މި މަޒުމޫނަކީ ހިނިތުންވުމުން އިންސާނާއަށް ކުރާ މަންފާތައް ބަޔާންކޮށް ”ޓެޑް ޓޯކްސް“ ކިޔާ ޕްރޮގްރާމަކަށް މީހަކު ދީފައިވާ ހަތް މިނިޓްގެ ތަޤްރީރެއްގެ ޚުލާޞާ ތަރުޖަމާއެކެވެ. މި ތަޤްރީރު ތަރުޖަމާ ކުރުމުގެ ބޭނުމަކީ، ހިނިތުންވުމަކީ މުޅި ދިރިއުޅުމުގެ ހުރިހާ ކަމަކަށް އެކަމުން އާދަޔާ ޚިލާފު ހެޔޮ އަސަރުކުރާ ކަމަކަށްވާތީ އާއި ހުރިހާ ދިވެހީންނަށް އިނގިރޭސި ބަސް ނޭނގޭތީއެވެ. މީހެއްގެ ހިނިތުންވުން ހުންނަ ގޮތުން،  މީހާއަށް ދިމާވާނޭ ކަންތައްތައް ކުރިން ދެނެގަނެވޭނޭ ކަމަށް ދިރާސާތަކުން ދައްކައެވެ.  ހިނިތުންވުމަށް އެއްވެސް ޚަރެދެއް ނުހިގައެވެ. އެއީ  ކޮންމެ މީހަކަށް ވެސް ކުރެވިދާނޭ ކަމެކެވެ. ހިނިތުންވުމުން ޢަޖާއިބުވާ ފަދަ ފޮރުވިފައިވާ ބާރުތަކެއް މީހާއަށް ލިބެއެވެ.  ހަތަރު މިލިއަން މީހުން ބަލާފައިވާ އަޞްލު ޓެޑްޓޯކް އަޑުއެއްސެވުމަށް (”The hidden power of smiling : ހިނިތުންވުމުގެ ފޮރުވިފައިވާ ބާރު“) މި ޖުމުލައަށް ފިއްތަވާލައްވާށެވެ.

އަހުރެން ކުޑައިރު ބޭނުންވީ، އާދަޔާ ޚިލާފު، ޖާދުވީ ބާރުތަކެއް ލިބިފައިވާ މީހަކަށް ވާށެވެ. އެއީ ދުނިޔެ ހުރިހާ އާފާތްތަކުން ސަލާމަތްކޮށް، މީހުން އުފާވެރި ކުރުމަށެވެ. އެ ހުވަފެން ޙަޤީޤަތަކަށް ހެދުމަށް އަހުރެންނަށް އާދަޔާ ޚިލާފު ބާރުތަކެއް ބޭނުން ވިއެވެ. އެކި ކަންކަމުގައި އެކި ދުވަސްވަރު އުޅުމަށް ފަހު، އަހުރެން  އެންެމެ ފަހުން ޤަޞްދުކުރީ ޙަޤީޤީ ސައިންސް ގެ ތެރެއިން ފައިދާ ކުރުވަނިވި ޙަޤީޤަތެއް ހޯދުމަށެވެ.

އަހުރެންގެ ދަތުރު ފެށެނީ 30 އަހަރު ވަންދެން އެމެރިކާގެ ޔުނިވަރސިޓީއެއްގައި ކުރަމުންދާ އާދަޔާ ޚިލާފު ދިރާސާއަކުންނެވެ. މި ދިރާސާގައި ހަދާގޮތަކީ، މަދަރުސާ ނިންމާ ދަރިވަރުންނަށް އަހަރީ ފޮތުގައި ހުންނަ ފޮޓޯތަކުން އެކި ކުދިންގެ ހިނިތުންވުން ބަލައި،  އެމީހުންނަށް ދުނިޔޭގައި އުޅޭ އުޅުމުގައި ދިމާވާ ކަންކަމާ ގުޅުވުމެވެ. ދަރިވަރުންގެ ހިނިތުންވުމުގެ މިނުން، ދިރާސާ ކުރާމީހުންނަށް، އެމީހުންގެ ކާވެނީގެ އުފާވެރިކަމާއި ކާވެނީގެ މުއްދަތު ވަޒަން ކުރެވެއެވެ.

