ތައާރަފު

ރިހަތަކާއި ބިރިޔާނި ތަކާއި ސުރުވާ ތަކުގައި މީރު ރަހަ ލެއްވުމަށް ބޭނުން ކުރާ ތަކެތީގެ ތެރެއިން މޮޅު ކެއްކުންތެރިން ބޭނުން ކުރާ، އަދި އާދައިގެ ކެއްކުންތެރިން ބޭނުން ނުކުރާ އެއް ފަތަކީ، ތީޒު ފަތެވެ. މިއީ ހިއްކައިގެން ބޭނުން ކުރާ، ހިކަދި އެއް ފަތުގެ ބައްޓަމަށް ހުންނަ ފަތެކެވެ. ގަސް ހައްދާގޮތުގެ ވާހަކަ ދެންނެވުމުގެ ކުރިން، މި ބޭނުންތެރި ފަތަށް ކުރު ތަޢާރަފެއް ބަޔާން ކުރާނަމެވެ. އަޅުގަނޑުގެ އިތުރުން އެހެން ދެތިން މީހަކު ތީޒު ގަސް ހައްދަމުން ގެންދާނެއެވެ. މި މަޒުމޫނު ލިޔުމުގެ ބޭނުމަކީ ރާއްޖެތެރޭގެ ކޮންމެވެސް ރަށެއްގައި ތީޒު ގަސް ހައްދައިގެން، މިފަތް ބާޒާރަށް ޕެކެޓްކޮށް ވިއްކައިގެން ރަށްފުށުގެ ތަނަވަސްކަން އިތުރުކުރުމަށް ހިތްވަރު ދިނުމެވެ.

ދެކުނު އޭޝިޔާގެ ހުރިހާ ޤައުމެއްގައި ވެސް މައިގަނޑު ކާތަކެތި ކައްކާ އިރު ތީޒުފަތަކީ ބޭނުން ކުރާ ފަތެކެވެ. މިފަތަށް ސިންގަޅަބަހުން ވަކި ޚާއްޞަ ނަމެއް ނެތުމުން (බේ කොළ) ތީޒުފަތް ރާއްޖެއަށް ޢާއްމު ވެފައިވާނީ ބޯރާ ވިޔަފާރިވެރިންގެ ދުވަސްވަރުކަމަށް ލަފާ ކުރެވެއެވެ. އެއީ މީގެ 150 ވަރަކަށް އަހަރު ކުރިންނެވެ. ބޭ ލީފް ނުވަތަ ތީޒުފަތަށް އުރުދޫ ބަހުންނާއި ހިންދީ ބަހުން ކިޔަނީ ތީޒު ފަތެވެ. ހިންދީ ބަހުން ޒަވިޔަނީގެ އަޑު ޢާއްމުކޮށް ނުކިޔާތީ، ޒަވިޔަނި ޖަވިޔަންޏަށް ކިޔައެވެ. ޕާކިސްތާނު ސަރަޙައްދުގެ ގިނަ ބަސްބަހުން މިފަތަށް ކިޔަނީ ތީޒު އާ ވަރަށް އެއްވައްތަރެއްގެ ނަމަކުންނެވެ. ރާއްޖޭގައި ތީޒުގަސް ޢާއްމު ނޫންކަމުން މިފަތް ބާޒާރުން ގަންނަން ލިބޭނީ ހިއްކާފައި ހުއްޓައެވެ. ކެއްކުމުގައި ޢާއްމުކޮށް ބޭނުން ކުރަނީ ހިއްކި ފަތެވެ. ގަރަމް މަސާލަ ކިޔާ އިންޑިޔާ އިން ގެންނަ މުގުރި ހަވާދުގައި މި ފަތް ހިމަނާފައި ވެއެވެ.

