އެކި އެކި ބަސް ލިޔުމަށް ވަކި ފަރުމާއަކަށް ހަދާފައިވާ  އަކުރުތަކަށް ކިޔަނީ ފޮންޓު އެވެ. މި މަޒުމޫނުގައި އަޅުގަނޑު މި ތައާރަފުކުރަނީ ތާނަ ލިޔުމަށް ބޭނުން ކުރެވިދާނޭ އައު ފޮންޓެކެވެ.

ތާނަ ލިޔުމަށް ބޭނުންކުރާ ފޮންޓުތަކުގެ ތެރެއިން، އެންމެ ”ވައިގައިހިފި“ އަޅުގަނޑުގެ ފޮންޓުތަކުގެ ތެރޭގައި، ގިނަ އޮންލައިން ނޫސްތަކުގައި ބޭނުންކުރާ ”ފަސޭހަ“ ކިޔާ ފޮންޓު އާއި ”އޭ-ވަހީދު“ ހިމެނެއެވެ. ބޮޑު އަކުރުލިޔުމަށް ގިނައިން ބޭނުންކުރާ ”އެމްވީ އާއްމުއެފްކޭ“ އަކީ ވެސް ގިނަ ބަޔަކަށް ކަމުދިޔަ ފޮންޓެކެވެ. ފަހުން މި ބަޔާންކުރި ދެ ފޮންޓުގެ އަކުރުތަކުގެ ބައްޓަންތައް ލިޔުއްވީ އަޅުގަނޑުގެ އެކުވެރި އޭދަފުށީ ޢަބްދުﷲ ވަޙީދެވެ. އާއްމުއެފްކޭ ފޮންޓުއަށް ނަންދިނީ އެއީ އާއްމުކޮށް ލިޔާ ތާނައަކުރުތަކުގެ ފަލަ ކަތި ބައްޓަންތަކަކަށް ވާތީއެވެ. މި ފޮންޓުތައް ހެދިގޮތުގެ ކުރު ބަޔާންތައް މި މަޒުމޫނުގެ ނިމޭތަނުގައިވާ ލިންކުން ފެނިވަޑައިގަންނަވާނެއެވެ.

ވިއްސަކަަށް އަހަރުކުރިން ފަރުމާކުރި ތާނަ ޓައިޕްރައިޓަރުގެ އަކުރުތައް، މިހާރުގެ ވިންޑޯޒް ގައި ބޭނުންކުރެވޭ ގޮތަށް ޢާއްމުކުރުމުން އެ ފޮންޓު ވެސް ބައެއް މީހުންނަށް ކަމު ގޮސްގެން ބޭނުން ކުުރަމުން ގެންދެއެވެ. މިގޮތުގެ މަތިން އަލްއަޚް އާދަމް ނަޞީރު އިބްރާހީމްގެ ވެބްސައިޓް އާއި ދޯ ވެބްސައިޓް ގެ މައިގަނޑު ލިޔުންތައް ހުންނަނީ މިފޮންޓުން ލިޔެފައެވެ. ނަންތަކަށް ފިތާލެއްވުމުން އެ ވެބްސައިޓްތައް ފެނިވަޑައިގަންނަވާނެއެވެ. ކިޔުއްވަމުން ތިޔަ ގެންދަވާ މި ވެބްސައިޓްގައި ވެސް ބޭނުންކުރަމުން މިދަނީ ޓައިޕްރައިޓަރ ފޮންޓެވެ.

ދަންނައެވެ. އިނގިރޭސި ރަނގަޅު ފޮންޓެއްގައި ދާދި އެއް ފަރުމާއަކަށް ސޯޅަވަރަކަށް ފޮންޓު ހާ ގިނަ ފޮންޓު ހަދައިފާނެއެވެ. މި ހުރިހާ ފޮންޓެއްގެ އަކުރުތަކުގައި ވެސް އެއްގޮތްކަމެއް ހުންނާނެއެވެ. މިފަދަ ފޮންޓު ގުރޫޕަކަށް އިނގިރޭސި ބަހުން ކިޔަނީ ފޮންޓު އާއިލާއެވެ. ތިރީގައި އެވަނީ މަޝްހޫރު ހެލްވެޓިކާ ކިޔާ ފޮންޓު އާއިލާގެ ބައެއް ފޮންޓެވެ. ބައްޓަންތަކުގެ އެއްގޮތްކަމަށް ވިސްނަވާށެވެ. މައިގަނޑު ތަފާތުތަކަކީ ކޮބައިތޯއެވެ؟

.