އަދި ފޮޓޯތަކުގެ ހިނިތުންވުމަށް ބަލައި، އެމީހުންނަށް އިމްތިޙާނުގައި ވާނޭގޮތާއި، ޞިއްޙަތާއި އެެހެންމީހުންނަށް އެމީހުންގެ ފަރާތުން ލިބޭނޭ ހިތްވަރު ވަޒަން ކުރެވެއެވެ.  އެކިއެކި އަހަރީ ފޮތްތައް ބެލުމުގެ ތެރޭގައި އަހުރެންނަށް ބެރީ (ބެރެކް) އޮބާމާގެ ސްކޫލްގެ އަހަރީ ފޮތުގައިވާ ފޮޓޯ ފެނުނެވެ. އެ ފޮޓޯ އެންމެ ފުރަތަމަ ފެނުމުން އަހުރެން ހީކުރީ އޭނާގެ އާދަޔާ ޚިލާފު ބާރުތަކަކީ  އޭނާގެ ގަމީހުގެ އާދަޔާ ޚިލާފު ގިރުވާނުން ލިބުނު ބާރު ތަކެއް ކަމަށެވެ. ނަމަވެސް މިހާރު އަހުރެންނަށް އެނގޭގޮތުގައި، އެނާގެ އާދަޔާ ޚިލާފު ބާރުގެ ސިއްރަކީ އޭނާގެ ހިނިތުން ވުމެވެ.

އަނެއް އާދަޔާ ޚިލާފު ހޯދުމެއް ފާހަގަ ކުރެވުނީ 1950 ގެ  ކްލަބުތަކުގެ ކުޅުންތެރިންގެ ފޮޓޯތައް ދިރާސާ ކުރުމުންނެވެ. ދިރާސާ ކުރި މީހުންނަށް ފާހަގަ ކުރެވުނު ގޮތުގައި، ކުޅުންތެރިންގެ ހިނިތުންވުމުގެ ފުޅާމިނުން އެމީހުން ދުނިޔޭގައި ތިބޭނޭ މުއްދަތު ހޯދެއެވެ. ހިނިތުން ނުވާ މީހުން ދުނިޔޭގައި އުޅުނީ އެވަރެޖްކޮށް 72.9 އަހަރު އެވެ. ފޮޓޯގައި ބޮޑަށް ހިނިތުން ވެފައިވާ މީހުން އެވަރެޖްކޮށް 80 އަހަރު ދުނިޔޭގައި އުޅުނެވެ.

އިންސާނާ ދުނިޔެއަށް އަންނަނީ ހިނިތުން ވަމުންނެވެ. ތްރީ-ޑީ އަލްޓްރާސައުންޑްއިން މާބަނޑުމީހުން ސްކޭން ކޮށްގެން ބަލާއިރު، އަހުރެމެންނަށް ފާހަގަ ކުރެވެނީ ކުޑަ ދަރިފުޅު ރަހިމުގައި ބޮޑުވާއިރުވެސް ހިނިތުންވާ ކަމެވެ. އެކުދިން ދުނިޔެއަށް އައުމަށް ފަހު ވެސް ހިނިތުން ވެއެވެ. ގިނައިން ނިދީގައެވެ. އިންސާނުންގެ އަޑު އިވުމުން ލޯފަން ކުދިންވެސް ހިނިތުން ވެއެވެ. ހިނިތުންވުމަކީ، ހުރިހާ އިންސާނުންގެ ކިބައިގައި އެއްގޮތަކަށް ލައްވާފައިވާ އިންސާނީ ސިފައެކެވެ.