ހިކަދިފަތާއި އެހެން ފަތްފަތުގައި ރަހަ ހުންނަ ގޮތަށް ތީޒުފަތް ހަފާލުމުން ލާނީ ބާވަތެއްގެ ހިތި ރަހައެކެވެ. ނަމަވެސް، ފެނުގައި ގިނަ އިރުވުމުން ފޮނިތޮށީގެ ރަހަ ފަދަ ރަހައެއް ހުރެއެވެ. މިފަތް އަންދާލުމުން މީރުވަހެއް ދުވައެވެ. މިހެންކަމާއި އެކު، ތީޒު ފަތަކީ ހުވަދާއި އަތަރުތައް ހެދުމަށް ބޭނުން ކުރާ ފަތެއް މެއެވެ. މި ފަތް ކެއްކުމުގައި ބޭނުންކުރާނީ ގިނަ އިރު ކައްކާ ތަކެތީގައެވެ. ޚާއްޞަކޮށް ބިރިޔާނި އާއި ސުރުވާ (ސޫޕް) ތަކުގައެވެ. މި ޖުމުލައަށް ފިތާލުމުން ފެންނަ ރެސިޕީގައި، ތީޒުފަތް ބޭނުން ކުރާނީ އެއްކުކުޅުގެ ބިރިޔާންޏަކަށް ހަތަރުފަތް ކަމަށް ބުނެފައި ވެއެވެ. އެކަކަށް ކައްކާ އެއްޗެއްގައި އެންމެ ފަތެކެވެ. އާދެ! ވަރަށް މަދު މިންވަރަކުން ރަހަ ތަފާތުކޮށްލާ ފަތެކެވެ. ތީޒުފަތް ގަރުދިޔައިގެ ރަހަ މީރުކުރުމަށް ވެސް ބޭނުން ކުރެވޭނެ އެވެ. ފެންވަރު ރަނގަޅު ރެސްޓޯރަންޓް ތަކުގައި ހިކަދިފަތް، ކެއްކުމުގައި ބޭނުން ކުރިއަސް، ކާން ގެެންނައިރު ފަތްތައް ހުންނާނީ ނަގާފައެވެ. ނޫނީ ފަތް ބޭނުން ކުރާނީ ކޮށައިގެންނެވެ. ތީޒުފަތް ބޭނުން ކުރިއަސް، މީހުންނަށް ކާން އަޅާއިރު،  ފަތްތައް ނަގަންވާނެއެވެ.

ފަތުގެ މަންފާތައް

ތީޒު ފަތުގެ އާދަޔާ ޚިލާފުކަމަކީ އެއިން ކުރާ އެހެން މަންފާތަކެވެ. އެއީ ވަރަށް ގިނަ މަންފާ ތަކެކެވެ. މިއިން އެއް މަންފާ ”ސަން“ ނޫސް ވެބްސައިޓްގައި ވެސް ވެއެވެ. ތިރީގައި މި ބަޔާންކޮށްލަނީ ފަތުގެ އެހެން މަންފާތަކެވެ.

1. ސަމާލުކަން އިތުރުވެ ވަރުބަލިކަން ފިލުން: ތީޒުފަތް އެންދުމުން ނުކުންނަ ދުން ހަށިގަނޑުގެ އެތެރައަށް ދިއުމުން، ސަމާލުކަން ބޮޑުވެ، ވަރުބަލިކަން ފިލައެވެ. މީހާ އަށް ހަމަހިމޭންކަން ލިބެއެވެ.

2. ނޭވާހިއްލުމާއި ފުއްޕާމޭގެ ބަލިތަކުން ސަލާމަތްވުން: ތީޒުފަތް، ހޫނު ފެނަށް އަޅައި އެއިން އުފެދޭ އާވި ހަށިގަނޑުގެ އެތެރެއަށް ދިއުމުން، އަރުދަފުހާއި މޭގައި ހިފާރޯގާތަކުން ލުއިކަން ލިބެއެވެ. މިފަތުގެ ތެޔޮ މޭގައި އުނގުޅުމުން ވެސް މިފަދައެވެ.

3. ބޮލުން ހަންފޮޅުމުންރައްކާތެރިކަން ލިބުން: ތީޒު ފަތުގެ ތެޔޮ ޝޭމްޕޫއަށް އަޅައިގެން ބޭނުން ކުރުމުން، ބޮލުގެ ހަންފޮޅުން ހުއްޓެއެވެ.

