިކަމުގެ އަސަރުތައް އުފެއްދުމަށް ބޭނުންވަނީ ކޮންމެ ދުވަހަކުވެސް ހަމައެކަނި 20 މިނެއްޓު ވަންދެން ހިނގާލުމެވެ. ނަމަވެސް އާދަވުމުން، އެއް މިންވަރެއްގެ އުފާވެރިކަމެއް ގެނައުމަށް ގިނަ އިރު ހިނގަން ޖެހެއެވެ. ވިހި މިނެއްޓު ހިނގާ މީހަކާއި، ނުހިނގާ މީހަކަށް ހަނދާން ގަދަ މިންވަރު ބަލާ ޓެސްޓެއް ދިނުމުން ހިނގާ މީހާ ކޮންމެ ފަހަރަކުވެސް މޮޅު ވެއެވެ. ހަނދާން ގަދަވުމާއި އެހެން މަންފާތައް ވަނީ ހަރަކާތްތެރިވުމުގައެވެ.

ސައިންސްވެރިން ބުނާގޮތުގައި، ބައެއް ބާވަތްތަކުގެ ބޭސް ބޭނުން ކުރުމަށް ވުރެ ވެސް، އިންސާނާ ހިތާމައިގެ ބަލިން (ޑިޕްރެޝަން އިން) ސަލާމަތްވުމަށް ކަސްރަތު މާ ރަނގަޅެވެ. އިންސާނާއަކީ ހަރަކާތްތެރިވުމަށް ހައްދަވާފައިވާ މަޚުލޫޤެކެވެ. އެއްތާކު އިންނަގޮތަށް ހައްދަވާ ފައިވާ މަޚުލޫޤެއް ނޫނެވެ. އެހެންކަމުން ޙަރަކާތްތެރިވުމަކީ ޠަބީޢީ ސިފައެކެވެ. އުފާވެރިކަން ގެނެސްދޭނޭ ކަމެކެވެ. ކަސްރަތު ކުރުމުގެ ގޮތުން ޙަރަކާތްތެރިވުމުގެ އެހެން ފައިދާތަކުގެ ތެރޭގައި، ފަސޭހައިން އަރާމު ނިދިއައުމާއި، ނަފްސަށް އޮންނަ ޔަޤީންކަން އިތުރުވުމާއި، ނުތަނަވަސް ކަން ކުޑަވުން ވެސް ހިމެނެއެވެ.

2024 ވަނަ އަހަރަކީ ތިބާގެ އެންމެ އުފާވެރި އަހަރަށް ހެދުމަށް، ކޮންމެވެސް ބާވަތެއްގެ ކަސްރަތެއް ފަށަންވީ ނޫންހެއްޔެވެ؟ ދަރިއެއްގެ ކިބައިގައި މއިންބަފައިންނަށް ޙައްޤުތަކެއް ވާފަދައިން، ތިބާގެ ނަފުސު ދިރިއުޅޭ ޖިސްމަށް ވެސް ޙައްޤުތަކެއް ވެއެވެ. އެއީ އެ ހަށިގަނޑު ރަނގަޅަށް ބެލެހެއްޓުމެވެ. ހަށިގަނޑަށް ބޭނުންވާ ކަންތައްތައް ކޮށްދިނުމެވެ. މަދުވެގެން ކޮންމެ ދުވަހަކު 20 މިނެއްޓު ހިނގާލަންދާންވީ ނޫން ހެއްޔެވެ؟ މާދަމާ އެކަން ފެށުން ކިހިނެއް ވާނެ ހެއްޔެވެ؟

ކުރީގައި ބަޔާންކުރެވުނު ފަސްކަންތައް ކޮށްފިނަމަ، 2024 ވަނަ އަހަރަކީ ތިބާގެ ހަޔާތަށް އައި އެންމެ އުފާވެރި އަހަރަށް ވާނޭ ކަމާ މެދު އެއްވެސް ޝައްކެތް ނެތެވެ. އެ ފަސް ކަމަކީ މާޒީއާއި މުސްތަޤްބަލްގެ ބުރަ ފިކުރުތަކުން އެއްކިބާވެ، މި ހިނދުގައި ދިރިއުޅުމާއި، އަނިޔާތަކާއި ހިތާމަތައް މެދުވެރިކުރި ފަރާތްތަކަށް މަޢާފުކޮށްފައި ކުރިއަށް ދިއުމާއި، އެކި ފަރާތްތަކުން ލިބިފައިވާ އަދި ލިބެމުންދާ އެހީތެރިކަމާއި އަޅާލުންތެރިކަމަށް ޝުކުރުވެރިވުމާއި، ހިތްދަތި ޚިޔާލުތަކަށް ޖާގަނުދީ އުފާވެރި ޚިޔާލުތަކުގައި އަވަދިނެތި އުޅުމާއި، ގަހެއްގެ ބުޑުގައި އައްސާފައި އިން ކުކުޅެއް ހެން އުޅޭތަނުގައި ނޫޅެ، ތަންތަނަށް ހިނގާބިނގާވެ ކަސްރަތުކުރުމެވެ.

އަހަރެން އެދެނީ 2024 ވަނަ އަހަރު އެއީ، ތިބާގެ ހަޔާތަށް އައި އެންމެ އުފާވެރި އަހަރަށްވެގެން ދިއުމެވެ.