ޕޯލް އެކްމަން ކިޔާ ދިރާސާކުރާ މީހަކު، ހުޅަނގާ އެއްވެސް ގުޅުމެއް ނެތް ޕަޕުއާ ނިއުގިނީގައި ދިރިއުޅޭ މިނިމަސް ކައިއުޅޭ  ބައެއް ދިރާސާ ކުރިއިރުވެސް އެމީހުން ހިނިތުންވާކަމަށް ފާހަގަ ކުރިއެވެ. އެހެންކަމުން ޗައިނާ އާއި ހޮލީވުޑް އާއި ޕަޕުއާ ނިއުގިނީގައި އެކަހެރިކޮށް އުޅޭ ޤަބީލާތަކުގެ މީހުންވެސް ހިނިތުން ވެއެވެ. އުފާވެރިކަމާއި ހިތްހަމަޖެހުން ފާހަގަ ކުރުމަށެވެ. ތިބާ އާއި އަހުރެން ވެސް ހިނިތުންވާ ސަބަބުތަކަށްޓަކައި ހަމަ އެގޮތަށެވެ.

މި ކޮޓަރީގައިވާ ކިތައް މީހުން ދުވާލަކު 20 ފަހަރަށް ވުރެ ގިނައިން ހިނިތުން ވަމު ހެއްޔެވެ؟ ހިނިތުންވާނަމަ، އަތް މައްޗަށް ނަގާށެވެ. މި ކޮޓަރިން ބޭރުގައި، ޢާއްމު ދިރިއުޅުމުގައި މީހުން ގިނައެއްކޮށް ހިނިތުމެއް ނުވެއެވެ. ދުވާލަކު 20 ފަހަރަށް ވުރެ ގިނައިން ހިނިތުންވަނީ އެންމެ ތިންބައިކުޅަ އެއްބައި މީހުންނެވެ. އަދި ފަސް ފަހަރަށް ވުރެ މަދުން ހިނިތުންވަނީ %14 އަށް ވުރެ މަދު މީހުންނެވެ. އެންމެ ހައިރާން ކުރުވަނިވި ކަމަކީ، އެންމެ ބޮޑަށް ހިނިތުންވަނީ އެންމެ ކުޑަކުދިންނެވެ.  ދުވާލަކު  400 ވަރަކަށް ފަހަރު ކުޑަކުދިން ހިނިތުން ވެއެވެ.

އެއް ފަހަރުވެސް ހިތަށް އެރިހެއްޔެވެ؟ ހިނިތުން ވެފައިތިބޭ — ހެވިފައި ތިބޭ — ކުޑަކުދިންނާ އެކު ވުމުން، ތިބާ ހިނިތުންވަނީ، އުފާވަނީ ކީއްވެގެންކަން އެނގޭހެއްޔެވެ؟ ދާދި ފަހުން، ސްވީޑްން ގެ ޔުނިވަރސިޓީއަކުން ކުރި ދިރާސާއަކުން އޮޅުންފިލީ، ހިނިތުންވެފައިވާ މީހަކަށް ބަލަމުން ނިތްކުރިއަށް ރޫ އެރުވުމަކީ، ނުވަތަ ނުރުހުންތެރިކަން މޫނުމައްޗަށް ގެނައުމަކީ އުނދަގޫ ކަމެއް ކަމެވެ. އެއީ ކީއްވެގެންތޯ ހިތާހިތާ ސުވާލުކޮށްލައްވާށެވެ. ސަބަބަކީ އިންސާނާ އުފެދިފައިވާ ގޮތުން، ހިނިތުންވުމަކީ އެކަކުގެ ފަރާތުން އެނަކަކަށް ފަސޭހައިންފެތުރޭ ކަމެކެވެ. މިކަމުގައި މީހާގެ މާބޮޑު ކޮންޓްރޯލެއް ނޯވެއެވެ. ހިނިތުންވެފައިވާ މޫނެއް މީހަކަށް ފެނުމުން،  އޭނާވެސް ހިނިތުންވާން އޭނާގެ ހަށިގަނޑު މަޖުބޫރު ކުރުވައެވެ. ހިނިތުންވުމުން މޫނުގައިވާ މަސްތަކަށް ތިމާގެ ބާރު ކެނޑޭގޮތް ވެއެވެ. ގަދަކަމުން ހިނިތުން ވުމާއި ޙަޤީޤަތުގައި ހިނިތުންވުމާއި ހުންނަ ތަފާތު މިކަމުން ވަކިކުރަން އެނގެއެވެ. މޫނުގެ މަސްތަކަށް ވާ ގޮތުންނެވެ. އަދި މިކަމުން މީހާގެ ޠަބީޢަތު ހަމަޖެހިފައިވާކަން ނުވަތަ ޠަބީޢަތު ނުތަނަވަސް ވެފައިވާކަން އޮޅުންފިލައެވެ.