4. ހަކުރުބަލީގެ ފަރުވާއެއް: މި ފަތުގެ ތިން ގުރާމް ދުވާލަކު ކެއުމުން ހަކުރު ދަށް ވެއެވެ. އަދި ކޮލެސްޓްރޯލް ވެސް ދަށްވެއެވެ. މިކަން އިޢުލާނުކުރި ސައިންސްވެރިންގެ މަޒުމޫނު މިއޮތީއެވެ.

5. ހަޖަމު ރަނގަޅުވުން: ދެކުނު އޭޝިޔާ އާއި އިރުމަތީ އޭޝިޔާގައި، ހަޖަމު ރަނގަޅު ކުރުމަށް ތީޒުފަތުގެ ތެޔޮ ބަނޑުގައި އުނގުޅައެވެ. މި ނޫންގޮތްގޮތަށް ވެސް ފަތް ބޭނުން ކުރެއެވެ.

6. ކޮލެސްޓްރޯލް ދަށް ކުރުމާއި ހިތް ރަނގަޅުވުން: ތީޒުފަތް ކެއުމުން ހިތުގެ ލޭނާރުތައް ސާފުވެ ކޮލެސްޓްރޯލް ދަށްވާކަން ކުރިން ބަޔާން ކުރެވުނު މަޒުމޫނުގައި ވެއެވެ. ތީޒުފަތް ބޭނުން ކުރާ އެއްގޮތަކީ، މުށިމަސް ފަދަ މަހެއްގެ ވަށައިގެން ފަތް ޖަހައި ތަނޫރެއްގައި (އަވަން އެއްގައި) ފިހުމެވެ. މިއޮތީ ރެސިޕީ އެކެވެ.

7. ހުޅުތައް ދުޅަވުމުން ސަލާމަތް ވުން: ތީޒުފަތުގެ ތެޔޮ ހުޅުތަކުގައި އުނގުޅުމުން ދުޅަވުން ރަނގަޅު ވެއެވެ. މި ފަތް ކެއުމުގައި ބޭނުން ކުރުމުން ދުޅަވުން މަދުވެއެވެ.

8. ކުޑަކަމުދާ ނިޒާމުގެ ބަލިތަކަށް ބޭހެއް: ކެއުމުގައި ތީޒުފަތް ބޭނުން ކުރުމުން، ނުވަތަ ކިރަށް މުގުރިފަތް އަޅައިގެން ބޭނުން ކުރުމުން، ކުޑަކަމުދާ ނިޒާމަށް ޖެހޭ ބަލިތަކުން ރައްކާތެރިކަން ލިބެއެވެ.

9. ކިޑްނީ ހިލައަށް ފަރުވާއެއް: މި ޢިލްމީ ދިރާސާ ބުނާގޮތުން ތީޒުފަތް ކެއުމުން ކިޑްނީގައި ހިލަ އުފެދުމަށް ހުރަސް އަޅައެވެ. ޤަބޫލުފުލުކުރަން ދަތިފުޅުނަމަ، މިއޮތީ ޢިލްމީ ދިރާސާގެ ރިޕޯޓެވެ.

10. ފިޓް ޖެހުމަށް ހުރަސް އަޅާ ބޭހެއް: ތީޒު ފަތަކީ ފިޓް ޖެހުން ކޮންޓްރޯލް ކޮށްދޭނޭ އެއްޗެއްކަމަށް، މި ރިޕޯޓް ބުނެއެވެ. އެއީ މީދާ ބޭނުންކޮށްގެން ކުރި ދިރާސާއެއްގެ މައްޗަށް ބުރަވެއެވެ.

11. ފާރުގަނޑުގެ ދުޅަވުން ތިރިކޮށްދޭ ބޭހެއް: ތީޒުފަތުގެ ތެލުން އޮއިންޓްމަންޓް ހަދާ އުނގުޅުމުން ފާރުގަނޑުގެ ވަށައިގެން ހުންނަ ދުޅަ ތިރިވާކަމަށް މި ރިޕޯޓް ބުނެއެވެ.

12. ކެންސަރަށް ފަރުވާއެއް: އުރަމައްޗަށް ޖެހޭ ކެންސަރުގެ ސެލްތައް ތީޒުފަތުގެ ތެލުން މަރާލާކަމަށް މި ރިޕޯޓް ބުނެއެވެ. އެހެންކަމުން، ތީޒު ފަތަކީ ކެންސަރު ބަލިން ރައްކާތެރިކަން ލިބޭ އެއްޗެއް ކަމަށް ބުނެއެވެ.