ފޮންޓު އާއިލާެއެއްގައި ހިމެނޭ (މެންބަރުންގެ ނުވަތަ) ފޮންޓުތަކުގެ އަކުރުތައް ތަފާތުވަނީ ފަލަމިނާއި ފުޅާމިނާއި ކަތިމިން ތަފާތުވެގެންނެވެ. ފެވި އަކުރުތަކަށް އިނގިރޭސިބަހުން ކިޔަނީ ބޯލްޑް ފޮންޓެވެ. މާ ފަލަވެއްޖެ ނަމަ، ”ބްލެކް“ ކިޔައެވެ. ވަރަށް ހިމަނަމަ ކިޔަނީ ”އަލްޓްރާތިން“ އެވެ.  މިއިން ކޮންމެ ބާވަތަކީ ވަކި ފޮންޓެކެވެ. ބްލެކް އަކުރުތައް ކަތިކޮށް ހަދާނަމަ އެއީ ބްލެކް އަކުރުތައް ތެދަށް ހުންނަ ފޮންޓާ ތަފާތު ފޮންޓެކެވެ. ތާނަ ފޮންޓުތަކުގައި ގިނައިން ހުންނަނީ އެއް ބާވަތެކެވެ. ފޮންޓު އާއިލާއެއްގެ ނަޒަރުން ބަލާއިރު، އެންމެ މެންބަރެކެވެ. މިސާލެއްގެ ގޮތުން ގިނަ ބަޔަކު ބޭނުންކުރާ ”ފަރުމާ“ ފޮންޓުގެ ބޯލްޑް ފޮންޓެއް ޢާއްމުކޮށްފައެއް ނުވެއެވެ.

އަޅުގަނޑު ފަރުމާކޮށްފައިވާ ބައެއް ފޮންޓުތަކުގައި ހިމެނެނީ ބޯލްޑް ނުވަތަ ފެވި ފޮންޓު އެކަންޏެވެ. މިސާލެއްގެ ގޮތުން، ”އޭ ވަހީދު“ ފޮންޓުގެ ހިމަ އަކުރުތައް ހިމެނޭ ފޮންޓެއް ޢާއްމުކޮށްފައެއް ނުވާނެއެވެ. ނަމަވެސް އޭދަފުށީ ޢަބްދުﷲ ވަޙީދު އޭނާ ކުދިކޮށް ލިޔުއްވައި ދެއްވި ކަރުދާސް ކޮޅެއް އަޅުގަނޑުގެ އަތުގައި އޮންނަތާ ވަރަށް ގިނަ އަހަރު ވެއްޖެއެވެ.  އަދި މިއުޅެނީ އެ އަކުރުތަކުން ފޮންޓު ފަރުމާކުރާނޭ ވަގުތު ނުވެގެންނެވެ.

ތާނަ ޓައިޕްރައިޓަރ އަކުރުތައް ޢާއްމުކޮށްފައިވަނީ، އޭގެ ފެވި އަކުރުތަކުގެ ފޮންޓާއި އާދައިގެ އަކުރުތައް ހިމެނޭ ފޮންޓާ އެއްކޮށެވެ. މިއީ ދެ ފޮންޓެކެވެ. ނަމަވެސް، ކޮމްޕިއުޓަރުން ލިޔާއިރު، ބޯލްޑްކުރަން (ފަވަން ނުވަތަ ފަލަކުރަން) ޖެއްސުމުން އޮޓޮމެޓިކުން ފޮންޓު ބަދަލުކޮށް އަކުރުތައް ފަލަވާނެއެވެ.

އަޅުގަނޑަށް ފާހަގަ ކުރެވުނީ، އަރިމަތީ ސުރުޚީތައް ލިޔުމަށް ޓައިޕްރައިޓަރ ބޯލްޑް ފޮންޓުގެ އަކުރުތައް ތަންކޮޅެއް ފަލަކަމަށެވެ. އެހެންކަމުން ގަސްތުކުރީ ހިމަ އަކުރުތަކާއި ބޯލްޑް (ފެވި)  އަކުރުތަކާ ދެމެދުގެ ފަލަމިން ހުންނަ ފޮންޓެއް ފަރުމާކުރުމަށެވެ. މި ”ބަރުދަނުގެ“ ފޮންޓަށް އިނގިރޭސިބަހުން ކިޔަނީ ސެމިބޯލްޑް އެވެ. ސެމި ގެ މާނައަކީ ދެބައިކުޅަ އެއްބައެވެ.

މިފަހަރު މި ހުށަހަޅަނީ ތާނަ ޓައިޕްރައިޓަރ ބައްޓަމުގެ ސެމިިބޯލްޑް ފޮންޓެކެވެ. މި ފޮންޓުގެ އަކުރުތަކުގެ ފަލަމިން ”އޭ ވަހީދު“ގެ ފޮންޓާ ގާތްކަމުން، އެ ފޮންޓުގެ ބަދަލުގައި ބައެއް ޙާލަތްތަކުގައި މި ފޮންޓު ބޭނުން ކުރެވޭނެއެވެ. ނަމަވެސް، އަކުރުތައް ލިޔެފައިވާ ޖާގަ ބޮޑުކަމުން އެއް ބޮޑު މިނެއްގައި ފެންނާނީ އަކުރުތަކުގެ ސައިޒު ކުޑަކުރުމުންނެވެ.