ދުނިޔޭގައިވާ ދިރުންތަކާ ބެހޭ ގޮތުން މަޝްހޫރު ފޮތެއް ލިޔުނު ޑާރވިން ވެސް، ހިނިތުންވުމާއި ޠަބީޢަތާ ހުންނަ ގުޅުން ފާހަގަކޮށް އެކަމާ ބެހޭ މަޒުމޫނެއް ލިޔެފައި ވެއެވެ. އޭނާ ބުނަނީ، ހިނިތުންވުމުން، އިންސާނާއަށް އުފާވެރިކަން އިޙްސާސް ކުރެވޭ ކަމަށެވެ. މާނައަކީ، އުފާވުމަށް ހިނިތުން ވެވިދާނެއެވެ. ހިނިތުންވުމަކީ އުފާވުމަށްފަހު ވާކަމެއްގެ ބަދަލުގައި، ހިނިތުންވުމުން، އުފާވެރިކަން އިޙްސާސް ކުރެވޭ ވާހަކަ އެވެ. މިކަމާ ބެހޭގޮތުން ލިޔުނު ލިޔުމުގައި އޭނާ ފަރަންސޭސި މީހެއްގެ ވާހަކަ ލިޔެފައި ވެއެވެ. މި މީހާ ކުރިކަމަކީ، ކަރަންޓު ދީގެން ހިނިތުންވުމާ ބެހޭ މޫނުގެ މަސްތައް ޙަރަކާތް ކުރުވީއެވެ. އޭނާއަށް ފާހަގަ ކުރެވުނީ މިކަމުގެ ސަބަބުން އުފާވެރިކަން މީހާއަށް އިޙްސާސް ކުރެވޭ ކަމެވެ.

ނިތްކުރީގައި އާއި މޫނުގައި ހުންނަ ރޫތައް ފިލުވަން ޖަހާ އިންޖެކްޝަނެއް ހުރެއެވެ. މޫނުގައި ރޫތައް ޖެހެނީ، ހަމުގެ އަޑީގައި ހުންނަ މަސްތައް ބާރުއަރައި ކުރުގެޅުމުންނެވެ. ”ބޮޓޮކްސް“ ކިޔާ މި އިންޖެކްޝަން ޖެހުމުން، މި މަސްތައް ވައު ވެއެވެ. އެހެންކަމުން ކުރުގެޅުން ފިލާ ހަންގަނޑު އޮމާން ވެއެވެ. ޖަރުމަނުގެ ދިރާސާ ކުރާ ބަޔަކު ހެދި ގޮތަކީ، ހިނިތުންވުމަށް ބޭނުންވާ މޫނުގެ މަސްތަކަށްބޮޓޮކްސް ޖަހާ ވައުކޮށްލައި އެމް.އާރު.އައި މެޝިނަކުން  ސިކުނޑިއަށް އަންނަ ބަދަލު ބެލީއެވެ. އެމީހުންނަށް ފާހަގަ ކުރެވުނީ، ޑާރވިން އަށް ފާހަގަ ކުރެވުނު ފަދައިން، ހިނިތުންވުމުގެ މަސްތަކުގެ ބާރު ދިއުމުން ހިތްހަމަޖެހުން ގެއްލޭ ކަމެވެ. ހިނިތުންވުމުން ސިކުނޑިއަށް އުފާވެރިކަން ގެނެސްދޭ އަސަރެއް ކުރާކަމެވެ.