13. މުސްކުޅިވުން ލަސްކޮށްދޭ ބޭހެއް: މި ލިޔުން ބުނާގޮތުގައި، ތީޒުފަތަކީ، އެ ކެއުމުން، ހަށިގަނޑުގެ ސެލްތައް މުސްކުޅިކުރާ މާއްދާތަކުން ސެލްތައް ދަފަރާ ކުރާ އެއްޗެކެވެ.

14. ވިހެއުމަށް ފަސޭހަވުމާއި ކުދިންގެ އައިބު މަދުވުން: މި ލިޔުން ބުނާގޮތުން، މި ފަތް ބޭނުން ކުރުމުން، ކުދިންގެ އައިބު މަދުވެފައި ވިހަން ފަސޭހަ ވެއެވެ. އެއީ ފަތުގައި ފޯލިކް އެސިޑް ގިނަކަމުން ކަމަށް ބުނެއެވެ.

15. މައްސަރު ކަންތައް ތަރުތީބުވުމާއި ކުރިމަތި ފަރާތުން ދިޔައައުން ހުއްޓުން: ތީޒުފަތް ގަވާއިދުން ބޭނުން ކުރުމުން، މައްސަރުކަންތައް ވަކި ގަވާއިދަކަށް ފެތެއެވެ. އަދި ކުރިމަތި ފަރާތުން ދިޔަ އައުން ހުއްޓެއެވެ.

16. ނިދި އަންނަން ފަސޭހަވުން: ތީޒުފަތުގެ ދެތިން ތިކި ފެނަށް އަޅައި ބުޔުމުން ފަސޭހައިން ނިދެއެވެ.

17. ނޭފަތުން ލޭއައުން ހުއްޓުން: ދެތިން ފަތް ޖޯޑެއްގެ ފެނަށް އަޅައި ބައި ޖޯޑުވަންދެއް ކައްކައި ބުޔުމުން ނޭފަތުން ލޭ އައުން ހުއްޓެއެވެ.

18. ދަތް ހުދުކޮށްދޭ ބޭހެއް: މުގުރި ތީޒުފަތް ބޭނުންކޮށްގެން ހަފުތާއަކު ތިން ފަހަރު ދަތް އުނގުޅަނިކޮށް ދަތްތައް ވަރަށް ހުދުވެއެވެ.

19. ކުރަފި ދުރުކޮށްދޭ ބޭހެއް: ހިކި ތީޒުފަތް ހުންނަ ތަންތަނަށް ކުރަތްޕެއް ނުދެއެވެ. ހަމައެކަނި ކުރަތްޕެއް ނޫނެވެ. މީދަލާއި ބައެއް ހަފައިލީ ސޫފިތައް އެތަނާ ކައިރިއެއް ނުވެއެވެ. މީހުން ހަދާގޮތަކީ، ތުނި ފޮތިކޮތަޅަށް މި ފަތް އަޅައި ބަދިގޭގެ ކަބަޑުތަކުގައި ބަހައްޓަނީ އެވެ. މި ފަތުގެ ދިޔަ ޖެހުމުން، ސޫފިތައް ކަށިޖެހުމުން ވާ ތަދަށާއި އަނިޔާއަށް ޝިފާ ލިބެއެވެ.

20. ހަންގަނޑުގައި ރޫޖެހުން ކުޑަކޮށްދޭ ބޭހެއް: ފަސްވަރަކަށް ފަތް ދެ ޖޯޑު ފެނުގައި މަތިޖަހައިގެން ކައްކައި، މަތި ނަގައިގެން ދެ މިނެއްޓެއްހާ އިރު ކައްކައި ނުކުންނަ އާވިން ނޭވާ އެތެރެއަށް ލުމުން ހަންގަނޑު އޮމާންވެއެވެ.

21. އުކުނުފިލުވާ ބޭހެއް: އުކުނު ފިލުވަން ހަތަރުސަތޭކާ މިލިލީޓަރު ފެނަށް 50 ގުރާމް ފަތް އަޅައި ހަތަރުގުނަ ކުޑަވަންދެން ކައްކައި ބޮލުގައި ހާކައި ހަތަރު ގަޑިއިރު ބެހެއްޓުމުން އުކުނު ފިލައެވެ.