ޗޮކްލެޓު ކެއުމަކީ، ސިކުނޑީގެ އުފާވެރިކަމާ ބެހޭ ބައި ހަރަކާތް ކުރުވާ ކަމެކެވެ. ޗޮކްލެޓު ކެއުމުން ނުއުފެދޭ އުފާވެރިކަން، ހިނިތުންވުމުން އުފެދެއެވެ. އިނގިރޭސި ސައިންސްވެރިންނަށް ފާހަގަ ކުރެވުނު ގޮތުގައި، އެންމެ ހިނިތުންވުމަކުން 2000 ޗޮކްލެޓު ކެއުމުން ނުއުފެދޭ ފަދަ އުފާވެރިކަމެއް މީހާއަށް އައުދެއެވެ.  އަދި ހަމަ މި ސައިންސްވެރިންނަށް ފާހަގަ ކުރެވުނީ 16000 ޕައުންޑް މީހަކަށް ލިބުމުން ސިކުނޑީގެ އުފާވެރިކަމާ ބެހޭ ބައި ޙަރަކާތް ކުރާ މިންވަރަށް، އެންމެ ހިނިތުންވުމަކުން އެބައި ޙަރަކާތް ކުރާކަމެވެ.

ގިނައިން ޗޮކްލެޓް ކެއުމަކީ ޞިއްޙަތަށް ފައިދާ ހުރި ކަމެއް ނޫނެވެ. ނަމަވެސް މިކަމާ ޚިލާފަށް، ގިނައިން ހިނިތުންވުމަކީ ޞިއްޙަތަށް ފައިދާކުރާ ކަމެކެވެ. ހިނިތުންވުމުން ހަށިގަނޑުގެ އެކި ގުނަވަންތަކުން އުފައްދާ، ޠަބީޢަތް އުފާވެރިކުރުވާ ހޯމޯން ދިޔަތައް އުފެއްދުން ގިނަވެއެވެ. ކޯޓިސޯލް އާއި އެޑްރިނޭލިން އެވެ. ޑޮޕަމައިން އާއި އެންޑޯފިން އެވެ. ނަތީޖާއެއްގެ ގޮތުން، ލޭގެ ޕްރެޝަރު ދަށްވެ، މިޒާޖު އުފާވެރިވެއެވެ.

އަދި މިދެންނެވުނު ކަންކަން މަދުކަމަށް ފެނިވަޑައިގަންނަވަނީ ނަމަ، އިތުރު އެހެން ބައެއް ކަންކަން ފާހަގަކޮށްލާނަމެވެ.  ހިނިތުންވުމުން، އެހެންމީހުންގެ ނަޒަރުގައި ތިބާއާ ދޭތެރޭ ރުހުން  ބޮޑުވެއެވެ. އެމެރިކާގެ ޔުނިވަރސިޓީއެއްގެ ދިރާސާއަކުން ދާދި ފަހުން ހޯދުނު ގޮތުގައި، ހިނިތުންވުމުން، ތިބާއަކީ މީހުން ރުހޭ، ޚުލްޤު ހެޔޮމީހެއްގެ ގޮތުގައި ފެނުމުގެ އިތުރަށް، ތިބާއަކީ ހުނަރުވެރިކަން އިތުރު މީހެއް ކަމަށް ވެސް  ފެނެއެވެ.

އެހެންވީމާ، ތިބާއަކީ ރަނގަޅު ހުނަރުވެރި މީހެއްކަމަށް އެހެންމީހުން ބަލައިގަންނަން ބޭނުންނަމަ، އަދި ހާސްކަން ކުޑަކޮށް، ކާވެނި ބާއްޖަވެރިކުރަން ބޭނުން ނަމަ، ހިނިތުންވާށެވެ. އެތައް ހާސް ޗޮކްލެޓެއް ކެއުމުން ވާހާ އުފާވެރިކަން، ފަލަވުމެއް ނެތި، ބޭނުންނަމަ، އަދި ގެއްލިފައިވާ އެތައް ހާސް ޕައުންޑެއް ނުލާތާ ގިނަ ދުވަސްވީ ގަމީހެއްގެ ޖީބުން ފެނުމުން ލިބޭ އުފާވެރިކަން ބޭނުންނަމަ ހިނިތުން ވާށެވެ. ވަށައިގެންވާ އެންމެންނާއި ތިބާ، ޢުމުރު ދިގު ޞިއްޙަތު ރަނގަޅު ޙަޔާތެއް ހޭދަކުރަން ބޭނުން ނަމަ، ހިނިތުން ވާށެވެ.