22. ބޮލުގައި ރިހުމަށް ޝިފާއެއް: ތީޒުފަތެއް ނޭފަތަށް ޖެހުމުން ބޮލުގައި ރިހުމަށް ލުއި ލިބެއެވެ.

23. ފަޓާސް ހެން އަޑުކިޔާ ފަތެއް: ރޯ ތީޒުފަތް އަލިފާންގަނޑަކަށް ލުމުން ފަތުން ގަދަ އަޑެއް ކިޔައެވެ.

24. ހަމަހިމޭންކަން ގެނުވާ ދުމެއް: ތީޒުފަތުން ދުން އެޅުމުން މީހާގެ ޠަބީއަތަށް ހަމަހިމޭންކަން އައިސް ހަމަޖެހެ އެވެ.

25. ކާމިޔާބު ފާހަގަ ކުރާ ސަގާފީ ގަހެއް: އިނގިރޭސި ބަހުން ތީޒުފަތް ހުންނަ ގަހަށް ކިޔަނީ ”ލޯރަސް ނޮބިލިސް“ އެވެ. ކުރުކޮށް ބުނާނަމަ، ލޯރަލް އެވެ. މިފަތުގެ އޮފިތަކުން ވަށްބުރެއް ހަދައި، މުގާބިލާތަކާއި ކުޅިވަރުތަކުގައި ކާމިޔާބު ލިބޭ މީހުންގެ ބޮލަށް ތާޖެއްގެ ގޮތަށް ފައްތައެވެ. މިކަމަކީ މީގެ ދެތިން ހާސް އަހަރު ކުރިން ފެށިގެން ހިނގާ ހުޅަނގުގެސަގާފީ ކަމެކެވެ. އެއީ ގަހުގެ ބޭނުންތެރިކަން ބޮޑުކަމާއި އެކު މީރު ވަހެއް ދުވާތީ އެވެ. ތިރީގައި އެވާ ފޮޓޯގައި އެވަނީ ކުޅުންތެރިންގެ ބޮލުގައި ތީޒު އޮފިން ހަދާފައިވާ ތާޖެއް އަޅާފައިވަނިކޮށެވެ. ފޮޓޯގެ ވާތްފަރާތުގައިވާ ކުޅުންތެރިޔާގެ މަތީގައި ހުދުން ކުރަހާފައިވާ ބުރަކަށް އެވާ ނިޝާނަކީ ތީޒު އޮފިން ހަދާފައިވާ ކުރެހުމެކެވެ. އ.ދ. ގެ ނިޝާނާއި ސްކޫލް ކުދިންގެ ބެޖުންނާއި އެތައް ލޯގޯއަކުން ކިޔުންތެރިންނަށް މި ނިޝާން ފެނިވަޑައިގެންފައި ވާނެއެވެ. މިގޮތަށް އޮފިން ހަދާ ތާޖަށް އިކްލީލް ތާޖޭ ވެސް ކިޔައެވެ.

    

    އިނގިރޭސި މަޖާޒީ ބަހުރުވައިގައި، ”ލޯރަލް މަތީ އަރާމުކުރުމަށް އޮތުން“ މި ޢިބާރާތް ބޭނުން ކުރެއެވެ. އެއީ ކަމެއް ކާމިޔާބު ވުމުން، އެކަމެއް ޙާޞިލްކުރަން ކުރި ހިއްމަތަށް ފަރުވާކުޑަކޮށް، އެ ހިއްމަތުން ފޭވެ އުޅުމުން ބުނާ ޢިބާރާތެކެވެ.

އިތުރު ފައިދާތައް މި ޕޭޖް އާއި މި ޕޭޖްގައި ވެއެވެ.

ތީޒު ގަހުގެ ވައްތަރުތައް

އަޅުގަނޑު ކުރިން ބަޔާން ކުރި ފައިދާތައް ހުރިކަމަށް ފޮތްތަކުގައި ބުނެފައިވަނީ ލޯރަސް ނޮބިލިސް (laurus nobilis) ކިޔާ ޔޫރަޕާ ގާތް ހިސާބެއްގައި ހެދޭ ގަހެއްގެ ފަތަށް ނިސްބަތްކޮށެވެ. ފަހެ، ސަޢޫދީ އެރެބިއާ އާއި އެފްރިކާގެ އުތުރުގައި ވަރަށް ބޮޑު ކަނޑެއް އޮވެއެވެ. މި ކަނޑު އޮންނަނީ ވަށައިގެން ބިން (ޓެރެއިން) އޮންނަ ތަނެއްގެ މެދު (މެޑި) ގައި ކަމުން މި ކަނޑަށް ކިޔަނީ މެޑިޓަރޭނިއަން ކަނޑެވެ. މި ގަސް މައިގަނޑު ގޮތެއްގައި ހެދެނީ މި ކަނޑުގެ ވަށައިގެންވާ ހިސާބުގައެވެ. ސީރިއާ އާއި ޖޯޑުން އާއި ލެބަނަން އާއި އިޓަލީ އާއި ސްޕެއިން ފަދަ ޤައުމުތަކުގައެވެ. މި ހިސާބުގަނޑަކީ އިންސާނުން އެންމެ ފުރަތަމަ ތަހުޒީބުވީ ހިސާބުގަނޑުކަމަށް ބައެއް މީހުން ބުނެއެވެ.

މިގަހާއި ވަރަށް ވައްތަރު ގަސް އެމެރިކާ އާއި، އިންޑިއާ އާއި އިންޑޮނީޝިއާ އާއި މެކްސިކޯ ފަދަ ޤައުމުތަކުގައި ހެދެއެވެ. ނަމަވެސް ކުރިން ބަޔާން ކުރެވުނު ގަހަށް ވުރެ އެ ގަސްތަކުގެ ތާސީރު ތަފާތުކަމަށް ބުނެއެވެ.

އަޅުގަނޑު މުޑުވަށް ހޯދިގޮތާއި ހެއްދިގޮތް

ޔޫރަޕުގެ ޤައުމެއް ކަމުގައިވާ ނެދަރލޭންޑްސްއިން ތަފާތު ގަސް ގެނެސް ވިއްކާ ހައެއްކަ ފިހާރަ މިހާރު މާލޭގައި ހުރެއެވެ. ގަސްގަތީ އޭގެ ފިހާރައަކުން 400 ރުފިޔާ އަށެވެ. މިހާރު އެ ގަސް ހެދޭތާ ހަތަރު ވަރަކަށް އަހަރު ވެދާނެއެވެ. ގަތްއިރު ދިގުމިނަކީ އެއް ފޫޓެވެ. މިހާރު ދިގުމިނަކީ ހަތަރު ވަރަކަށް ފޫޓެވެ. މިއީ ހަތަރު މޫސުން އަންނަ ހިސާބުގެ ގަހެއް ކަމުން، ގަސް ހެދިގަންނަނީ ޔޫރަޕު ހިސާބަށް ބަހާރު މޫސުން އަންނަ ދުވަސްވަރު އެވެ. ގަސް މިހާރު ހުރިގޮތް ތިރީގައި އެވަނީ އެވެ.

މި ގަސް ހެއްދުމަށް ވޭތިވެދިޔަ ދެތިން އަހަރު ދެވުނު ސަމާލުކަން ކުޑަކަމުން، އެ ގަސް ހެދެންވީހާ އަވަހަކަށް ނުހެދެއެވެ. ކަޅު ބާލިދީގައި ގަސް ހެއްދުމުން، އަވިދިނުމުން ބާލިދީ ވަރަށް ބޮޑަށް ހޫނުވެއެވެ. ދެން މުލަށް ކުރާ އަސަރުން ގަސް ހެދުން ކުޑަ ވެއެވެ. އެންމެ ރަނގަޅީ މުށި ފުފޭ ފަދަތަކެތީގައި ގަސް ހެއްދުމެވެ. މިގަހަކީ، ތިރީސް ފޫޓު ވަރަށް އުހަށް ހެދޭ ގަހެއް ކަމުން، އެންމެ ފަހުން ބިންމަތީގައި ގަސް ޖަހަންޖެހޭނެއެވެ. ގަހުގެ ބުޑުން ކުދި ކުރިތައް މިހާރުވެސް ފަޅާފައި ވެއެވެ.

އަޅުގަނޑު ބެލި ލިޔުންތަކުގައިވާ ގޮތުން، މިގަސް ރާއްޖެ ފަދަ، ދުނިޔޭގެ މެދުގައިވާ ޤައުމުތަކުގައި ހެދެއެވެ. ރާއްޖޭގައި އެ ހެދެނީ ވެސް އެހެން ވެގެންތާ އެވެ. ބާލިދީ ފަދަ އެއްޗެއްގައި މިގަސް ހެދޭނީ އުސްވެގެން ހައެއްކަ ފޫޓަށްކަމަށް ލިޔެފައި ހުރެއެވެ. އަދި މިގަހަކީ ފަންސާސް ވަރަކަށް އަހަރަށް ވުރެ ޢުމުރު ދިގު ބޮޑު ގަހަކަށް ވާތީ، ބިންމަތީ ޖަހާނަމަ، މުސްތަޤްބަލްގައި ގަސް ހެދުމަށް ބޭނުންވާ ޖާގަ އޮންނާނޭ ތަނެއް ޚިޔާރުކުރަން ވެސް ޖެހެއެވެ. ގަސް ގިނަކުރުމަށް ތިރިން ފަޅާފައިވާ ކުރިތަކުގައި ވެލިބަނދެގެން ގިނަ ކުރެވޭނޭ ކަމަށް ލިޔެފައި ހުރެއެވެ. މި ޞަފުޙާގައި ގަސް ހެއްދުމާ ބެހޭ އިތުރު މަޢުލޫމާތު ވެއެވެ. ގަހުން ފަތް ކަނޑައިގެން ކެއްކުމަށް ބޭނުން ކުރަންވާނީ ދެތިން ދުވަސް ވުމުންނެވެ. އެއީ ފަތުން ނުކުންނަ ރަހަ އެންމެ މީރު ވާނޭ މުއްދަތެވެ. ގިނަ ދުވަހު ހިއްކި ފަތް ހުރެއެވެ.

ރަށްފުށުގެ ވިޔަފާރިއަކަށް ތީޒުގަސް ހެއްދުން

ރަށްފުށުގެ ގޯތިތައް މާލޭގެ ގޯތިތަކަށް ވުރެ ބޮޑެތިވީމާ، ގަސްހައްދާނޭ ޖާގަ ރަށްފުށުގައި އޮންނާނެއެވެ. އެހެންކަމުން، އަޅުގަނޑަށް ފެންނަނީ ރާއްޖޭގެ ދެކުނުގެ ދެ ހިސާބެއްގައި އާއި ހައްދުންމައްޗާއި ތިލަދުންމައްޗާއި މެދުތެރޭ ހިސާބުގައި ދިރިއުޅޭ މީހުން ތީޒުގަސް އެމީހުންގެ ގޯތީގައި ހެއްދުމެވެ. ދެން ގަސް ދިހަވަރަކަށް ފޫޓަށް ބޮޑުވުމުން، ގަހުން ފަތް ކަނޑައި، ޕްލާސްޓިކް ކޮތަޅުގައި ބަންދުކޮށްގެން ވިއްކާނީ އެވެ. ރާއްޖޭގެ ރިސޯޓްތަކުގެ ކެއުންތަކުގައި ތީޒުފަތަކީ ޢާއްމުކޮށް ބޭނުން ކުރާ އެއްޗަކަށް ވާތީ، ވަރަށް ބޮޑު ބާޒާރެއް މިފަތަށް އޮންނާނޭ ކަމަށް ލަފާ ކުރެވެއެވެ. މީގެ އިތުރަށް،  މުޅި ރަށުގެ އެންމެންނަށް މި ގަހުގެ ބޭނުންތައް އެނގޭނަމަ، ގަސްހުރިގޭގެ ފުޅަލިދޮށުގައި ނުވަތަ ދޮރޯށިދޮށުގައި ފަތް ގަންނަ މީހުންތައް ކިޔޫ ހަދާފައިވާތީ ތިބާ ދެކޭނެއެވެ :-)